قوعام • 23 قىركۇيەك، 2019

ادەمى دانەكەرلەۋشىمەن اڭگىمە

219 رەتكورسەتىلدى

«مەن ەڭ الدىمەن ىستەگەن جۇمىسىمدا ساپاعا باسا ءمان بەرەمىن. جاساعان زاتىم تاپسىرىس بەرگەن ادامدارعا عانا ەمەس، وزىمە دە ۇناسا، جۇمىسىمنان كادىمگىدەي ءلاززات الامىن». بۇل – الماتى وبلىسىنىڭ بالقاش اۋدانىنداعى باقاناس اۋى­لىندا تۇراتىن دانەكەرلەۋشى كەلىنشەكتىڭ ءسوزى. جالپى ادەمىنى ەرەكشە تانىستىرىپ جاتۋدىڭ قاجەتى جوق شىعار. كادىمگى قازاقتىڭ قاراكوز قىزى. ونى ءوز زامانداستارىنان ءبولىپ الىپ قاراۋعا سەبەپكەر بولعان جەكە تاڭداۋى عانا. ءيا، ەكى بالانىڭ اناسى قازىر تەمىردى تەرىشە يلەپ، گۇل ورنىنا ەلەكترود ۇستاپ دانەكەرلەۋشى بولىپ ءجۇر. كەيىپكەرىمىز ادەمى ەسەنشوراەۆامەن اڭگىمەمىز وسىدان باستالدى.

– ادەمى، ايەل بالاسىنا تاڭسىق كاسىپپەن اينالىسۋىڭىزعا نە تۇرتكى بولدى؟

– كۇيەۋىم ەكەۋىمىز بالا-شاعانى اسىراۋ ءۇشىن كەز كەلگەن كاسىپتەن ارلانبادىق. سوڭعى قولعا العان كاسىبىمىز جاڭا جىل الدىندا شىرشا ساتۋ بولدى. تاۋارىمىز جەردە جاتپاسىن دەپ دانەكەرلەۋشىگە تاپسىرىس بەرىپ، ۇزىن قىلىپ تەمىردەن ۇستەل جاساتتىق. سول كەزدە شەبەردىڭ جۇمىسىن سىرتتان قىزىقتاپ تۇردىم. قولىنداعى قۇرالىنا قىستىرىلعان ەلەكترودتى تەمىرگە تيگىزىپ قالعاندا، جان-جاققا شا­شىراعان مىڭ-سان ۇشقىن كادىمگى تۇندە اتىلاتىن وتشاشۋدى كوز الدىما ەلەستەتتى. كۇيەۋىمنىڭ «قاراما، كوزىڭ اۋى­رادى»، دەگەنىنە قاراماستان، قولىممەن كوزىمدى كولەگەيلەپ تۇرىپ الگى كورىنىستى تاماشالاي بەردىم. نەگە ەكەنىن ءوزىم دە بىلمەيمىن، اياق استىنان قىزىعۋشىلىعىم وياندى. سودان دانەكەرلەۋشىدەن قۇرال­دارىن سۇراپ الدىم دا، تەمىردىڭ ەكى كەسىندىسىن بالقىتىپ وتىرىپ جالعاپ كوردىم. بايقاپ قاراسام، قولىمنىڭ ەبى بار سياقتى. دانەكەرلەۋشىنىڭ بەتپەردەسىن قايتا كيىپ الىپ، ءارى قاراي ىسكە كىرىسە بەردىم. مىنە، سودان بەرى وسى كاسىپتىڭ قىر-سىرىن ۇيرەنۋگە تاۋەكەل ەتتىم.

– دانەكەرلەۋشى ادەمىنىڭ وتباسىمەن تانىسا وتىرساق...

– ەكى بالانىڭ اناسىمىن. كۇيەۋىمىز ەكەۋمىز ءبىر-ءبىرىمىزدى قاس-قاباقتان تۇسى­نەمىز. سودان دا بولار، قانداي ءىستى بولسىن ەكەۋلەپ الىپ كەتىپ، ايتەۋىر ءبىر ناتيجە شىعارىپ جاتامىز. شىنى كەرەك، مىنا ومىردە جانىڭداعى جۇبايىڭنىڭ قولداۋى وتە كەرەك جانە ماڭىزدى دۇنيە. ال انام – اقىلشىم، سىرلاس قۇربىمداي بولىپ كەتكەن ەڭ جاقىن، ەڭ اسىل ادامىم.

نەگىزى، ءوزىمنىڭ ماماندىعىم – بۋحگالتەر. بىراق كەڭسەدە قاعاز ءمۇجىپ وتىرۋ مەن ءۇشىن ازاپپەن تەڭ. ودان دا تەمىردەن ويىڭداعىنى جاساپ، دەنە ەڭبەگىمەن اينالىسقان مىڭ ەسە ارتىق.

– ءسىزدىڭ بۇل كاسىبىڭىزگە تۋعان-تۋىس، كۇيەۋىڭىز قالاي قارادى؟

– انام باسىندا «ەلدەن ۇيات-تاعى»، دەپ بىرازعا دەيىن قارسى بولىپ، نامىس­تانىپ ءجۇردى. كەيىن ىستەگەن شارۋامدى كورىپ، بۇل ءىستىڭ دە ءوز نەسىبەسى بارلىعىنا كوز جەتكىزگەننەن كەيىن بارىپ كونگەن ىڭعاي تانىتتى. ال كۇيەۋىم بولسا، اۋەل­ باستان مەنى قولداپ شىقتى. ونىڭ «قو­لىڭنان كەلسە، ىستەي بەر» دەگەن جالعىز اۋىز ءسوزى ماعان كادىمگىدەي كۇش بەرىپ، وزىمە دەگەن سەنىمىمدى ارتتىردى.

جالپى، مەنىڭ بالا كەزىمنەن جۇرتتىڭ سىپسىڭ ءسوزىن ەلەڭ قىلماي، وزىمە ۇناعان كەز كەلگەن شارۋانى ىستەي بەرەتىن ادەتىم بار. مىنەزىم سونداي. سوزدەن گورى ءىستى ۇناتامىن.

– ەندى، بۇل كاسىپتىڭ ءوتىمدى، قاي­تارىمدى ەكەنىن تۇسىنگەننەن كەيىنگى ءىس-ارەكەتىڭىز قانداي بولدى؟

– ەڭ الدىمەن بيزنەس-جوسپار جاساپ، قۇجاتتارىمدى ازىرلەپ، «بيزنەس باستاۋ» ارنايى جوباسىنا قاتىستىم. جولداسىم ەكەۋىمىز جەرگىلىكتى اكىمدىكتەن جالعا جەر الىپ، شاعىن شەبەرحانا اشتىق. باستاعان ءىسىمىز قايىرلى بولدى. كۇننەن كۇن­گە تاپسىرىس كوبەيىپ، بۇل ءىستىڭ قىزى­عىنا ءباسىبۇتىن كىرىپ كەتتىم. مىنە، ەكى جىلداي بولدى، قالاداعى سايا­باقتار مەن بالالار الاڭدارىنا قا­جەتتى ساكىلەردىڭ، اتكەنشەكتەردىڭ تەمىر قۇرساۋلارىن جاسايمىز. باسقا دا ىستەي­تىن شارۋالار كوپ. كوبىنە بەرىلگەن تاپسىرىستار بويىنشا جۇمىس ىستەيمىن. ال كۇيەۋىم مەنىڭ قولىمنان شىققان دايىن ونىمدەردى تاپسىرۋشىعا جەتكىزىپ بەرىپ وتىرادى.

– ءومىر بويى دانەكەرلەۋشى بولىپ جۇرمەسىڭىز بەلگىلى. دەگەنمەن، بولاشاقتا اينالىسار كاسىبىڭىزدىڭ وسى ىسكە قانداي دا ءبىر قاتىسى بولاتىن شىعار؟ الداعى جوسپارلارىڭىز تۋرالى ايتساڭىز...

– مەنىڭ ويىمشا، ادام بالاسى ماحابباتپەن ىستەسە، كەز كەلگەن كاسىپ ءوزىنىڭ جەمىسىن بەرەدى. ارينە اينالىسقان شارۋا­نىڭ وزىندىك قيىندىقتارى دا بولا­دى. ماسەلەن، ۇزاق جۇمىس ىستەگەندە كوز ەتتەرىمنىڭ تارتىپ اۋىراتىنىن بايقاي­مىن. سونان سوڭ قاۋىپسىزدىك شارالارىن دا قا­تاڭ ساقتاۋعا تۋرا كەلەدى. اسىرەسە گاز­بەن دانەكەرلەگەندە اسا ساق بولۋ كەرەك. ۋلتراكۇلگىن ساۋلەلەردىڭ دە زيا­نى از ەمەس. جوعارى تەمپەراتۋرادا جۇ­مىس ىستەيتىندىكتەن، وت ۇشقىنى مول بولاتىن­دىقتان دەنەدە ءبىر دە ءبىر جەر اشىق بولماۋى كەرەك. دەگەنمەن، جاساعان ءونىمىڭ ويداعىداي شىققاندا، كوزدىڭ اۋىرعانىن دا، شارشاعانىڭدى، ءبارى-ءبارىن ۇمىتىپ كەتەدى ەكەنسىڭ. جال­پى، دانەكەرلەۋشىنىڭ جۇمىسى ادامنان قول شەبەرلىگى ءوز الدىنا، وتە جوعارى دال­دىكتى، تاباندىلىق پەن توزىمدىلىكتى تالاپ ەتەدى. بۇل ناعىز «جەتى رەت ولشەپ، ءبىر رەت كەس» دەيتىن قاعيداتقا باعىناتىن مامان­دىق. بولاشاقتا بۇل كاسىپتىڭ اياسىن كەڭىتىپ، اۋقىمدى جوبالارمەن اينالىسسام با دەپ ارماندايمىن. ول ەندى ۋاقىتتىڭ ەنشىسىندەگى شارۋا.

اڭگىمەلەسكەن
قالماحانبەت مۇقامەتقالي،
«Egemen Qazaqstan»

الماتى وبلىسى

سوڭعى جاڭالىقتار

ەگەمەندىكتەر ەلگە شىقتى

قازاقستان • بۇگىن، 11:19

ەلوردا ورتالىعىندا اۆتوكولىك ورتەندى

قازاقستان • 15 قاراشا، 2019

ءباسپاسوز ءرولى – باستى ماسەلە

ادەبيەت • 15 قاراشا، 2019

قازاقستانعا شەتەلدىك بانكتەر كەلەدى

ەكونوميكا • 15 قاراشا، 2019

قوستاناي فيلارمونياسىنا 75 جىل تولدى

رۋحانيات • 15 قاراشا، 2019

جاڭا ۇلگىدەگى كولىكتەر

قوعام • 15 قاراشا، 2019

ۇقساس جاڭالىقتار