رۋحانيات • 18 قىركۇيەك، 2019

قاراعاندىدا حالىقارالىق اقىندار ايتىسى باستالدى

188 رەتكورسەتىلدى

كەنشىلەر استاناسىندا اقىن-جازۋشى، مەملەكەت جانە قوعام قايراتكەرى ساكەن سەيفۋلليننىڭ 125 جىلدىق مەرەيتويىنا ارنالعان حالىقارالىق ايتىس باستالدى.

«رۋحاني جاڭعىرۋ» باعدارلاماسى اياسىندا ۇيىمداستىرىلعان شايىرلار سايىسىندا موڭعوليادان، قىرعىزستاننان، قىتايدان جانە ەلىمىزدىڭ تۇپكىر-تۇپكىرىنەن كەلگەن 18 اقىن باق سىنايدى.

جىر دوداسىنىڭ ساكەن سەيفۋللين اتىنداعى قازاق دراما تەاترىندا وتكەن سالتاناتتى اشىلۋ راسىمىندە وبلىس اكىمى ەرلان قوشانوۆ قۇتتىقتاۋ ءسوز سويلەپ، ايتىس ونەرىنىڭ بۇگىنگى كۇندە ۇلكەن ماڭىزعا يە بولىپ وتىرعانىن اتاپ ءوتتى.

– ايتىسكەرلەر ءۇشىن ەڭ جوعارى ماندات، ەڭ جوعارى قۇرمەت – حالىقتىڭ نيەتى مەن سەنىمى. سەبەبى حالىق اقىنداردان تەك قانا شىندىقتى كۇتەدى. اقىن مىنەزى مەن ارىن ەشۋاقىتتا ساتپايدى. ساكەن سەيفۋللينىڭ تىلىمەن ايتقاندا،  «ايتىس – زاماننىڭ اقيقاتى». ەكىنشىدەن، ايتىس – ول جۇرەك. اشىعىن ايتۋ كەرەك، كەيدە ادامدى كوز الدايدى، قۇلاق الدايدى، ءتىپتى ءتىل دە الداۋى مۇمكىن. بىردەڭەگە الىپ كەلىپ، سوقتىرۋى مۇمكىن. بىراق – جۇرەك الدامايدى. ال اقىن – ماسەلەنى جۇرەكپەن كورەدى، جۇرەكپەن جەتكىزەدى. سوندىقتان جۇرەكتەن شىققان جىرلاردى حالىق جۇرەكپەن قابىلدايدى، – دەدى ءوڭىر باسشىسى.

1

ال حالىقارالىق ايتىس جانە جىرشى-تەرمەشىلەر وداعىنىڭ باسشىسى ءجۇرسىن ەرمان وسى ايتىستىڭ Qazaqstan ۇلتتىق تەلەارناسىنىڭ ەفيرىندە كورسەتىلەتىنىن قۋانا جەتكىزدى. «بۇل تەلەراديوكورپوراتسيا، Nur Otan پارتياسى جانە ءبىزدىڭ قوعامدىق بىرلەستىك جاساعان مەموراندۋمنىڭ ارقاسىندا مۇمكىن بولدى»، دەپ اتاپ ءوتتى ول.

قىرعىزستاننان كەلگەن ايتىسكەر اقىن جەڭىسبەك توقتوبەكوۆ مۇنداي جوبالاردىڭ رۋحاني جانداندىرۋعا، ۇلتتىق مادەني كودتىڭ ساقتالۋىنا ىقپال ەتەتىنىنە باسا نازار اۋداردى.

– ساكەن سەيفۋللين قۇرمەتىنە وتكىزىلەتىن وسى ايتىستىڭ قازاق حالقى ءۇشىن ماڭىزى وتە زور. قازاقستاندا ايتىستار بىزدەگىگە قاراعاندا ءجيى وتكىزىلەدى. وسىلايشا مادەني مۇرانى باعالايتىندارىڭىز، سالت-ءداستۇردى قۇرمەتتەيتىندەرىڭىز جانە حالىق ونەرىن قولدايتىندارىڭىز ادامدى ەرىكسىز ءتانتى ەتەدى، – دەپ اعىنان جارىلدى بىشكەكتەن كەلگەن قوناق.

حالىقارالىق ايتىستىڭ قورىتىندىسى 19 قىركۇيەك كۇنى بەلگىلى بولادى.

 

قاراعاندى وبلىسى

 

سوڭعى جاڭالىقتار

ارىماس ابىروي

رۋحانيات • كەشە

كونەدەن كەلگەن كونەك

رۋحانيات • كەشە

شىمبۇلاق شاڭعى ماۋسىمىن اشتى

قىسقى سپورت • كەشە

اتباسار

رۋحانيات • كەشە

ۇقساس جاڭالىقتار