قازاقستان-رەسەي شەكاراسى ماڭىنداعى تۇرعىنداردىڭ مەملەكەتتىك شەكارانى كەسىپ ءوتۋ ءتارتىبى تۋرالى زاڭ جوباسى قارالدى

حاتتاما 2018 جىلعى 9 قاراشادا پەتروپاۆل قالاسىندا جاسالعان بولاتىن. قولدانىستاعى كەلىسىمگە سايكەس شەكارانى كەسىپ ءوتۋ كەزىندە قازاقستان رەسپۋبليكاسى ازاماتتارىنىڭ وزىمەن بىرگە جەكە كۋالىگى نەمەسە تولقۇجاتى، سونداي-اق ازاماتتاردى تىركەۋ كىتابىنان كوشىرمە بولۋى قاجەت. 2011 جىلدان باستاپ قازاقستاندا ازاماتتاردى تىركەۋدى ەسەپكە الۋ كىتابى الىپ تاستالدى. وسىعان بايلانىستى حاتتامانىڭ 1-بابىمەن وزگەرىستەر ەنگىزىلەدى، وعان سايكەس جەكە كۋالىككە (تولقۇجاتقا) شەكارا ماڭىنداعى اۋماقتىڭ ەلدى مەكەنىندە تۇراقتى تۇرعىلىقتى جەرى بويىنشا تىركەلگەنىن راستايتىن، ۋاكىلەتتى مەملەكەتتىك ورگان بەرگەن قۇجات (مەكەنجاي انىقتاماسى) قوسا بەرىلۋى ءتيىس.

حاتتامانى قابىلداۋ رەسەي فەدەراتسياسىمەن شەكارالاس اۋماقتاردا تۇراتىن قازاقستان رەسپۋبليكاسى ازاماتتارىنىڭ مەملەكەتتىك شەكارانى كەسىپ ءوتۋ پروتسەسىن رەتكە كەلتىرەدى جانە ەكى ەلدىڭ اراسىنداعى شارۋاشىلىق، مادەني جانە باسقا ءداستۇرلى بايلانىستاردى ساقتاۋعا جانە ودان ءارى دامىتۋعا جاردەمدەسەتىن بولادى.

كوميتەت توراعاسى مۇحتار قۇل-مۇحاممەد مەملەكەتتىك شەكارادان ءوتۋ كەزىندە ازاماتتار تاپ بولاتىن ىڭعايسىزدىقتار مەن اۆتوكولىك كەپتەلىسىنە قاتىستى بىرقاتار ماسەلەلەردى كوتەردى. داريعا نۇرسۇلتانقىزىنىڭ باسشىلىعىمەن وتكەن كوميتەتتىڭ كوشپەلى وتىرىستارى اياسىندا قازاقستان مەن رەسەي شەكاراسىنداعى وتكىزۋ بەكەتتەرىندەگى ينفراقۇرىلىمدى دامىتۋ ماسەلەلەرىنە ەرەكشە نازار اۋدارىلعانى اتالىپ ءوتىلدى.

شەكارا قىزمەتىنىڭ ديرەكتورى دارحان ءدىلمانوۆتىڭ اقپاراتىنا سايكەس مەملەكەتتىك شەكارانىڭ قازاقستان مەن رەسەي ۋچاسكەسىندە شەكارا ماڭىنداعى قاجەتتى ينفراقۇرىلىمدى جاساۋ  جونىندەگى جول كارتاسى قابىلدانىپ، جاقىن كۇندەرى رەسەيلىك تاراپپەن ەكىجاقتى قۇجاتتارعا قول قويىلعاننان كەيىن قالىپتاسىپ وتىرعان جاعداي جاقسارا تۇسپەك.

سەناتور نۇرجان نۇرسيپاتوۆ حاتتامانى قابىلداۋ شەكارا ماڭىنداعى اۋماقتاردىڭ تۇرعىندارىنا قازاقستان مەن رەسەيدىڭ مەملەكەتتىك شەكاراسىنان ءوتۋدى جەڭىلدەتىپ، ەكى ەل اراسىنداعى ىنتىماقتاستىقتىڭ ودان ءارى دامۋىنا ىقپال ەتەتىنىن اتاپ ءوتتى.

قۇجات پالاتا قاراۋىنا ەنگىزىلدى.