جيىنعا اسسامبلەيا مۇشەلەرى, وليمپيادالىق سپورت تۇرلەرى بويىنشا ۇلتتىق سپورتتىق فەدەراتسيالاردىڭ پرەزيدەنتتەرى قاتىسىپ جاتىر.
كۇن تارتىبىندەگى باستى ماسەلە - قازاقستان ۇلتتىق وليمپيادالىق كوميتەتىنىڭ پرەزيدەنتىن سايلاۋ.
وتىرىستى قازاقستان رەسپۋبليكاسىنىڭ پرەمەر-ءمينيسترى اسقار مامين باستادى.
«مەن باستى نازاردى وسكەلەڭ ۇرپاققا اۋدارۋ كەرەكتىگىن ايتقىم كەلەدى. ولاردىڭ اراسىندا تالانتتى سپورتشىلار وتە كوپ. ءبىزدىڭ ماقساتىمىز – ولاردى تاۋىپ, وقىتىپ, الەمدىك جارىستاردا جۇلدە الاتىن دارەجەگە جەتكىزۋ. ءاربىر فەدەراتسيا ءۇشىن بۇل باستى مىندەت سانالادى. سونىمەن قاتار, ءبىز قازاقستاندىق سپورتشىلاردىڭ توكيو وليمپياداسىندا ءساتتى ونەر كورسەتۋىنە كۇش سالۋىمىز قاجەت.
وعان ءبىزدىڭ الەۋەتىمىز جەتەدى. قۇرمەتتى, جيىنعا قاتىسۋشىلار. قازاقستان ۇكىمەتى مەن ۇوك-ءتىڭ بىرلەسكەن جۇمىسى ارقاسىندا ەلىمىزدە ءىرى جارىستار وتكىزىلدى. بۇل ءبىزدىڭ ەلدە الەمدىك تۋرنيرلەردى ابىرويمەن اتقاراتىنىمىزدىڭ دالەلى. كەلەسى جىلى ەلىمىزدەگى سپورتتى دامىتۋعا رەسپۋبليكالىق بيۋدجەتتەن 54 ميلليارد تەڭگە ءبولىندى.
ەلىمىزدەگى سپورتتىق ينفراقۇرىلىمدى دامىتامىز. ءسوز سوڭىندا ۇوك باسشىسىن سايلاۋ وتە ماڭىزدى وقيعا ەكەنىن ايتقىم كەلەدى. ويتكەنى, ەلىمىزدەگى سپورتتىڭ ءارى قارايعى دامۋى تۋرالى ءسوز بولىپ وتىر. ءبىزدىڭ دۇرىس تاڭداۋ جاسايتىنىمىزعا سەنەمىن», - دەدى اسقار مامين.
