بۇل كۇنى قاراپايىم عانا اۋىلدىڭ سپورت مەكتەبىندە جاتتىعىپ, سارى قۇرلىق بىرىنشىلىگىندە جەڭىس تۇعىرىنان كورىنگەن ەليزاتقا جانكۇيەرلەرىمەن قاتار, ءوزى ءبىلىم الاتىن تاراز مەملەكەتتىك پەداگوگيكالىق ۋنيۆەرسيتەتى مەن №7 وبلىستىق بالالار مەن جاسوسپىرىمدەر سپورت مەكتەبىنىڭ ۇجىمى دا قۇرمەت كورسەتتى.
14 جاسىنان باستاپ تالاس اۋدانىنىڭ اققۇم اۋىلىندا جاتتىعىپ, ازيا چەمپيونى اتانعان ارۋدى سامبونىڭ قىر-سىرىنا بوستاندىق بالالار مەن جوسپىرىمدەر سپورت مەكتەبىنىڭ جاتتىقتىرۋشىسى باربول ءجاۋىشوۆ باۋلىعان.
– ەليزاتتىڭ سپورتقا قارىم-قابىلەتىن بالا كۇنىنەن بايقاعانمىن. كەيىن اتا-اناسىنان سامبو ۇيىرمەسىنە قاتىسۋىنا رۇقسات سۇرادىم. العاشىندا اناسى قارسى بولدى. كەيىننەن ەليزاتتىڭ بويىنداعى بۇلا كۇشتىڭ سپورتتا جەتىستىككە باستايتىندىعىنا كوز جەتكىزدى. ول مەكتەپتە وقىپ ءجۇرىپ بىرنەشە رەت رەسپۋبليكا بىرىنشىلىكتەرىندە توپ جاردى, – دەيدى ب.ءجاۋىشوۆ.
ال ەليزاتتىڭ ءوزى ءۇندىستان جەرىندەگى سايىستا ەلدە قالىپ تاقىمىن قىسقان اتا-اناسىنىڭ, باۋىرلارىنىڭ, جالپى جانكۇيەرلەرىنىڭ قولداۋىن سەزگەنىن ايتادى.
– ارينە ازيانىڭ 15 مەملەكەتىنەن چەمپيون اتانۋعا ءۇمىتتى ەڭ مىقتى سپورتشىلار كەلگەن سايىستا قارسىلاستىڭ قاي-قايسىسى دا وسال ەمەس. ونىڭ ۇستىنە ءا دەگەننەن مەن سامبو سپورتىنان ازيادا ۇزدىك سانالاتىن وزبەك, قىرعىز سپورتشىلارىمەن بەلدەستىم. ەلدىڭ قولداۋىنىڭ ارقاسىندا بارلىق بەلدەسۋلەرىمدە قارسىلاستارىمنان باسىم ءتۇستىم,–دەيدى ەليزات ايازبەك.
اۋىلدان شىققان ازيا چەمپيونىنىڭ ەندىگى مۇراتى كەلەسى ايدا وزبەكستاندا وتەتىن الەم چەمپيوناتىندا ولجا سالۋ بولىپ وتىر. ول ەندىگى كەزەكتە جاتتىعۋ جۇمىستارىن تاراز قالاسىنداعى №7 وبلىستىق بالالار مەن جاسوسپىرىمدەر سپورت مەكتەبىنىڭ جاتتىقتىرۋشىلارىمەن جۇرگىزبەك. سونداي-اق باپكەرلەرى ەليزاتتىڭ ءوز باعىن وليمپيادالىق سپورت سانالاتىن دزيۋدودا سىناپ كورۋگە نيەتتى ەكەندىگىن اتاپ ءوتتى.
ساياتحان ساتىلعانوۆ
تاراز
