پرەزيدەنت قاسىم-جومارت توقاەۆ قازاقستان حالقىنا ارناعان جولداۋىندا ۇكىمەتتىڭ الداعى ۋاقىتتا كۇش-جىگەرى باعىتتالاتىن بەس نەگىزگى سالانى اتاپ ءوتتى. ماڭىزدى سالالاردىڭ ءبىرى – مەملەكەتتىك قۇرىلىس. قازىرگى زامانعى ءتيىمدى قازاقستان مەملەكەتىن دامىتۋ ەلدىڭ قوعامدىق-ساياسي ءومىرىن جاڭعىرتۋسىز مۇمكىن ەمەس.
ءتيىمدى مەملەكەتتىڭ نەگىزى – مەملەكەت پەن حالىق اراسىنداعى سەنىمدى قارىم-قاتىناس. «ەستيتىن مەملەكەت» تۇجىرىمداماسى – حالىق تاراپىنان ارەكەت ەتەتىن بيلىككە دەگەن سەنىمدى ورناتۋ مەن نىعايتۋعا نەگىزگى ەكپىن جاسالاتىن باستى ستراتەگيالىق ەلەمەنت. ال جاقىندا قۇرىلعان ۇلتتىق قوعامدىق سەنىم كەڭەسى ءتيىمدى سۇحبات الاڭىنا اينالادى, وندا ازاماتتىق قوعام اسا وتكىر جانە وزەكتى جالپى مەملەكەتتىك ماسەلەلەر بويىنشا ءوز پىكىرىن بىلدىرەدى.
«كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» – قازىرگى زامانعى ءتيىمدى قازاقستان مەملەكەتىن وركەندەتۋدىڭ نەگىزگى فورمۋلاسى. ونى ىسكە اسىرۋ ءۇشىن پارتيالىق قۇرىلىس ۇدەرىسىن جالعاستىرۋ, حالىقپەن ءتيىمدى كەرى بايلانىس ورناتۋ, ميتينگىلەر تۋرالى زاڭنامانى جەتىلدىرۋ, قوعامدىق كەلىسىمدى نىعايتۋ قاجەت.
ازاماتتاردىڭ قۇقىقتارى مەن قاۋىپسىزدىگىن قامتاماسىز ەتۋ – سالاماتتى قوعام قۇرۋ ءۇشىن ماڭىزدى شارت. وسى ماقساتتا سوت جانە قۇقىق قورعاۋ جۇيەلەرىنە تەرەڭ رەفورمالار جۇرگىزىلەدى. سونداي-اق بۇل قارۋلى كۇشتەر جۇيەسىنە دە قاتىستى. قوعامدا كەڭ تالقىلاۋلارعا نەگىز بولعان قايعىلى وقيعالار مۇنداي رەفورمالار قاجەت ەكەنىن دالەلدەيدى.
جولداۋدا الەۋمەتتىك-ەكونوميكالىق جوسپار ماسەلەلەرىنىڭ كەشەنى وتە اۋقىمدى. مەملەكەت باسشىسى ەكونوميكانى ودان ءارى ارتاراپتاندىرۋعا جانە شيكىزاتتىق باعىتتان اۋىتقۋعا, اگروونەركاسىپتىك سەكتوردى دامىتۋعا, قارجىلىق جانە سالىقتىق رەتتەۋگە, شاعىن جانە ورتا بيزنەستى دامىتۋعا, ۇلتتىق قور رەسۋرستارىن ءتيىمدى باسقارۋ مەن پايدالانۋعا قاتىستى ت.ب. سەگىز وزەكتى ەكونوميكالىق ماسەلەنى اتاپ ءوتتى.
قازاقستاندىق شاعىن جانە ورتا كاسىپتىڭ دامۋىن ىنتالاندىرۋ جانە ءوسۋىن بەلسەندى ەتۋ ءۇشىن ماڭىزدىسى – پرەزيدەنتتىڭ شوب كومپانيالارىن ءۇش جىل مەرزىمگە تابىس سالىعىن تولەۋدەن بوساتۋ تۋرالى, سونداي-اق شاعىن جانە ورتا بيزنەستى تەكسەرۋگە ءۇش جىل تىيىم سالۋ تۋرالى شەشىمى. ارينە, بۇل شەشىمدى جۇزەگە اسىرۋ شوب-تى دامىتۋعا جاڭا سەرپىن بەرەدى. سونىمەن قاتار قاسىم-جومارت توقاەۆ اتاپ وتكەندەي, بيزنەس تۇتىنۋشىلار مەن ازاماتتار الدىندا جاۋاپتى بولۋى ءتيىس. وعان ءوزىن ءوزى رەتتەۋ جانە قوعامدىق باقىلاۋ قۇرالدارى كومەكتەسەدى. بيزنەستى دامىتۋدى قولداۋعا ۇلتتىق قوردان 100 ملرد تەڭگە بولىنەدى.
سۇراقتاردىڭ الەۋمەتتىك بلوگى ءبىلىم بەرۋ سالاسىنداعى ماسەلەلەردى شەشۋگە, وتباسى مەن بالا ينستيتۋتىن قولداۋعا, ينكليۋزيۆتى قوعام قۇرۋعا, مەديتسينالىق قىزمەتتەردىڭ ساپاسى مەن قولجەتىمدىلىگىن قامتاماسىز ەتۋگە, مادەنيەت قىزمەتكەرلەرىن قولداۋعا جانە الەۋمەتتىك قولداۋ جۇيەسىن ودان ءارى دامىتۋ ماسەلەسىنە قاتىستى بولدى.
مۇمكىندىگى شەكتەۋلى ادامداردى قوعامنىڭ تولىققاندى ومىرىنە تارتۋ – ينكليۋزيۆتى قوعام قۇرۋدىڭ باستى مىندەتى. بۇل ماقساتقا ءۇش جىل ىشىندە 58 ملرد تەڭگە بولىنەدى.
زەينەتاقى جۇيەسىن دامىتۋ جانە زەينەتاقى اكتيۆتەرىن ءتيىمدى باسقارۋ ماسەلەسى دە وڭاي ەمەس. جۇمىس ىستەيتىن ازاماتتاردىڭ وزدەرىنىڭ زەينەتاقى جيناقتارىنىڭ ءبىر بولىگىن ماقساتتى پايدالانۋ مۇمكىندىگى قوعامدا بىرنەشە رەت تالقىلاندى. ۇكىمەتكە ماقساتتى پايدالانۋ ماسەلەسىن پىسىقتاۋ تاپسىرماسى حالىقتىڭ كوپشىلىگى ءۇشىن ماڭىزدى.
وڭىرلىك دامۋدا بارلىق دەڭگەيلەردە بيۋدجەت ۇدەرىسىن ۇيىمداستىرۋ قايتا قارالادى, بۇل جەرگىلىكتى بيلىك ورگاندارىنا حالىقپەن بىرلەسىپ ماسەلەلەردى شەشۋدە ەكونوميكالىق نەعۇرلىم ەركىن بولۋعا مۇمكىندىك بەرەدى. كوشى-قون ۇدەرىستەرىن رەتتەۋ, ءىرى قالالار اكىمدەرىنىڭ قۇزىرەتىن كەڭەيتۋ جونىندەگى شارالار باسقارۋدىڭ تيىمدىلىگىن ارتتىرۋى ءتيىس.
اسەل ابەن,
پرەزيدەنت جانىنداعى قسزي-ءدىڭ الماتى قالاسىنداعى وكىلدىگىنىڭ باسشىسى, ەكونوميكا عىلىمدارىنىڭ كانديداتى
