ەگىن وراعى اپتالاپ جاۋعان اق جاۋىننىڭ سالدارىنان مەجەلەگەن ۋاقىتتان الدەقايدا كەش باستالدى. بيىلعى ناۋقاندىق جۇمىستارعا 8,4 مىڭ استىق كومبايندارى قاتىسۋدا. ونىڭ 3518-ءى قازىرگى زامانعى ونىمدىلىگى جوعارى كومبايندار. وسى ارادا اۋىل شارۋاشىلىعى قۇرىلىمدارى ماشينا-تراكتور پاركىن جاڭعىرتۋ جاعدايى ءالى دە ءماز ەمەس ەكەندىگىن ەكپىن ءتۇسىرىپ ايتقان ءجون. ۇستىمىزدەگى جىلى نەبارى 114 جاڭا استىق جينايتىن كومباين, 254 تراكتور ساتىلىپ الىندى. بۇل نەگىزىنەن ءىرى قۇرىلىمدارعا تيەسىلى. ال, شاعىن شارۋاشىلىقتار ءالى دە كەشەگى كەڭەس زامانىنان قالعان قاۋساعان تەحنيكانى اۋپىرىمدەپ پايدالانىپ ءجۇر.
وراق جۇمىسىن 26 جۇمىس كۇنىندە اياقتاپ شىعۋ جوسپارلانعان بولاتىن. ەندى جەردە ونگەن جەردە قالماس ءۇشىن ەكى اۋىسىمدىق جۇمىستى ۇيىمداستىرۋ كەرەك.
وبلىس بويىنشا كۇزگى دالا جۇمىستارىنا 72 مىڭ توننا كەپىلدەندىرىلگەن ديزەل وتىنى, 3,8 مىڭ توننا ديزەل مايى, 7,1 مىڭ توننا بەنزين بولىنگەن بولاتىن. بۇگىنگى تاڭدا وسى كولەمنىڭ 52,1 مىڭ توننا ديزەل وتىنى تاسىمالداندى. 69 استىق قابىلداۋ كاسىپورنى قاۋىرت جۇمىس ىستەۋدە. بۇل كاسىپورىندار 4,6 ميلليون توننا استىق ساقتاي الادى. سونداي-اق, اۋىل شارۋاشىلىعى قۇرىلىمدارىندا 2 ميلليون توننا استىق ساقتايتىن قويمالار, 230 استىق كەپتىرگىش بار. مامانداردىڭ 3 ميلليون تونناعا جۋىق ىلعالدى استىق تۇسەدى دەپ وتىر. استىقتىڭ شامادان تىس ىلعالدى بولۋى ديقاندار ءۇشىن قاۋىپ.
ەسىل اۋداندىق اۋىل شارۋاشىلىعى ءبولىمىنىڭ باس مامانى قايرات احمەتجانوۆتىڭ ايتۋىنشا, كۇنى بۇگىنگە دەيىن 115,5 مىڭ گەكتار القاپتىڭ ەگىنى ورىلىپ, 88,2 مىڭ توننا استىق باستىرىلعان. گەكتار بەرەكەسى 10,6 تسەنتنەردەن اينالۋدا.
–وپەراتور بولىپ سانالاتىن «پەترو كz» كاسىپورنى ءوز مىندەتتەمەسىن ورىنداماي وتىر,–دەيدى باس مامان,– سونىڭ سالدارىنان بۇگىنگى تاڭدا تەك قانا 4 مىڭ 119 توننا سۇيىق وتىن تاسىمالدانىپ الىندى.
ارقا توسىندەگى اقىق ءدان جولىنداعى جورىق جاڭا عانا جاندانا باستادى. الا جازداي الاوكپە بولعان ديقانداردىڭ ءۇمىتى اقتالسا يگى.
