«دوڭگەلەك ۇستەلدىڭ» ماقساتى – قازاقستان رەسپۋبليكاسىنىڭ پرەزيدەنتى ق.ك.توقاەۆتىڭ جولداۋدا ۇسىنعان باسىم مىندەتتەرىن تالقىلاۋ. جيىنعا جوعارى ءبىلىم جۇيەسىنىڭ, ارداگەرلەر كەڭەسىنىڭ وكىلدەرى, جاستار مەن كاسىپكەرلەر قاتىستى.
ءىس-شارانىڭ مودەراتورى, بەلگىلى ساياساتتانۋشى ەرلان سايروۆ ەل پرەزيدەنتىنىڭ جولداۋى ەلدەگى الەۋمەتتىك-ساياسي پروتسەستەردىڭ نەگىزگى ەلەمەنتى جانە قوعامدىق بولمىستى بايىپپەن جاڭارتۋ كونتۋرى ەكەنىن اتاپ ءوتتى.
«پرەزيدەنت جولداۋى ەلىمىزدەگى الەۋمەتتىك-ساياسي پروتسەستەردىڭ جانە قوعامدىق سانانى جاڭعىرتۋدىڭ بازالىق ەلەمەنتى بولىپ تابىلادى. مەملەكەت پەن ازاماتتار اراسىندا بايلانىستىڭ جاڭا فورماتى, تۇرعىندارمەن كەرى بايلانىستىڭ جاڭا مەحانيزمدەرى قاجەت. بۇل رەتتە جاستار قاۋىمى ەڭ بەلسەندى ءارى نەگىزگى كۇش ەكەنى داۋسىز. بۇل جولداۋدا الەۋمەتتىك ماسەلەلەرمەن قاتار قوعامدىق-ساياسي ۇردىستەردى جاڭعىرتۋ, قوعاممەن بيلىك اراسىندا ديالوگ ورناتۋ ماسەلەلەرى قامتىلعان. وزگەرىسسىز بىردە-ءبىر قوعام نەمەسە مەملەكەت دامي المايدى. سوندىقتان ءبىز قوعامداعى جاڭا وزگەرىستەرگە, دامۋ پروتسەستەرىنە دايىن بولۋىمىز كەرەك. ول ءۇشىن ۇلتتىڭ ساناسىن كوتەرە وتىرىپ, جاڭا الەۋمەتتىك ستانداردتاردى جاساعان ابزال», دەگەن ساياساتتانۋشى جاڭا ءداۋىرى باستالعان تۇركىستان وبلىسى مەن تۇركىستان قالاسىنىڭ ءىرى ورتالىققا اينالاتىنىنا سەنىم ءبىلدىردى.
تۇركىستان قالالىق ارداگەرلەر كەڭەسىنىڭ توراعاسى ج.قۇلبايىمبەتوۆ پرەزيدەنت ق.ك.توقاەۆتىڭ جولداۋى ساياسي ماۋسىمدى اشىپ بەرگەنىن ايتتى. ونىڭ ايتۋىنشا, پرەزيدەنت جولداۋىندا قوعامداعى ەڭ ماڭىزدى ءارى وزەكتى ماسەلەلەر تۇگەل قامتىلعان.
ءتۇرلى ساناتتاعى ازاماتتاردىڭ پىكىرلەرىنەن پرەزيدەنتتىڭ العاشقى جولداۋى جوعارى ءبىلىم جۇيەسى وكىلدەرىنىڭ عانا ەمەس, جاستار اراسىندا دا زور قىزىعۋشىلىق تۋدىرعانىن اڭعارىلدى. ءسوز سويلەۋشىلەر جولداۋعا دەگەن قىزىعۋشىلىعىن ونداعى ايتىلعان ستراتەگيالىق, ەكونوميكالىق, ساياسي دامۋ ۆەكتورلارىمەن قاتار, ورتالىق پەن وڭىرلەردە جينالىپ قالعان كوكەيتەستى پروبلەمالارعا ەرەكشە كوڭىل بولىنۋىمەن ءتۇسىندىردى.
«تۇركىستان وبلىسىنىڭ جاستارى مەملەكەت باسشىسىنىڭ جولداۋىنداعى الەۋمەتتىك جانە ساياسي باستامالاردى قىزىعۋشىلىقپەن قابىلدادى جانە وسى باعىتتاعى جۇمىستاردى جۇزەگە اسىرۋعا اتسالىسادى. جولداۋدى تالقىلاپ قانا قويماي, ناقتى ىسكە كوشۋ كەرەك», دەيدى جيىنعا قاتىسۋشىلار.
باسقوسۋدا دەموگرافيا, الەۋمەتتىك كومەك, ساياسي ليبەراليزاتسيا, ادام كاپيتالىن دامىتۋ, قازاق حالقىن كاسىپكەرلىككە بەيىمدەۋ جانە وزگە دە ماسەلەلەر ءسوز بولدى.
تۇركىستاندا قازاقستان رەسپۋبليكاسى پرەزيدەنتى جولداۋىنىڭ ورىندالۋىن قوعامدىق باقىلاۋدىڭ تەتىكتەرى ءتيىمدى دامۋدا. ازاماتتار مەن وڭىرلىك بيلىك ورگاندارىنىڭ بىرلەسكەن باستاماسى بويىنشا ازاماتتاردىڭ شاعىمدارى مەن وتىنىشتەرىن قاراستىراتىن جانە جاۋاپ بەرەتىن قۇرىلىم قۇرىلعان.
