قازاقستان • 18 قىركۇيەك، 2019

نۇر-سۇلتاندا الەمدىك جانە ءداستۇرلى دىندەر ليدەرلەرىنىڭ VII سەزىنىڭ كۇن ءتارتىبى تالقىلاندى

34 رەت كورسەتىلدى

نۇر-سۇلتاندا الەمدىك جانە ءداستۇرلى دىندەر ليدەرلەرىنىڭ VII سەزىنە دايىندىق اياسىندا ءدىني فورۋم حاتشىلىعىنىڭ وتىرىسى بولدى. شاراعا قازاقستان پارلامەنتى سەناتىنىڭ توراعاسى، سەزد حاتشىلىعىنىڭ باسشىسى داريعا نازارباەۆا توراعالىق ەتتى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.

سەنات باسشىسى حاتشىلىق وتىرىسىنا قاتىسۋشىلارعا ارناعان سوزىندە الەمدىك جانە ءداستۇرلى دىندەر ليدەرلەرى سەزىن وتكىزۋ تۋرالى يدەيانىڭ اۆتورى قازاقستاننىڭ تۇڭعىش پرەزيدەنتى، ۇلت كوشباسشىسى نۇرسۇلتان نازارباەۆ ەكەنىن اتاپ ءوتتى.

«بۇكىل الەم مويىنداعان بىتىمگەر، وتكەن جىلدارى قازاقستاننىڭ وراسان زور يادرولىق قارۋ ارسەنالىنان باس تارتۋىنا باستاماشى بولعان، تاۋەلسىزدىك جىلدارى ىشىندە وڭىرلىك قاۋىپسىزدىك پەن تۇراقتىلىقتىڭ تىرەگىنە اينالعان ەلدىڭ باسشىسى نۇرسۇلتان نازارباەۆتىڭ باستاماسىن بارلىق ەڭ ءىرى الەمدىك دىندەر مەن  كونفەسسيالاردىڭ باسشىلارى قولدادى»، - دەدى سەزد حاتشىلىعىنىڭ باسشىسى.

دىنارالىق سامميت الەمگە بارلىق دىندەردىڭ شىنايى ماقسات-مۇراتىن، ار-وجدان جانە ەتيكالىق قاعيدالاردىڭ ورتاقتىعىن، ولاردىڭ بىتىمگەرشىلىك جانە گۋمانيتارلىق زور الەۋەتىن كورسەتەدى.

الەمدىك جانە ءداستۇرلى دىندەر ليدەرلەرىنىڭ ءى سەزى ءدىني قايشىلىقتاردى جامىلىپ ىسكە اسىرىلعان بىرقاتار جوسىقسىز لاڭكەستىك ارەكەتتەردەن كەيىن ادامزات بۇكىل الەمدى تولىق دەرلىك جايلاپ العان كونفەسسياارالىق سەنىمنىڭ داعدارىسىن باستان كەشكەن كەزەڭدە ءوتتى. «وكىنىشكە وراي، ەكسترەميزم، تەرروريزم ماسەلەلەرى جانە زورلىق-زومبىلىقتىڭ وزگە دە تۇرلەرى ءالى كۇنگە دەيىن كۇن تارتىبىنەن تۇسكەن جوق. وسى جىلدار ىشىندە عيباداتحانالارى مەن ءدىندارلارىنا جالعان تابىنۋشىلار مەن ەكسترەميستەر قاستاندىق جاساماعان كونفەسسيا جوق»، - دەدى سەنات باسشىسى.

سەزد حاتشىلىعىنىڭ باسشىسى قازاقستاننىڭ كورسەتىپ وتىرعان ۇلگىسى مەن الەمدىك ءدىني جانە ساياسي ليدەرلەردىڭ سەزد دەكلاراتسياسىنىڭ باعىتىن جەر-جەردە ۇستانۋى قاقتىعىستار ورىن العان ايماقتاردا شيەلەنىستى السىرەتۋگە، وركەنيەتتەردى جاقىنداستىرۋعا جانە جەر جۇزىندە بەيبىتشىلىك پەن تۇراقتىلىقتى نىعايتۋعا ايتارلىقتاي ىقپال ەتەتىنىنە سەنىم ءبىلدىردى.

«بۇگىن وسى بەيبىتشىلىك جانە كەلىسىم سارايىنىڭ قوناقجاي زالىندا ءبىزدىڭ، سەزد حاتشىلىعىنا قاتىسۋشىلاردىڭ الدىندا سىزدەر وكىلدىك ەتكەن ءاربىر كونفەسسيا جيناقتاعان وسى كوپعاسىرلىق تاجىريبەنى بىتىمگەرشىلىك ماقساتتارعا پايدالانۋ مىندەتى تۇر. بۇل ساراي توزىمدىلىك پەن اشىقتىقتىڭ سيمۆولى رەتىندە كوپجاقتى اشىق ديالوگ، كەزدەسۋلەر جۇرگىزۋگە ارنايى جوبالانىپ سالىنعان»، - دەپ اتاپ ءوتتى سەنات باسشىسى.

وتىرىسقا قاتىسۋشىلار الەمدىك جانە ءداستۇرلى دىندەر ليدەرلەرىنىڭ 2021 جىلعا جوسپارلانعان جەتىنشى سەزىنىڭ كۇن ءتارتىبىن تالقىلادى، سونداي-اق، سەزارالىق كەزەڭدەگى جۇمىس جوسپارىن ازىرلەدى.

سوڭعى جاڭالىقتار

نامىسىن تۋ ەتكەن

رۋحانيات • كەشە

ۇقساس جاڭالىقتار