العاشقى بولىپ ءسوز العان وزبەكستاننىڭ قازاقستانداعى توتەنشە جانە وكىلەتتى ەلشىسى سايديكرام نيازحودجاەۆ مىرزا وسىدان 28 جىل بۇرىن, ياعني 1991 جىلدىڭ 31 تامىزىندا ىرگەسى سوگىلگەن كەڭەس ۇكىمەتىنەن ءبولىنىپ شىعىپ, دەربەس ەلدىگىن, ەگەمەندىگىن جاريالاعان وزبەكستاننىڭ تاريحىنان سىر شەرتىپ, تاۋەلسىزدىك جىلدارىندا قول جەتكىزگەن جەتىستىكتەرىنە دە توقتالىپ ءوتتى.
«قازىرگى ۋاقىتتا وزبەكستان بەلسەندى دە تابىستى سىرتقى ساياسات جۇرگىزىپ كەلەدى. اسىرەسە, وزبەك-قازاق قاتىناسى دوستىق پەن باۋىرلاستىقتىڭ بەرىكتىگىنىڭ ارقاسىندا بارلىق باعىتتار بويىنشا تۇراقتى دامۋدا. ءبىز قاي ۋاقىتتا دا قازاقستانمەن ءوزارا ءتيىمدى جانە ستراتەگيالىق ارىپتەستىكتىڭ كەڭەيە تۇسۋىنە مۇددەلىمىز», دەگەن ەلشى س.نيازحودجاەۆ ەكى ەل اراسىنداعى ىقپالداستىق شارالارى سەنىمگە قۇرىلعانىن اتاپ ءوتتى.
ودان ءارى ەلشى مىرزا وزبەكستان پوستەكەڭەستىك كەڭىستىكتەگى وزگە دە ەلدەر سەكىلدى تاۋەلسىزدىكتىڭ العاشقى جىلدارىندا قۇرىلۋ مەن قالىپتاسۋدىڭ كۇرمەۋى كۇردەلى قيىنشىلىقتارىن ەڭسەرگەنىن قوناقتاردىڭ ەسىنە سالىپ ءوتتى. بۇگىندە وزبەك ەلى دامۋدىڭ ايقىن باعىتىن باعدارلاعان ەلدەردىڭ قاتارىنا قوسىلدى.
ەكى ەل اراسىنداعى تاريحي ساباقتاس مادەني-گۋمانيتارلىق بايلانىستى تەرەڭدەتۋ ماقساتىندا 2018 جىل - قازاقستانداعى وزبەكستان جىلى دەپ جاريالانعان بولاتىن. جىل بويى 200-گە جۋىق ءتۇرلى ءىس-شارالار ۇيىمداستىرىلىپ, ماڭىزدىلىعى جوعارى كەلىسىمدەرگە قول جەتكىزىلدى.
قازاقستان مەن وزبەكستان اراسىنداعى دوستىق قارىم-قاتىناستىڭ تامىرى تەرەڭدە ەكەنى ءسوزسىز. ەكى ەلدى ءتىلىنىڭ, ءدىنىنىڭ, تاريحى مەن تاعدىرىنىڭ ۇقساستىعى عانا ەمەس, بىرتۇتاستىعى بىرىكتىرەدى. سونداي-اق, ەكى ەلدىڭ شەكارالاس ايماقتارى اراسىنداعى ساۋدا-ەكونوميكالىق بايلانىس اياسى دا جىلدان جىلعا كەڭەيىپ كەلەدى. 2019 جىلى وزبەكستانمەن اراداعى تاۋار الىس-بەرىسى 50 پايىزعا دەيىن ءوسىپ, 3 ميلليارد دوللاردان ارتىپ جىعىلعان.
«2020 جىلعا دەيىن بۇل كورسەتكىشتى 5 ميللياردقا دەيىن جەتكىزۋ جوسپارلانىپ وتىر» دەپ اتاپ ءوتتى س.نيازحودجاەۆ.
وزبەك جاعى بۇل بەلەستى باعىندىرۋ ءۇشىن وزبەكستاندا قۇراستىرىلعان جەڭىل جانە جۇك اۆتوكولىكتەرىنىڭ, اۆتوبۋستارىنىڭ, اۋىل شارۋاشىلىعى تەحنيكالارىنىڭ ەكسپورتىن ارتتىرماق. وزبەك اعايىندار ءتىپتى ءوز اۆتوكولىك ماركالارىن شاشىلعان كۇيدە اكەلىپ, قازاقستان جەرىندە جيناستىرۋعا دايىن وتىر ەكەن.
وزبەكستان ەلشىلىگى الماتى قالاسىنداعى باس كونسۋلى ا. فاتحۋللاەۆ بىزبەن اڭگىمەسىندە ازامات رەتىندە, ەلشى رەتىندە قازاقستاندا, الماتىدا ءوز ەلىندە جۇرگەندەي ەركىن سەزىنەتىنىن ايتتى. «بۇل رەتتە مەن جولى بولعان ەلشىمىن. ءبىزدىڭ تاريحتارىمىزدىڭ ءاربىر قالتارىسىنان ءبىر كەزدەرى ءتۇبى- تەگى ءبىر حالىقتان تاراعانىمىزدى ەسكە سالىپ تۇراتىن فاكتورلار كوپ », دەپ اتاپ ءوتتى ا. فاتحۋللاەۆ.
الماتى قالاسى مەن تۇركىستان وبلىستارى قازاقستانمەن الىس –بەرىسىندە ەرەكشە ورىن الاتىنىن ايتتى. 2017 جىلى تۇركىستان وبلىسى وزبەكستان رەسپۋبليكاسىنداعى بىرقاتار وبلىستارمەن ىنتىماقتاستىق تۋرالى مەموراندۋم جاساعان بولاتىن.
ەكى ەل 28 جىل ىشىندە ءوزارا بىرقاتار كەلىسىم جاساسقان. سونىڭ ەڭ باستىلارى «ماڭگىلىك دوستىق» جانە «ستراتەگيالىق سەرىكتەس» تۋرالى شارتتارى. وسى قۇجاتتار نەگىزىندە بۇگىنگى كۇنى قازاقستاندا 800-دەن استام كاسىپورىن وزبەك كاپيتالىنىڭ قاتىسۋىمەن جۇمىسىن ىستەپ كەلەدى.
ءوز كەزەگىندە باس كونسۋل ا.فاتحۋللاەۆ وسى جوبالاردىڭ ەكى ەلدىڭ ەكونوميكالارى ءۇشىن ماڭىزدىلىعىن اتاپ ءوتتى. تۇركىستان ايماعىنىڭ قازاقستاندىق جانە وزبەك كومپانيالارىنىڭ قاتىسۋىمەن بىرلەسكەن جوبالاردى دامىتۋ ءۇشىن ۇلكەن الەۋەتكە يە ەكەنىن جەتكىزدى. ەكى ەلگە ورتاق ماقتا شارۋاشىلىعىن ودان ءارى دامىتۋ ماقساتىندا دا ارنايى جوبا ازىرلەنىپ جاتىر. سونىڭ نەگىزىندە كووپەراتسيالىق كلاستەر قۇرىلىپ, ماقتانى ەگۋدەن باستاپ تەرەڭ وڭدەۋگە دەيىنگى بارلىق ارەكەتتەردى بىرلەسىپ اتقارۋ قولعا قولعا الىنباق.
مەرەكەلىك شاراعا قوناق رەتىندە شاقىرىلعان سىرتقى ىستەر مينيسترلىگىنىڭ الماتى قالاسىنىڭ وكىلدىگىنىڭ باسشىسى ەرلان ىسقاقوۆ تۇز-ءدامىن ۇسىنىپ, ىستىق ىقىلاس تانىتىپ وتىرعان وزبەك ارىپتەستەرىن سىرتقى ىستەر مينيسترلىگى جانە ءوز اتىنان تاۋەلسىزدىك مەرەسىمەن قۇتتىقتادى. 2019 جىلدىڭ العاشقى جارتىسىندا ءبىزدىڭ ەلدەرىمىز اراسىنداعى تاۋار اينالىمى 600 ملن اقش دوللارىنان اسقانى تۋرالى مالىمەت تە الماتى قالاسىنىڭ وكىلدىگىنىڭ باسشىسىنىڭ نازارىنان تىس قالمادى. «الماتىدا بىرلەسكەن 129 جانە 236 وزبەك كاسىپورىن جۇمىس ىستەيدى. وزبەكستاننىڭ 17 پايىز ەكونوميكاسى تاشكەنت قالاسىنىڭ ۇلەسىندە. ءبىزدىڭ ەلدەرىمىز ااراسىنداعى بايلانىستا الماتى مەن تاشكەنت قالالارىنىڭ الەۋەتى زور بولماق. سوندىقتان, ءبىزدىڭ تاراپ سىزدەرمەن تاجىربيە الماسۋعا قاشاندا دايىن» دەپ اتاپ ءوتتى الماتى قالاسىنىڭ وكىلدىگىنىڭ باسشىسى ەرلان ىسقاقوۆ.
وزبەكستاننىڭ تاۋەلسىزدىك كۇنىنە وراي ۇيىمداستىرىلعان شارادا قوناقتارعا وزبەكتىڭ ۇلتتىق داستارحانىنان ءدام ۇسىنىلىپ, سالتاناتتى قابىلداۋ سوڭى كونتسەرتتىك شارامەن جالعاستى.
