ايماقتار • 17 قىركۇيەك، 2019

جاستاردى جۇمىس ىستەۋگە جىگەرلەندىرەدى

25 رەتكورسەتىلدى

ەكى قولعا ءبىر كۇرەك تاپپاي وتىرعان اۋىل جاستارىنا بەلسەندى بەرەكەلى جۇمىسپەن اينالىسۋعا مۇمكىندىك بار. بۇل جايىندا وڭىرلىك كاسىپكەرلەر پالاتاسىنىڭ جەرگىلىكتى جەردە شاعىن جانە ورتا بيزنەستى دامىتۋ ماسەلەلەرىنە ارنالعان قوعامدىق تىڭداۋ بارىسىندا جان-جاقتى ايتىلدى.

ەل ەڭسەسىن كوتەرۋگە باعىت­تالعان يگى قادامنىڭ قىر-سى­رى تالقىلانعان شاراعا «باس­تاۋ» باعدارلاماسى ارقىلى وقى­­عان ازاماتتار مەن قارجى ينس­تيتۋتتارىنىڭ وكىلدەرى قا­تىستى. ءسوز اراسىندا 2017-2021 جىلدارعا ارنالعان «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ» مەم­لەكەتتىك باعدارلاماسى جۇيەلى جۇمىس ىستەپ جاتقانىن ايتا كەتكەنىمىز ارتىق بولماس. بۇل باعدارلاما ىنتاسى بار ازا­ماتتارعا كاسىپكەرلىكتى ۇي­رەتىپ، حالىقتى جۇمىسپەن قام­تۋعا سەپتىگىن تيگىزۋدە. ماسەلەن، اۋىل­داعى بيزنەستى دامىتۋعا ار­نالعان سۋبسيديالار مەن جىلدىق ۇستەمەسى 5-7 پايىز­دىق جەڭىلدەتىلگەن نەسيەلەر بەرىلۋدە.

– باعدارلاما اياسىندا جىل سايىن ەكى مىڭعا جۋىق جۇمىسسىز جانە ءوزىن ءوزى جۇمىسپەن قامتىعان ادامدارمەن جۇمىس جۇرگىزەمىز، – دەيدى وبلىستىق كاسىپكەرلەر پالا­تاسىنىڭ ديرەكتورى تي­مۋر ناقىپبەكوۆ، – ارينە ادام­­دار­دىڭ ءبارى بىردەي ەمەس، كاسىپ­پەن اينالىسۋعا يكەمدىلەرى دە، ىڭعايى جوقتارى دا بار. ءبىر باي­قاعانىمىز، ۇمتىلعانداردىڭ كەيبىرەۋى كا­سىپ­كەر بولا الماسا دا، جاقسى مامان بولۋى ابدەن مۇمكىن.

وتكەن جىلى كاسىپكەرلەر پا­لاتاسىنىڭ «باستاۋ» باعدارلا­ماسى اياسىندا 2070 ادام بيزنەس نەگىزدەرىن وقىسا، ولاردىڭ مىڭ جارىمى ارنايى بيزنەس جوبالارىن قورعاپ شىققان. 579 ادام قازىرگى كۇنى وزدەرىنىڭ جەكە كاسىبىن دوڭگەلەتىپ وتىر. دەمەك، وسىنشاما ادامنىڭ ومىردەن ءوز ورنىن تابۋعا سەپتىگى تيگەن.

بيىل بۇل باعدارلامانى جۇزەگە اسىرۋعا رەسپۋبليكالىق بيۋدجەتتەن 3 ميلليارد 630 ميلليون تەڭگە قارجى قاراستىرىلىپ وتىر. بۇل قارجى نەسيەلىك وپەرا­تورلارعا ۇلەستىرىلدى، 6 پايىز ۇستەمەمەن بەس جىلعا بەرىلەدى. شىن مانىندە اۋىل ءۇشىن كوپ-كورىم كومەك ەمەس پە؟ قاراجات كاسىپكەرلىكتى دا­مىتۋعا، اۋىل شارۋاشىلىعىنا قاجەتتى تەحنيكالار ساتىپ الۋعا جۇمسالادى. قازىرگى كۇنى جاقسىلىق حاباردان قۇلاقتانعان اۋىل ادامدارى تىرمىسىپ-اق جاتىر.

– وتكەن جىلى 957 ادام شا­عىن نەسيە الىپ جۇمىس ىس­تەۋدە، – دەيدى وبلىستىق اۋىل شا­رۋاشىلىعى باسقارماسىنىڭ ءبولىم باسشىسى سەرىك شايگوزوۆ، – ونىڭ ۇستىنە ءبىر مىڭنان استام جاڭا جۇمىس ورىندارى اشىلىپ وتىر. باعدارلامانى ءتيىمدى پايدالانساق، شاعىن اۋىلداردىڭ شىرايى كىرىپ قالار ەدى.

جاستار جىلىنا وراي 18 بەن 29 جاس ارالىعىنداعى جاستار ءۇشىن «جاس كاسىپكەر» اتتى جاڭا جوبا قولعا الىنۋدا. بۇل رەتتە ىنتالى جاستارعا بيزنەس نەگىزدەرى بويىنشا وقۋ باعدارلامالارى ۇسىنىلادى. كەيىن جوباعا قا­تىسۋشىلارعا جەكە كاسىبىن اشىپ جۇرگىزۋ ءۇشىن بيزنەس ترەنەرلەر جول سىلتەپ، جەتەكشىلىك ەتەتىن بو­­لادى. الداعى ۋاقىتتا 1270 ادامدى وقىتۋ مەجەلەنىپ وتىر.

اتالعان شارا بارىسىندا قاتىسۋشىلار مەملەكەتتىك قول­داۋ تەتىگىن ەگجەي-تەگجەيلى اڭ­گى­مەلەپ، ءتۇسىنىپ، ءتۇيسىندى. شال­عاي­داعى شاعىن اۋىلداردا قول­داۋعا ءزارۋ جاس تولقىن وسىنداي جا­ڭالىقتاردى ەستىسە، ىنتالانىپ العا ۇمتىلسا، اۋىل اجارى بۇ­گىنگىدەن دە كوركەيە تۇسەر ەدى.

 

اقمولا وبلىسى   

 

سوڭعى جاڭالىقتار

تەرمينگە ساۋاتتىلىق كەرەك

قوعام • بۇگىن، 15:33

ۇقساس جاڭالىقتار