كۇليپا ەسىمقىزى – ەلۋ جىلعا جۋىق ءوز شىعارماشىلىعىندا قازاقتىڭ دالاسىن, ونداعى تىلسىم دۇنيەنىڭ بولمىسىن شەبەر بەينەلەپ, ۇلتتىق مادەنيەت پەن ءداستۇرلى ونەردى دارىپتەپ كەلە جاتقان كاسىبي سۋرەتشى. ول ءاربىر تۋىندىسىن قازاق تاريحىنا, مادەنيەتىنە جانە كەڭەس داۋىرىندەگى كەڭ تاراعان بەيبىتشىلىك, دوستىق, ەڭبەك, ايەل باقىتى, تۋعان جەر سياقتى تاقىرىپتارعا بايلانىستىرا جازىپ, ومىرلىك وبرازعا باي, جان تازالىعىنان تۋعان شىعارمالارى ارقىلى كوپشىلىككە ەستەتيكالىق ءلاززات سىيلاۋدان جالىقپاي كەلەدى. بيىل اشىلىپ وتىرعان اۆتورلىق كورمەسىنە دە ول جاڭا تۋىندىلارىمەن بىرگە, جۇرت قىزىعۋشىلىعىن تۋدىرىپ, لايىقتى باعاسىن العان ىلگەرىرەكتەگى جۇمىستارىن دا ورنالاستىردى. ونىڭ العاشقى «باقىت» گوبەلەنى 1975 جىلدان ءا.قاستەەۆ اتىنداعى مەملەكەتتىك ونەر مۋزەيىنىڭ قورىنا الىنسا, «مامىر» گوبەلەنى اقش ەلشىلىگىندە ءىلۋلى, ال «قىزىلقۇم» تەكەمەتى مەملەكەتتىك ورتالىق مۋزەيدىڭ ءسانىن كىرگىزگەن قولونەر بۇيىمدارىنىڭ قاتارىندا ساقتاۋلى تۇر.
شىعارماشىلىق ىزدەنىستەن شارشامايتىن ك.جۇبانيازوۆانىڭ گوبەلەندەرى مەن كەسكىندەمەلەرىنىڭ استارىنداعى كوركەم پلاستيكالىق ىرعاقتا كورىنەتىن ۇلتتىق ءداستۇردىڭ سارىندارى تاماشالاعان ادامنىڭ جانىنا جاقىن ءارى تۇسىنىكتى. قازاقتىڭ كلاسسيكالىق قولونەر ناقىشتارى مەن زاماناۋي ونەردى شەبەرلىكپەن ۇيلەستىرە وتىرىپ, ەكەۋىن ءبىرتۇتاس ەتىپ قيىستىرعاننان جاڭا وبرازدار اشىلعان.
سۋرەتشى تۋىندىلارىنداعى تابيعات كورىنىستەرىنىڭ اشىق, قانىق ءتۇستى بوياۋلار پاليتراسىندا كورىنۋى ءومىردىڭ تاڭعاجايىپ جاڭارۋى, تۇلەگەن, تۇرلەنگەن الەمنىڭ سۇلۋلىعى سياقتى قابىلدانادى. «شەبەرلەر» كارتيناسى تۇرمىستىق جانردا ورىندالۋىمەن كوز تارتادى. قارت انا ءومىر بويى سەرىك ەتكەن ۇرشىق ءيىرۋ, الاشا, كيىز, تەكەمەت باسۋ ونەرىن ەكى ءجاسوسپىرىم نەمەرەسىنە ۇعىندىرىپ, اناسىنان قىزىنا ساباقتاسا جالعاسىپ كەلە جاتقان ەسكى ونەردى ۇمىتتىرماۋ ءۇشىن جادىنا ءسىڭىرىپ, جانىن سالا ۇيرەتىپ وتىرعانى بايقالادى. شاعىن تۋىندىداعى «ۇرپاقتار ساباقتاستىعى» دەگەن تاعىلىم اسەرلى بەينەلەنگەن.
شەبەردىڭ كورمەدەگى «قاسقاسۋ», «داستارقان», «باقتاعى ناتيۋرمورت», «ۇلتتىق رۋح», ء«ومىر جالعاسى», «انا ماحابباتى» سەكىلدى تۋىندىلارى شىمقاي قىزىل, التىن قۇم ىسپەتتى سارعىش, قانىق جاسىل تۇستەردىڭ باسىمدىعىمەن دالالىق ءداستۇردى, اۋىل ءومىرىنىڭ شىنايى كورىنىستەرىن بەرەدى. ۇلتتىق رۋحتىڭ قالىبى مەن قازاقى سالتتىڭ قاسيەتى سەزىلەدى.
كۇنى بۇگىنگە دەيىن نورۆەگيا, چەحيا, رۋمىنيا, بولگاريا, فرانتسيا, يتاليا, گەرمانيا, اقش, شۆەتسيا, اۋستراليا, گۆينەيا سىندى مەملەكەتتەردە وتكەن شىعارماشىلىق كورمەلەرگە سالماقتى تۋىندىلارىمەن قاتىسقان ك.جۇبانيازوۆا كاسىبي قولدانبالى ونەردىڭ ۇلتتىق دەڭگەيدە وركەندەۋىنە ءوز ۇلەسىن قوسىپ كەلەدى.
الماتى
