بايقاۋ الماتى ماڭىنداعى «سپۋتنيك» دەمالىس ورنىندا قازاق سوقىرلار قوعامىنىڭ قارجىلاي ءارى زاعيپ جانە ناشار كورەتىن ازاماتتارعا ارنالعان رەسپۋبليكالىق كىتاپحاناسىنىڭ قولداۋىمەن سادىق كارىمباەۆتىڭ تۋعانىنا 100, جاقسىگەلدى سەيىلوۆتىڭ تۋعانىنا 70 جىل تولۋىنا وراي وتكىزىلىپ وتىر.
وسى ورايدا شىعارماشىل تۇلعالاردىڭ ومىرىنە قاتىستى قىسقاشا مالىمەتتى ۇسىنا كەتپەكپىز: سادىق كارىمباەۆ (1918-1975) – كومپوزيتور, مۋزىكانت-ءانشى, اقىن-جىراۋلار ءومىرىن زەرتتەۋشى, قازاق سسر-ءنىڭ ەڭبەك سىڭىرگەن ءارتىسى (1974). زاعيپتىعىنا قاراماستان, ول ءبىرجان-سال, اقان-سەرى, جاياۋ مۇسا, مايرا, ەستاي سياقتى اقىن-جىراۋلاردىڭ شىعارماشىلىعىن زەرتتەپ, جۇرتشىلىققا ناسيحاتتاعان. س. كارىمباەۆتىڭ شىعارمالارىن قازاقستاننىڭ حالىق ارتىستەرى – ر. باعلانوۆا, ب. تولەگەنوۆا, ج. ەلەبەكوۆ, ر. قويشىباەۆا جانە باسقا دا ارتىستەر وزدەرىنىڭ رەپەرتۋارىنا ەنگىزىپ, ورىنداعان.
جاقسىكەلدى سەيىلوۆ (1949-1997 جىلى), زاعيپ ءانشى-كومپوزيتور, قازاقستان رەسپۋبليكاسىنىڭ ەڭبەك سىڭىرگەن مادەنيەت قىزمەتكەرى (1990). ايگىلى «دوس-مۇقاسان», «گۇلدەر» انسامبلدەرىنىڭ ىزىمەن «قاراقوز» ۆوكال-اسپاپتى ءانسامبلى دۇنيەگە كەلەدى. ونىڭ نەگىزىن قالاۋشى ءارى جەتەكشىسى جاقسىگەلدى سەيىلوۆ بولدى. ونىڭ «نەگە سولاي؟», «اينالايىن قاناتىم», «جەزكيىك», «كەزدەسۋ» جانە باسقا دا اندەرى كۇنى بۇگىنگە دەيىن ءان سۇيەر قاۋىمنىڭ جۇرەگىن جاۋلاپ كەلەدى.
بايقاۋعا قاتىسۋشىلار مەن قازاق سوقىرلار قوعامىنىڭ ارداگەرلەرى دەمالىس ۇيىنە رەسپۋبليكامىزدان بارلىق قالالارىنان جينالىپ, جەرەبە تاستاۋ راسىمىنە قاتىستى.
بۇگىندە قازاق سوقىر قوعامى قوعام مۇشەلەرى اراسىندا سپورت, ءان ونەرى, پوەزيا جانە ت.ب. بويىنشا تۇراقتى تۇردە رەسپۋبليكالىق, حالىقارالىق سايىستاردى وتكىزۋدى قايتا جانداندىرىپ كەلەدى. وسىعان وراي سوڭعى ەكى-ءۇش جىلدان بەرگى ارالىقتا المات ناۋرىزباەۆ باسشىلىعىمەن قازاق سوقىرلار قوعامى تاراپىنان مادەني, وڭالتۋ, سپورت شارالارى ءجيى وتكىزىلەتىن بولدى. وتكەن جىلى قوعام مۇشەلەرى پوەزيا جانكۇيەرلەرىنىڭ رەسپۋبليكالىق سايىسىن وتكىزسە, بيىلعى بايقاۋ ۇلكەن يگى شارانىڭ جالعاسىنداي.
بايقاۋعا قاتىسۋشىلار تالاپ بويىنشا ەكى ءان, ياعني ءبىر ءان اتالعان كومپوزيتورلاردىڭ شىعارمالارىنان, ەكىنشى ءان ءوز قالاۋلارى بويىنشا ورىندالادى. جەڭىمپازدار اقشالاي سىيلىقپەن ماراپاتتالادى. بايقاۋعا قاتىسۋدىڭ شىعىندارى قازاق سوقىرلار قوعامى تاراپىنان جابىلادى.
