كەزدەسۋ بارىسىندا تاراپتار قازاقستان مەن ساۋد ارابياسى قارىم-قاتىناستارىنىڭ قازىرگى دەڭگەيىن تالقىلاپ, مادەني-گۋمانيتارلىق جانە ساۋدا-ەكونوميكالىق بايلانىستارىنىڭ كەڭەيتۋ جولدارى بويىنشا پىكىر الماستى.
قازاقستاندىق ديپلومات قازاقستاننىڭ كورولدىكپەن ساياسي, ساۋدا-ينۆەستيتسيالىق ىنتىماقتاستىعىن ودان ءارى تىعىز نىعايتۋعا مۇددەلىلىگىن قۋاتتادى. وسى تۇرعىدا ول جيددا مەن مەككە ساۋدا-ونەركاسىپ پالاتالارىنىڭ كوپ جىلدىق تاجىريبەسىن نازارعا الا وتىرىپ, ەكى ەل ىسكەر توپتارىنىڭ تىكەلەي بايلانىس ورناتۋلارىن جان-جاقتى ىنتالاندىرۋ ماڭىزدىلىعىن اتاپ ءوتتى.
ەلشى ساك ۇكىمەتىنە جانە مەككە پروۆينتسياسىنىڭ باسشىلىعىنا, حانزادا حالەد ءال-فەيسالدىڭ جەكە وزىنە قازاقستان ازاماتتارىنىڭ ۋمرا مەن قاجىلىق جاساۋلارى بارىسىندا كورسەتىلگەن كومەگى ءۇشىن العىسىن ءبىلدىردى. 2019 جىلعى قاجىلىق ماۋسىمىنىڭ جوعارى دەڭگەيدە ۇيىمداستىرىلعانىن اتاي وتىرىپ, قاسيەتتى ساۋد ارابياسىنا ەلىمىزدەن ۇستىمىزدەگى جىلى 3200 قاجىنىڭ كەلگەندىگى جەتكىزىلدى.
سونىمەن قاتار, ب.ارىن حانزادا حالەد بەن ءال-فەيسالدى قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ مەرزىمىنەن بۇرىن بيلىكتەن كەتۋى تۋرالى قابىلداعان تاريحي شەشىمىنەن كەيىن ەلىمىزدىڭ ىشكى ومىرىندە ورىن الىپ جاتقان ماڭىزدى وقيعالارمەن تانىستىردى.
بيىك مارتەبەلى حانزادا حالەد ءال-فەيسال مۇسىلمان ەلدەرىنىڭ ىشىندە الدىڭعى قاتارلى ەل رەتىندە سانالاتىن قازاقستانمەن جان-جاقتى ىنتىماقتاستىقتى دامىتۋعا ساۋد ارابياسىنىڭ دايىندىعىنا سەندىردى. سونداي-اق ول قازاقستاننان جانە باسقا دا ەلدەردەن كەلەتىن قاجىلارعا قولايلى جاعدايلار جاساپ كومەك كورسەتۋ كورولدىكتىڭ قۇرمەتتى ءارى مارتەبەلى پارىزى ەكەندىگىن ءمالىم ەتتى.
مەككە پروۆينتسياسى ساۋد ارابياسىنىڭ باتىس بولىگىندە ورنالاسقان جانە كورولدىكتىڭ حالقى سانى جاعىنان ەڭ ۇلكەن اكىمشىلىك ورتالىعى بولىپ سانالادى (حالقىنىڭ سانى 8,3 ملن, تەرريتورياسى 153 128 شارشى مەتر). پروۆينتسياعا 12 اكىمشىلىك ورتالىق (گۋبەرنيا) كىرەدى, ونىڭ ىشىندە ەلدىڭ ءىرى ەكونوميكالىق ورتالىعى بولىپ تابىلاتىن قىزىل تەڭىزدىڭ جاعاسىندا ورنالاسقان دجيددا قالاسى بار.
