شىعىس قازاقستان وبلىسىنىڭ جاستارى «WORLDSKILLS SHYGYS-2019» كومانداسى رەتىندە جاساقتالىپ, كاسىپتىك شەبەرلىك ستاندارتتارىنىڭ اتالعان الەم چەمپيوناتىنا قاتىسىپ كەلدى. وسى جارىستان ورالعان جۇلدەگەرلەردى قارسى الۋ سەمەيدەگى ەلەكترتەحنيكا كوللەدجىندە ۇيىمداستىرىلدى. قاتىسۋشىلاردى قۇتتىقتاۋعا قالا اكىمىنىڭ ورىنباسارى ايدار سادىرباەۆ كەلىپ, قالا باسشىلىعى اتىنان جىلى لەبىزىن ارنادى.
– ءبىزدىڭ الدىمىزدا ەلىمىزدىڭ ۇزدىك شەبەرلەرى, تالانتتار تۇر, – دەدى ول. ولار ءوز كوللەدجدەرىمەن قاتار, قازاقستاننىڭ نامىسىن دا قورعاپ كەلدى. شىعىسقازاقستاندىق جاستاردىڭ دەڭگەيى جوعارى, ءبىلىمدى, بىلىكتى ەكەندىكتەرىن كورسەتتى. WorldSkills ستاندارتتارى بويىنشا «بولاشاق سەنىڭ قولىڭدا!» ۇرانىمەن وتكىزىلىپ وتىرعان چەمپيونات جۇمىسشى كاسىپتەردىڭ دامۋىنا قۋاتتى سەرپىن بەرەدى, ويتكەنى ول جاستاردىڭ سۇرانىسقا يە ماماندىقتارعا كوبىرەك نازارىن اۋدارادى.
– بۇگىن, مىنە, الەم بويىنشا وتكەن Worldskills چەمپيوناتىنا قاتىسۋشىلارعا قۇرمەت كورسەتىپ جاتىرمىز. ستۋدەنتتەر الدىمەن وبلىستىق, ودان كەيىن رەسپۋبليكالىق كونكۋرستاردا ۇزدىك اتاندى. ءسويتىپ, مىنە, رەسپۋبليكالىق چەمپيوناتتا باستى ورىنعا شىقسا, ال الەمدىك دەڭگەيدە بىرنەشە ستۋدەنتىمىز ءۇشىنشى ورىننان كورىندى. وبلىس بويىنشا 86 كوللەدج بار. وندا وتە ءبىلىمدى 35 مىڭ ستۋدەنت وقيدى. وسى جارىسقا قاتىسىپ كەلگەن بالالار وزگەلەرگە ۇلگى, – دەدى وبلىستىق ءبىلىم باسقارماسىنىڭ مامانى گۇلميرا ءىلياسوۆا.
قاتىسۋشىلار سەمەي ەلەكترتەحنيكا كوللەدجىنىڭ ۇجىمىنا, ءبىلىم باسقارماسى مەن قالا باسشىلىعىنا وسىنداي قۇرمەت كورسەتكەندەرى ءۇشىن ريزاشىلىقتارىن ءبىلدىردى.
– ءبىز قاتىسقان الەمدىك جارىس جاي عانا سايىس ەمەس, بۇل مامانداردى ساپالى دايىنداۋدىڭ جاڭا جولى, – دەدى قاتىسۋشىلاردىڭ ءبىرى الەكساندر بەتتسولد, – الەم چەمپيوناتىنا قاتىسقانداردىڭ ەڭبەگى ءوز الدىنا, ولاردى دايىنداعان ۇستازداردىڭ دا بىلىكتىلىگى كەرەمەت ەكەنىن ايتا كەتكەن ءجون.
چەمپيونات قورىتىندىسى بويىنشا قازاقستان جالپىكوماندالىق ەسەپتە 14-ءشى ورىنعا شىقتى. 2017 جىلى ءابۋ-دابيدە وتكەن الەم چەمپيوناتىندا 24-ءشى ورىنعا تابان تىرەگەن ەدى. ياعني وتكەن جىلدارمەن سالىستىرعاندا ۇلكەن ىلگەرىلەۋشىلىك بايقالادى.
– ءبىز بۇل جەتىستىكتەردى ءارى قاراي دا دامىتا بەرەمىز, – دەدى ەلەكترتەحنيكا كوللەدجىنىڭ ديرەكتورى ازات سارپەكوۆ. – ءبىز ءوز ستۋدەنتتەرىمىز ءۇشىن قۋانىشتىمىز. الدا وسىنداي كوپتەگەن چەمپيونات كۇتىپ تۇر. بولاشاقتا ءار اتالىم بويىنشا ءۇشىنشى ورىننان دا جوعارى كورسەتكىشتەرگە قول جەتكىزەمىز دەپ ويلايمىن. الەم چەمپيوناتىنىڭ بارلىق قاتىسۋشىلارىنا الداعى ۋاقىتتا ساتتىلىك, قىزىقتى كەزدەسۋلەر, جارقىن ەموتسيالار مەن ەستە قالارلىق اسەرلەر, ءارى قاراي دا كاسىبي ءوسۋ تىلەيمىز!
ايتا كەتۋ كەرەك, شىعىس پەن باتىستىڭ مادەني داستۇرلەرىنىڭ توعىسار ورنى, ءىرى حالىقارالىق ءىس-شارالاردىڭ ۇيىمداستىرۋشىسى قازان قالاسىنىڭ بۇكىل الەمنىڭ جاس ماماندارىن تارتۋ ورتالىعىنا اينالعانى وتە كەرەمەت بولدى. وبلىستىق ءبىلىم باسقارماسىنىڭ مامانى گ.ءىلياسوۆانىڭ پىكىرىنشە, قازىرگى WorldSkills Kazan چەمپيوناتى – WorldSkills قوزعالىسى تاريحىنداعى ەڭ اۋقىمدىسى. وعان الەمنىڭ 63 ەلىنەن 1 600 جاس مامان قاتىسقان. بايقاۋعا قاتىسۋشىلار ءتۇرلى سالانى قامتيتىن 56 باعىت بويىنشا سايىسقا تۇسكەن.
شىعىس قازاقستان وبلىسىنىڭ تەحنيكالىق جانە كاسىپتىك ءبىلىم بەرۋ جۇيەسى وقۋ ورىندارىنان 9 سالا بويىنشا 10 جاس مامان قاتىسىپتى. اتاپ ايتقاندا, ەلەكترونيكا, ەلەكتر-مونتاج جۇمىستارى بويىنشا وسكەمەن پوليتەحنيكا كوللەدجى, مەحاترونيكا, ۇشقىشسىز ۇشۋ اپپاراتتارىن باسقارۋ سەمەي ەلەكترتەحنيكا كوللەدجى, CAD ينجەنەرلىك گرافيكادان راديوتەحنيكا جانە بايلانىس كوللەدجى, شاشتاراز ونەرى, مەيرامحانا سەرۆيسىنەن بيزنەس جانە سەرۆيس كوللەدجى, اسپاز ءىسى بويىنشا وسكەمەن كوپسالالى تەحنولوگيا كوللەدجى, كىرپىش قالاۋدان سەمەيدەگى قۇرىلىس كوللەدجى. مىنە, وسى ارنايى وقۋ ورىندارىنىڭ ستۋدەنت جاستارى سايىسقا تۇسكەن.
سونىمەن چەمپيوناتتىڭ قورىتىندىسى بويىنشا 1 كۋرس ستۋدەنتى ءالي اسكەرحانوۆ «ەلەكترلى جانە ەلەكترمەحانيكالىق قۇرىلعىلاردىڭ تۇرلەرى بويىنشا «ۇشقىشسىز ۇشۋ اپپاراتتارىن باسقارۋ» سالاسىنان 3-ءشى ورىن العان. جەتەكشىلەرى ەلەكترتەحنيكا كوللەدجىنىڭ اقپاراتتىق تەحنولوگيالار بويىنشا ديرەكتورىنىڭ ورىنباسارى دانيار سمايىلوۆ پەن IT-ورتالىقتىڭ زەرتحاناشىسى نيكيتا لوبانوۆ.
الەكساندر بەتتسولد, يساجان رايىسوۆ «يادرولىق رەاكتورلار مەن ەنەرگەتيكالىق ورناتۋلار» ماماندىعى بويىنشا ەلەكترتەحنيكا كوللەدجىنىڭ تۇلەكتەرى, «مەحاترونيكا» سايىسىنا قاتىسۋشىلار. ولار «جوعارى شەبەرلىگى ءۇشىن» جانە «ەلدىڭ ۇزدىك وكىلى» اتتى اتالىمدار بويىنشا مەدالوندار يەلەنىپتى. جەتەكشىسى IT-ورتالىقتىڭ باسشىسى سامير كەريموۆ.
«WorldSkills» چەمپيوناتى – 82 ەل مەن ايماقتى بىرىكتىرەتىن جاھاندىق قوزعالىس. قوزعالىستىڭ ماقساتى – كاسىپتىك ءبىلىم بەرۋدىڭ ساپاسىن جاقسارتۋ جانە جۇمىسشى كاسىپتەردىڭ بەدەلىن ارتتىرۋ. 1950 جىلدان باستاپ چەمپيونات ءار ەكى جىل سايىن الەمنىڭ ءتۇرلى ەلىندە وتكىزىلىپ كەلەدى.
سەمەي
