شىنىندا دا, وتباسىلىق قارىم-قاتىناستا ونەگەلى ءتالىم-تاربيەنىڭ, سابىرلىلىق پەن مىنەز ۇستامدىلىعىنىڭ, اسىرەسە ەنە مەن كەلىن اراسىنداعى يبالى, ىزەتتى قارىم-قاتىناستىڭ ورنى بولەك. توقىراۋ جىلدارىندا حالقىمىزدىڭ ۇلتتىق بولمىسىن تايعا تاڭبا باسقانداي ايعاقتايتىن وسى ءبىر كوركەم قاسيەتتەن تەرىسكەي جاقتاردا ءتۇپ-تامىرىنان اجىراپ, كوز جازىڭقىراپ قالساق, ەندى وسى ولقىلىقتاردىڭ ورنىن تولتىرۋدىڭ مۇمكىندىگى مول.
شوق-شوق اق قايىڭدار باۋرايىندا ورنالاسقان تازا قازاق اۋىلىندا تۇرعاندىقتان با, وتباسىنىڭ اسىل دىڭگەگىن نىعايتۋعا قاراتىلا ايتىلعان تىلەك-ارناۋلاردى كوكەيىمىزگە ءتۇيىپ وستىك. سونىڭ ءبىرى – «بەتىڭ اشىلماسىن» دەگەن جىلى ءسوز سانامدا جاتتالىپ قالىپتى. 1979 جىلى بولاشاق جان جارىم زاۋرە ەكەۋمىز جۇرەك جاراستىرىپ, ۇلكەندەردىڭ باتاسىن الۋعا ەلگە كەلدىك. كىندىگىم كەسىلگەن ۇلگىلى اۋىلى دا, قايىنجۇرت كىشى جامانتۇز دا اشقۇرساق ستۋدەنتتەردى قۇراق ۇشىپ, قۇشاق جايا قارسى الدى. قاشان قاراعاندىعا ءجۇرىپ كەتكەنشە ەنەم تلەۋكە اسقارقىزى اقىل-كەڭەسىن زاۋرە ەكەۋىمىزدىڭ قۇلاعىمىزعا قۇيىپ باقتى. «وزدەرىڭ ءسۇيىپ قوسىلعان ەكەنسىڭدەر, باقىت كىلتى ءوز قولدارىڭدا ەكەنىن ءاردايىم ەستە ۇستاڭدار. تاتۋلىق, سىيلاستىق – ءبىر-بىرىڭە كەشىرىمدە. ەكى جاقتى دا رەنجىتپەڭدەر, دەي كەلىپ, قىزىنىڭ جۇزىنە بارلاي قارادى. سوسىن «قونىسبەك بالامنىڭ تۋعان-تۋىستارىمەن سوزگە كەلىپ, بەتىڭدى اشىپ الما. تۇككە تۇرمايتىن كەرىس, داۋ-داماي تۇيمەدەي نارسەنى تۇيەدەي ەتۋدەن تۇتانىپ جاتادى» دەگەن ءسوزدى قاتقىل داۋىسپەن نىعارلاپ ايتتى. «ۇيگە كۇيەۋ بالاسىز كەلۋشى بولما» دەپ جəنە قوسىپ قويدى. مەكتەپتى انا تىلىمىزدە بىتىرگەندىكتەن, ءسوز توركىنىن بىردەن ۇقتىق. سودان بەرى «بەتتەرىڭ اشىلماسىن» دەگەن ۇعىم وتباسىمىزدىڭ ومىرلىك قاعيداسىنا اينالدى. مەنىڭ ايتپاعىم, جەتى سىنىپتىق قانا ءبىلىمى بار, بىراق تۇيگەن-كورگەنى مول انامىز حالىقتىق پەداگوگيكا ءتالىمىن بەرىك ۇستانىپ, كوز جۇمعانشا ۇرپاقتارىنىڭ بويىنا ءسىڭىرىپ ءوتتى. وبالى نە كەرەك, زاۋرە ءالى كۇنگە دەيىن تۋعان-تۋىستارىمدى, جورا-جولداستارىمدى قاتتى سىيلاپ, قۇراق ۇشىپ تۇرادى.
ەنەم – زەرەندى ءوڭىرىنىڭ تۋماسى. 16 جاسىندا قايىن اتام اسىلبايعا تۇرمىسقا شىعىپ, جەتى بالانى باعىپ-قاعىپ وسىرگەن. اكەلەرى اۋىلدارى قوڭسى قونعان, ءبىرى-ءبىرىن ەرتەدەن بىلەتىن سىرالعى جاندار بولعان. ولاردىڭ تەمىردەي تارتىبىنە كوندىگىپ, قاتاڭ سۇزگىسىنەن وتكەن. اللانىڭ ادامعا بەرگەن ەڭ ۇلكەن نىعمەتى – اتاق تا, مانساپ تا, بايلىق تا ەمەس, يمان. «مارقۇم انالارىڭ «بەتىڭ اشىلماسىن» دەگەن ءسوزدى ءجيى قايتالاۋشى ەدى», دەپ ايتۋدان قاجىلىق پارىزىن وتەپ كەلگەن اتامىز جالىققان ەمەس.
قازىر وي ەلەگىنەن وتكىزىپ وتىرسام, كەيدە تاربيەنىڭ تورەسى وتكەن ۋاقىتتىڭ ەنشىسىندە قالىپ قويعان سياقتى كورىنەدى. ويتكەنى «بەتىڭ اشىلماسىننىڭ» قادىر-قاسيەتىن سەزىنەتىن, پارقىن تۇسىنەتىن ۇرپاقتىڭ ازايىپ بارا جاتقانى الاڭداتادى.
قونىسبەك ىبىراەۆ,
قازاقستان رەسپۋبليكاسى پروكۋراتۋراسىنىڭ قۇرمەتتى قىزمەتكەرى
سولتۇستىك قازاقستان وبلىسى
