جالپى, مەديتسينالىق ۇيىمداردىڭ ماتەريالدىق-تەحنيكالىق بازاسىن جاقسارتۋ ماقساتىندا بيىلعى جىلى الماتى وبلىسىندا 11 نىسان سالۋ جوسپارلانعان. ونىڭ ىشىندە 9 دارىگەرلىك امبۋلاتوريا, رايىمبەك جانە كەربۇلاق اۋداندارىندا ءبىر اۋىسىمدا 250 ادامدى قابىلدايتىن 2 ەمحانا پايدالانۋعا بەرىلەدى. سارقان اۋداندىق ورتالىق اۋرۋحانا مەن شەلەك اۋىلىنداعى ورتالىق اۋداندىق اۋرۋحانادا جاڭعىرتۋ جۇمىستارى جۇرگىزىلۋدە. مەملەكەتتىك-جەكەمەنشىك سەرىكتەستىك شەڭبەرىندە جامبىل اۋدانى ۇزىناعاش اۋىلىندا ەمحانانىڭ قۇرىلىسى باستالدى. «اۋىل - ەل بەسىگى» باعدارلاماسى بويىنشا ەسكەلدى, كوكسۋ اۋداندارىنداعى ورتالىق اۋداندىق اۋرۋحانالاردى كۇردەلى جوندەۋ جوسپارلانعان. ال سوڭعى ءبىر اي كولەمىندە ايماقتا دەنساۋلىق ساقتاۋ سالاسىن قاجەتتى مەديتسينالىق قۇرال-جابدىقپەن قامتاماسىز ەتۋگە قاتىستى بىرنەشە جاڭالىق بولدى.
ماسەلەن, جاقىندا عانا تالدىقورعان قالاسىنداعى 6-شاعىن اۋداندا العاشقى مەديكو-سانيتارلىق كومەك كورسەتۋ ورتالىعى ىسكە قوسىلدى. جاڭا شاعىن اۋدانداردىڭ تۇرعىندارى, ياعني 16 مىڭ ادام مۇندا بارلىق قاجەتتى مەديتسينالىق كومەك تۇرلەرىن الا الادى. ورتالىق ءبىر اۋىسىمدا 320 ادامدى قابىلداۋعا لايىقتالعان. مەديتسينالىق مەكەمە زامان تالابىنا ساي قۇرالدارمەن تولىق جابدىقتالعان, ترياج-جۇيەسى ەنگىزىلگەن. مۇندا 68 بىلىكتى مامان مەديتسينالىق قىزمەت كورسەتەدى, ونداعى 20 دارىگەردىڭ 11-ءى – جوعارى ساناتتى. ءبىر سالاعا ماماندانعاندار اراسىندا پەدياتر-كونسۋلتانت, نەۆروپاتولوگ, كارديولوگ, حيرۋرگ, تراۆماتولوگ, وتولارينگولوگ, ەندوكرينولوگ, اكۋشەر-گينەكولوگ, وفتالمولوگ, ۋلترا دىبىستىق زەرتتەۋ-دياگنوستيكا دارىگەرى, پسيحولوگ بار.
سونداي-اق الاكول اۋدانىنىڭ ورتالىعى ءۇشارال قالاسىندادا جاڭادان كومپيۋتەرلىك توموگرافيا كابينەتى اشىلدى. الاكول وڭىرىندە مۇنداي زاماناۋي مەديتسينالىق جابدىقتىڭ بۇرىن بولماعان ەكەن. ەندى اۋدان تۇرعىندارىنىڭ تولىق تەكسەرىلۋىنە مۇمكىندىك بار. جالپى قۇنى 495 ملن تەڭگەنى قۇرايتىن «فيلليپس» ماركالى كومپيۋتەرلىك توموگرافى «Optonic» سەرىكتەستىگىنىڭ قارجىسىنا الىنعان ەكەن.
- بۇرىن الاكولدىكتەر كومپيۋتەرلىك توموگرافتان ءوتۋ ءۇشىن سارقان, تالدىقورعان قالالارىنا باراتىن. ول جولدىڭ قاشىقتىعى مەن قولايسىزدىنا اۋىر تيەتىن. ەندى اۋدان تۇرعىندارىنا تەكسەرۋدەن ءوتۋ ءۇشىن وزگە اۋرۋحانالارعا بارۋدىڭ قاجەتى جوق, - دەيدى «Optonic» جشس ديرەكتورىنىڭ ورىنباسارى مارات ابدىبەكوۆ.
مۇنان بولەك, پانفيلوۆ اۋدانى اۋماعىنداعى «قورعاس» شەكارا ماڭى ىنتىماقتاستىعى حالىقارالىق ورتالىعىندا دا قازاقستاندىق «ALTACO -ءححى» كومپانياسى مەن «تسزيۋ تاڭ چجە» اتتى قىتاي كومپانياسىنىڭ بىرلەسىپ, «تسزيۋ چجە تاڭ – ALTACO» حالىقارالىق مەديتسينا ورتالىعىن اشتى. جاڭا اشىلعان مەديتسينا ورتالىعى ەرەسەك تۇرعىندارعا جاڭا تەحنولوگيانى قولدانا وتىرىپ, گەماتولوگيا جانە كارديولوگيا سالاسى بويىنشا امبۋلاتورلىق-ەمحانالىق كومەك كورسەتەدى. ءجىتى ميوكارد ينفاركتىسىن باستان كەشكەن ناۋقاستاردى اللوگەندىك مەزەنحيمالدىق سۇيەك-مي جاسۋشالارىمەن ەمدەۋ پلاتسەبومەن سالىستىرعاندا جۇرەك قىزمەتىنىڭ كورسەتكىشتەرىن 2-5 پروتسەنتكە دەيىن جاقسارتادى ەكەن.
- جالپى, الداعى جىلدان باستاپ ەلىمىز مىندەتتى الەۋمەتتىك مەديتسينالىق ساقتاندىرۋ جۇيەسىنە كوشەتىنىن ايتىپ جاتىرمىز. دەمەك, ءبىزدىڭ دەنساۋلىق ساقتاۋ سالاسى ءۇشىن جاۋاپتى كەزەڭ باستالدى. اسىرەسە, ساپالى قىزمەت كورسەتۋ كۇن تارتىبىندە تۇر. ونىڭ ىشىندە بىلىكتى كادر مەن قولجەتىمدى مەديتسينالىق قۇرال-جابدىق جايى وتكىر تۇر. قازىر وسى ەكى ماسەلە بويىنشا وبلىستا قىرۋار جۇمىس ىستەلدى دەپ ايتا الامىز. جاڭا تەحنولوگياعا نەگىزدەلگەن, سىرقاتتىڭ الدىن الۋ مەن دەرتتى ەرتە باستان انىقتاۋعا ارنالعان اپپاراتتار اۋدان, قالاداعى ورتالىقتاردان بولەك, الىس اۋىلدارعا قويىلا باستادى. مەديتسينا نىساندارى دا كوپتەپ اشىلۋدا. قازىرگى الماتى وبلىسىندا 806 مەديتسينالىق مەكەمە, ولاردا 5 مىڭداي دارىگەر مەديتسينالىق قىزمەت كورسەتەدى. وسى مەديتسينالىق ۇيىمداردىڭ ماتەريالدىق-تەحنيكالىق بازاسىن جاقسارتۋ ماقساتىندا بيىل تاعى 11 نىسان سالۋ جوسپارلاندى, - دەيدى وبلىستىق دەنساۋلىق ساقتاۋ باسقارماسىنىڭ باسشىسى باۋىرجان ىسقاق.
