قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقاەۆقا!
اسا مارتەبەلى پرەزيدەنت مىرزا!
2019 جىلعى 2 قىركۇيەكتە قازاقستان حالقىنا ارناعان العاشقى جولداۋىڭىزدا ەلىمىزدەگى ءبىلىم بەرۋ ساپاسىنا ەرەكشە توقتالىپ وتكەنىڭىز ەلدەگى ۇستازدار قاۋىمىن ءدۇر سىلكىندىردى. ءبىلىم بەرۋ ساپاسىن جاقسارتۋ دەپ اتاپ, سونىڭ ىشىندە ماماندار دايارلاۋ ىسىنەن باستاپ, وقۋلىق ساپاسىنا دەيىنگى, ءبىلىم بەرۋ جۇيەسىندە قوردالانىپ, شەشىمىن تابۋدى تالاپ ەتىپ تۇرعان ماسەلەلەردىڭ بارىنە دەرلىك توقتالدىڭىز.
ءبىلىم سالاسىنا دەگەن ەرەكشە كوڭىلىڭىز بەن قامقورلىعىڭىز تامىز كونفەرەنتسياسىنا قاتىسىپ, باستامالار مەن تاپسىرمالارىڭىزدان كورىنىپ ەدى, ەندى ءسىزدىڭ جولداۋىڭىزدا ءبىلىم ماسەلەلەرىنىڭ جاڭا قىرلارى اشىلدى.
اتاپ ايتقاندا, ەلىمىزدە ساپالى ءبىلىم الۋدى قامتاماسىز ەتۋمەن قاتار جاستاردىڭ بولاشاق ماماندىقتارىن دۇرىس تاڭداي ءبىلۋىنىڭ ماڭىزدىلىعىن ايتتىڭىز. شىنىندا دا, وقۋشىلاردىڭ قابىلەتىن ايقىنداپ, كاسىبي باعدار بەرۋ ساياساتىنا كوشۋ – قازىرگى تاڭدا مەكتەپ جاسىنداعى بالالاردى بولاشاقتا باسەكەگە قابىلەتتى حالىقارالىق دەڭگەيدە جۇمىس ىستەي الاتىن بىلىكتى مامان ەتىپ تاربيەلەۋدىڭ العىشارتى. كاسىپتىك باعىت-باعدار بەرۋ ساياساتى – كەزەك كۇتتىرمەيتىن, جىلدامداتىپ قولعا الىنۋى ءتيىس شارۋا. قازىرگى تاڭدا جوو العاشقى كۋرس ستۋدەنتتەرىنىڭ 70 پايىزىنا جۋىعى ءوز ماماندىعىن دۇرىس انىقتاپ الماي كەلگەنى بەلگىلى بولىپ وتىر. سونىڭ سالدارىنان, ديپلومى بار جۇمىسسىزدار قاتارى مولايىپ, جوعارى ءبىلىم بەرۋ سالاسىندا ناتيجەلىلىك تومەندەپ كەتكەنى قىنجىلتادى. ءتىپتى كوپتەگەن ستۋدەنت العاشقى سەمەسترلەردەن كەيىن-اق ءوز ەركىمەن وقۋدان شىعىپ كەتىپ جاتادى. بۇل جوعارى ءبىلىم سالاسىنا بولىنەتىن مەملەكەت قارجىسىنىڭ ءتيىمسىز جۇمسالۋىنا دا الىپ كەلەدى. سوندىقتان ءسىز باستاما كوتەرىپ وتىرعان كاسىپتىك باعىت-باعدار بەرۋ ساياساتى – ەلىمىزدەگى جوعارى ءبىلىم بەرۋ سالاسىن جانداندىرىپ, جوو تۇلەكتەرىنىڭ ەل مۇددەسىنە قىزمەت ەتەتىن ازامات بولىپ شىعۋىنا, مامان تاپشىلىعى سەزىلىپ وتىرعان سالالاردى شەتەلدەن شاقىرىلعان قىزمەتكەرلەر ەمەس, قازاقستان رەسپۋبليكاسىنىڭ ازاماتتارىمەن تولتىرۋعا مۇمكىندىك بەرىپ, سول ارقىلى ەلىمىزدىڭ عىلىمي, تەحنيكالىق, ينجەنەرلىك, ەكونوميكالىق الەۋەتىن ارتتىرۋعا جول اشپاق.
جولداۋدا اتاپ وتىلگەن ءبىلىم سالاسىنا قاتىستى باستامالار ءبىرىنسىز ءبىرى جۇزەگە اسپايتىنى بەلگىلى. سونىڭ ىشىندە قالا مەن اۋىل مەكتەپتەرى اراسىنداعى ءبىلىم ساپاسىنىڭ الشاقتاپ كەتكەنىنە باسا ءمان بەرگەنىڭىزدى ەرەكشە ايتقىمىز كەلەدى. اۋىل مەكتەپتەرىنىڭ نەگىزگى ماسەلەسى رەتىندە جوعارى بىلىكتى مۇعالىمدەردىڭ جەتىسپەۋىن اتاپ, ونى شەشۋدىڭ جولىن كورسەتىپ تۇرسىز. بۇل – اۋىل مەكتەپتەرىندەگى مۇعالىمدەردىڭ ءۇمىتىن ۇرلەپ, سەنىمىن ارتتىردى. «ديپلوممەن – اۋىلعا!» باعدارلاماسىن جۇزەگە اسىرۋعا 20 ملرد تەڭگە قاراجات ءبولىنۋىن شەگەلەپ ايتقانىڭىز اۋىل مەكتەپتەرىنە, اۋىلداعى وقۋشىلار مەن ۇستازدارعا دەگەن ءسىزدىڭ جەكە قامقورلىعىڭىز دەپ سەزىندىك. مەملەكەت تاراپىنان وسىنداي قولداۋدى كورىپ, سەزىپ وتىرعان ۇستازدار قاۋىمى ءبىلىم ساپاسىن ارتتىرۋ جولىندا ايانباي ەڭبەك ەتۋگە قۇلشىنا كىرىسەتىنى انىق.
ەل ىشىندەگى, اسىرەسە اۋىلدىق جەرلەردەگى ەرەكشە قابىلەتى بار, دارىندى بالالار ۇلكەن قالالارعا جەتە الماي, دارىنى مەن قابىلەتىن شىڭداۋعا قول جەتكىزە الماي جاتادى. وسى ورايدا از قامتىلعان جانە كوپ بالالى وتباسىلارعا قولداۋ كورسەتىپ, دارىندى بالالاردىڭ قابىلەتىن دامىتۋدىڭ جول كارتاسىن ازىرلەۋ باستاماڭىز كاسىپتىك باعىت-باعدار بەرۋ ساياساتىمەن ۇشتاستىرا جۇزەگە اسىرىلسا – قازاقستاننىڭ حالىقارالىق دەڭگەيدەگى باسەكەگە قابىلەتىن ارتتىرا تۇسەتىن يگى ءىس بولماق. وسى اتالعان باستامالار – ەلىمىزدەگى كاسىپتىك ءبىلىم بەرۋ سالاسىندا قىزمەت اتقارىپ وتىرعان ۇستازدار قاۋىمىنا دا ەرەكشە قۇلشىنىس بەرەدى, ويتكەنى مەملەكەتتىڭ قامقورلىعىن سەزىنە وتىرىپ, دارىندى وقۋشىلاردى تاربيەلەۋدە ەش كەدەرگىسىز جۇمىس ىستەي الۋ – ءار ۇستازدىڭ ارمانى.
وسى اتالعاننىڭ ءبارى قازاقستان رەسپۋبليكاسىنىڭ پرەزيدەنتى بولىپ سايلانعاننان كەيىنگى العاشقى جولداۋىڭىزدا كورسەتىلگەن ەڭ ماڭىزدى باستامالاردىڭ ءبىرى – جوعارى ءبىلىمنىڭ ساپاسىن ارتتىرۋعا ىقپال ەتەدى.
ءبىلىم بولىمدەرىن باسقارۋدى اۋداندىق دەڭگەيدەن وبلىستىق دەڭگەيگە وتكىزۋ ماسەلەسىنە توقتالعانىڭىز ءسىزدىڭ ەلىمىزدەگى ءبىلىم بەرۋ جۇيەسىنە نەمقۇرايلى قارامايتىن, تەك كوزگە كورىنىپ تۇرعان ماسەلەلەردى عانا ەمەس, ونىڭ سەبەبى مەن سالدارىن تەرەڭ ءبىلىپ, شەشۋ جولدارىن ىزدەستىرۋگە ەرەكشە مۇددە تانىتاتىن, ءبىلىم بەرۋ سالاسى ەل بولاشاعىنىڭ قاينار كوزى ەكەنىنە ايرىقشا ءمان بەرەتىن مەملەكەت باسشىسى ەكەنىڭىزدى كورسەتتى.
وقۋلىق ساپاسىن جاقسارتۋدى ايرىقشا اتاپ تاپسىرما بەرۋىڭىزدەن ءبىلىم بەرۋ ساپاسىنا بەيجاي قاراماي, ەل بولاشاعىن وسكەلەڭ ۇرپاقتىڭ تاعدىرىمەن بايلانىستىرا قاراستىراتىنىڭىزدى, جاس ۇرپاقتىڭ كەلەشەگى ۇنەمى ويىڭىزدىڭ ءبىر تۇكپىرىندە جۇرەتىنىن كورىپ, ۇستازدار مەن اتا-انالار قاۋىمى اسا ريزا بولدى.
قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ تاپسىرماسىمەن قولعا الىنا باستاعان ۇستازدار مارتەبەسى تۋرالى زاڭ قابىلدانۋىن قايتا قولعا الىپ, ءوز باقىلاۋىڭىزبەن جۇزەگە اسۋىنا دەن قويدىڭىز. وسى ماسەلەگە دەگەن ەرەكشە ىقىلاسىڭىزدى 2019 جىلعى 16 تامىزدا ۇستازداردىڭ تامىز ءماسليحاتىندا كورسەتتىڭىز. ەل تاۋەلسىزدىگى جىلدارى ۇزبەي وتكىزىلەتىن تامىز ءماسليحاتىنا العاش رەت مەملەكەت باسشىسى رەتىندە قاتىسۋىڭىز وسى ەلدەگى ەڭ ماڭىزدى تۇلعا مۇعالىم ەكەنىن باسا كورسەتىپ, ۇستازداردىڭ رۋحىن كوتەرىپ, جاڭا سەرپىن, تىڭ كۇشپەن جاڭا وقۋ جىلىن باستاۋىنا ايرىقشا شابىت بەردى.
اسا مارتەبەلى قاسىم-جومارت كەمەل ۇلى, ءسىزدىڭ جولداۋىڭىزدى تىڭداعان كەزدە قازاقتىڭ ۇلى حانى ابىلايدىڭ «بىلەككە سەنەر زاماندا ەشكىمگە دەس بەرمەدىك, بىلىمگە سەنەر زاماندا قاپى قالىپ جۇرمەيىك» دەگەن اماناتى وزىڭىزدەي مەملەكەت باسشىسى بار ەلدە ورىندالاتىنىنا سەنىمىمىز كۇشەيدى.
ۇستازدار وزىڭىزگە سەنەدى, پرەزيدەنت مىرزا! وسى باستامالاردى جۇزەگە اسىرۋ جولىندا ءسىز دە ەلدەگى ءار ۇستازعا سەنىم ارتىپ, ارقا سۇيەي الاسىز! ەل بولاشاعىن تاربيەلەۋ ىسىندە قازاقستانداعى ءار مۇعالىم ءسىز باستاعان جولمەن جۇرۋگە ءازىر.
قازاقستان رەسپۋبليكاسىنىڭ ءبىلىم ساراپشىلارى اتىنان
عاني بەيسەمباەۆ,
PhD دوكتورى
