تۇركسىبتە جۇيتكىگەن وتاربانىڭ داۋىسى مۇلگىگەن دالانى ماڭگى مىزعىعان ۇيقىسىنان وياتقانداي. كەشەگى كۇركىرەپ وتكەن جارالى سوعىس جىلدارىنىڭ جاڭعىرىعى جاتىر وندا. ءاربىر بەيبىت كۇنى ۇلى كۇرەسپەن ىزدەنىسكە تولى ەڭبەك جولدارى سايراپ جاتىر. نۇرلى ءىز جالعاسىپ كەلەدى ءالى. ۋاقىتتىڭ تالابىنا قاراي ءسال يىلۋگە دە ءماجبۇر بولعان شىعار. بىراق, ول شورت سىنباي, ەشقاشان بيىك پاراساتتى ۇستانىمىنان اينىعان ەمەس. اسىرەسە اباي, مۇحتار مەن قاسىم شىعارماشىلىعىنا كەلگەندە كوپ ۋاقىت سوزبۇيدالىققا سالىنىپ, ءسال السىزدىككە جول بەرگەندەي. ايتپەسە«سوتسياليستىك قازاقستان» وسى جىلدار ىشىندە حالىق ءومىرىنىڭ قۇبىلناماسى بولا ءبىلدى. ونىمەن بىتە قايناستى.
مەن گازەتكە وتكەن عاسىردىڭ توقسانىنشى جىلدارىندا شاقىرىلدىم. باسىلىمدا ماماديار جاقىپ, نۇرتورە ءجۇسىپ, ءادىل دۇيسەنبەك, قاينار ولجاي, نۇري مۋفتاح سىقىلدى قالامىنىڭ جەلى بار ساقا جۋرناليستەر ەڭبەك ەتەدى ەكەن. باس رەداكتور قازاق ءباسپاسوزىنىڭ كانىگى ساڭلاق ساردارى شەرحان مۇرتازا. بىردەن ۇجىمعا تاستاي باتىپ, سۋداي ءسىڭىپ كەتتىم.
جالاڭ سىپاتتاما, حابار-وشار مەن سىن-سىقاق شىعارىپ, ناسيحاتتاپ قانا قويماي, گازەت كىتاپ تا باسىپ شىعاراتىن دەڭگەيگە كوتەرىلدى. ءبىراز ىرعاسۋدان كەيىن تۇڭعىش رەت ء«ۇش پايعامبار» (1992 ج.) دۇنيەگە كەلدى: ءابىش كەكىلباەۆ ايتەكە تۋرالى, سوفى سماتاەۆ قاز داۋىستى قازىبەك حاقىنداعى تولعاۋىن جازىپ بەرىپ, ولار قالىڭ وقىرمانداردىڭ رۋحي يگىلىگىنە ۇسىنىلدى. مازاسىز كۇندەر ءوتىپ, زۋىلداي بەردى. رەدكوللەگيا مۇشەلەرى جينالعاندا تىڭ ۇسىنىس, جاڭا ويلار ورتاعا تاستالىپ, كوپ ۇزاماي جۇزەگە اسىپ جاتاتىن. كۇردەلى كەزەڭنىڭ كوپ ماسەلەلەرى كورىنىس تاپتى. شال-شاۋقاندار باسقارعان الىپ كسرو-نىڭ سوڭعى دىمكاس دەمى سەزىلە باستاپ, اقىرى ىدىراپ تىندى. «ماڭدايىنا جازعانداي «قازاقستان» بولۋ كەرەك ەدى. «ەگەمەن قازاقستان» بولىپ شىعا كەلدى. ءبىر لەزدەمەدە تاۋەلسىزدىك العان ورتا ازياداعى تۇگەل تۇركى الەمى رەسپۋبليكا باسشىلارىن سويلەتۋ اڭگىمە ارقاۋىنا اينالدى.
تۇرىكمەنستاننان ساپارمۇرات نيازوۆ, قىرعىزستاننان اسقار اقاەۆ تاڭداپ الىندى. ماعان وزبەكستان پرەزيدەنتى يسلام ابدىعاني ۇلى كارىموۆ ءتيدى. ىزىنشە «تەسكەنتاۋدىڭ ار جاعىندا بار جارىق» اتتى كولەمدى سۇقبات جاريالاندى. بۇدان «ەگەمەن قازاقستان» ءوز ەلىمىزدەگى جاعدايدى عانا ەمەس, باسقا تۋىسقان مەملەكەتتەردەگى بولىپ جاتقان ءىرىلى-ۇساقتى وزەكتى وقيعالاردى قامتۋعا تىرىساتىندىعى بايقالادى. مازمۇن بايىدى, قاناتىن كوكجيەككە كەڭ جايدى. شاڭىراقتان شۇعىلا شاشىرادى.
سىرتتا – ءححى عاسىر. ونىڭ دا بەستەن ءبىر بولەگى اياقتالىپ كەلەدى. ءومىر وزگەرىسكە تولى. الايدا وكىنىشكە قاراي, قازاق جۋرناليستيكاسىندا تىڭ تىنىس سەزىلمەيدى. «باياعى جارتاس – ءبىر جارتاس.» ەسكى تاپتاۋرىن, قۋاتسىز سىلدىر ءسوز, تاياز تانىم جالاڭ وي, تار ۇعىم. «قوناقجاي شاڭىراقتاعى» («دوڭگەلەك ۇستەل ەمەس») اڭگىمە, سۇقبات پەن سىردىڭ سىقپىتى قانداي؟ ءبىر-بىرىنە ەگىز قوزىداي, سوڭىندا راحمەت ايتىلۋى كەرەكتەي. نە ءۇشىن؟ ول «سۇقباتتاس» ءسوزىن حالىققا قاراتا ايتقان جوق پا؟ قايتا ءوزىن تولعاندىرعان جايلاردىڭ ەل-جۇرتقا جەتكەنىنەن ريزا بولماي ما؟
بۇرىن جازباگەر-جۋرناليستەردى قازۇۋ مەن قاراعاندى ۋنيۆەرسيتەتىندە اسا جاۋاپكەرشىلىكپەن دايىندايتىن ەدى. قازىر قاي جەردە بولسا دا ءزارۋ مامانداردى ەسەپسىز ازىرلەيتىن بولدى. زاڭگەرلەر, ەسەپ-قيساپشىلار (ەكونوميستەر) شەكتەن تىس كوپ. ۇلت جاستارىن دۇرىس باعىتتاپ باعدار سىلتەپ وتىراتىن ەشكىم جوق. جاستارعا قامقورلىق ءبىلدىرىلىپ, جاناشىرلىق جاسالمايدى.
ەلىمىزدىڭ باس باسىلىمىنىڭ باستاۋىندا بەيىمبەت پەن عابيت سياقتى قازاق ءسوزى الىپتارىنىڭ العاشقى توبى تۇردى. سوندىقتان دا ول قىمبات بىزگە. قاشان دا «ەگەمەن قازاقستان» وتانىمىزداعى يگى ىستەرگە ۇيىتقى, ىزگى ىزدەنىستەرگە باستاماشى بولسا دەگەن وي قىلاڭ بەرەدى.
ايان-سەيىتحان نىسانالين,
اقىن, سىنشى «ەگەمەن قازاقستان» گازەتىنىڭ 1990-1998 جىلدارداعى
ادەبيەت پەن ونەر ءبولىمىنىڭ مەڭگەرۋشىسى
