بيىل دا داستۇردەگىدەي اۋىل شارۋاشىلىعى مينيسترلىگى وبلىس اكىمدىكتەرىمەن بىرلەسىپ, اۋىل شارۋاشىلىعى تاۋارلارىن وندىرۋشىلەرگە قاجەتتى جانار-جاعارماي كولەمىن انىقتاپ, ەنەرگەتيكا مينيسترلىگىنە ءتيىستى تاپسىرىستى ەنگىزدى. ارزانداتىلعان ديزەل وتىنىنىڭ كولەمى سوعان ساي بەلگىلەنگەن.
«2019 جىلعى كوكتەمگى ەگىس جۇمىستارى كەزەڭىندە ديزەل وتىنىنىڭ ۇسىنىلاتىن باعاسى 1 تونناسىنا 193 مىڭ تەڭگەنى, ال كۇزگى ەگىن جيناۋ جۇمىستارى كەزەڭىندە 1 تونناسىنا 198 مىڭ تەڭگەنى قۇرادى. بۇل رەتتە ەنەرگەتيكا مينيسترلىگىنىڭ قولىندا اۋىل شارۋاشىلىعى تاۋارلارىن وندىرۋشىلەر ءۇشىن ديزەل وتىنىنىڭ ارزانداتىلعان باعاسىن زاڭنامالىق بەكىتۋ قۇزىرەتى جوق ەكەنىن اتاپ وتكەن ءجون», دەدى ءا.ماعاۋوۆ.
ۆيتسە-ءمينيستردىڭ مالىمدەۋىنشە, كوكتەمگى ەگىس جۇمىستارىنا جانار-جاعارماي جەتكىزۋدىڭ كەستەسى 96,4%-عا ورىندالدى, جوسپارلانعان 380 مىڭ توننانىڭ 366,3 مىڭ تونناسى جونەلتىلدى.
ال كۇزگى جيىن-تەرىن جۇمىستارىنا جانار-جاعارماي جەتكىزۋدىڭ جوسپارى بيىلعى 16 قىركۇيەكتەگى جاعداي بويىنشا 65,4% جۇزەگە استى. جوسپارلانعان 395 مىڭ توننانىڭ 258,3 مىڭ تونناسى تيەلدى. ونىڭ ىشىندە, شىلدە ايىنىڭ جوسپارى 94,7%-عا ورىندالىپ, جوسپارلانعان 116,2 مىڭ توننانىڭ 110,1 مىڭ تونناسى جونەلتىلسە, تامىز ايىنىڭ جوسپارى 87,7%-عا جۇزەگە استى. ياعني, جوسپارلانعان 128,8 مىڭ توننانىڭ 113 مىڭ تونناسى اۋىل شارۋاشىلىعى تاۋارلارىن وندىرۋشىلەرگە جونەلتىلدى.
ءا.ماعاۋوۆ اۋىل شارۋاشىلىعى تاۋارلارىن وندىرۋشىلەرگە ارزانداتىلعان جانار-جاعارماي جەتكىزۋدە ەلەۋلى پروبلەمانىڭ كەزدەسە قويماعانىن اتاپ ءوتتى. بيىل دا بىلتىرعى سەكىلدى جانار-جاعارماي جونەلتۋ ءتارتىبى مەن كەستەسى ساقتالۋدا. ارينە كەيبىر جاعدايدا بەلگىلى ءبىر وڭىرگە جانار-جاعارمايدىڭ كەشىكتىرىلۋى كەزدەسپەي قالعان جوق. ال مۇنىڭ نەگىزگى سەبەبى سۇراۋشى جاقتىڭ ءتيىستى قارجىنى ۋاقىتىندا اۋدارماۋىنان تۋىندايدى.
دەگەنمەن اكىمدىكتەر مەن اۋىل شارۋاشىلىعى تاۋارلارىن وندىرۋشىلەر تاراپىنان ارزانداتىلعان جانار-جاعارمايدىڭ جەتكىزىلۋى جونىنەن اسا الاڭداۋشىلىق بايقالعان جوق. سەبەبى جىلدار بويى قالىپتاسقان جونەلتۋ كەستەسىنىڭ ىرعاعى ساقتالۋدا. ەلىمىزدە كۇزگى جيىن-تەرىن جۇمىستارى ءالى اياقتالعان جوق. سوعان سايكەس جانار-جاعارماي جونەلتۋ دە جىلداعىداي تارتىپپەن جالعاسۋدا. مىسالى, قىركۇيەك ايىنىڭ جونەلتۋ جوسپارى كەشەگى كۇنى 27%-عا ورىندالدى.
