قىزىلسۋات ورتا مەكتەبى وسىدان ەكى جىل بۇرىن اشىلعان. ىرگەلى اۋىلدا بالا سانى تەز ءوسىپ كەلەدى. اۋىلداعى قۇرىلىس قارقىنىنا قاراپ, مۇندا حالىق سانىنىڭ ارتىپ كەلە جاتقانىن بايقاۋعا بولادى. بۇگىن مۇنداعى مەرەكەلى كۇنگە قر اقپارات جانە قوعامدىق دامۋ ءمينيسترى داۋرەن اباەۆ پەن اقمولا وبلىسى اكىمىنىڭ ورىنباسارى مارات يعالي قاتىستى.
«قۇرمەتتى اتا-انالار مەن ۇستازدار! قۇرمەتتى وقۋشىلار! سىزدەردى بۇگىنگى ءبىلىم كۇنىمەن شىن جۇرەكتەن قۇتتىقتايمىن! ءبىلىم – بارىنەن ماڭىزدى. وقۋشىلارعا شىن جۇرەكتەن ءبىلىمدى بولۋدى تىلەيمىن. كەلەر ۇرپاققا – بۇلدىرشىندەرگە دەنساۋلىقتارىڭىز مىقتى بولسىن دەيمىن. دەنساۋلىقتارىڭىز مىقتى بولسا, ساپالى ءبىلىم الاسىزدار. ەگەمەندى ەلىمىزدىڭ تۇعىرىن سىزدەر الىپ جۇرەسىزدەر دەپ كامىل سەنەمىن. اتا-انالاردى بۇگىنگى قۋانىشپەن قۇتتىقتاي وتىرىپ, كۇش-جىگەر تىلەيمىن. بالالاردىڭ كۇندەلىكتى وقۋىن الىپ ءجۇرۋ وڭاي شارۋا ەمەس. ۇستازداردىڭ ەڭبەگى زور ەكەنىن ءبارىمىز بىلەمىز. بيىل «پەداگوگتار مارتەبەسى تۋرالى» زاڭ قابىلدانعالى جاتىر. ول زاڭناما جالاقىنى عانا ەمەس, ۇستازداردىڭ مارتەبەسىن وسىرەدى دەپ سەنەمىن», - دەدى داۋرەن اباەۆ.
مينيستر ءوز سوزىندە مەكتەپتەگى جىلدار ءالى كۇنگە دەيىن ەسىندە ەكەنىن اتاپ ءوتتى.
ء«بىلىم سىزدەردىڭ ومىرلەرىڭىزدە ۇلكەن ماڭىزعا يە بولارى انىق. ءالى كۇنگە دەيىن باستاۋىش سىنىپتا, جوعارى سىنىپتا دا سىنىپ جەتەكشىسى بولعان ۇستازدارىمدى ۇمىتپايمىن. باستاۋىش سىنىپتا ەركەحان داۋلەتقىزى, جوعارى سىنىپتا گۇلنار ابدىرازاققىزى ءبىزدىڭ سىنىپقا جەتەكشىلىك ەتتى. بۇگىن العان بىلىمدەرىڭىز سىزدەرگە عانا ەمەس, بۇكىل قازاقستان قوعامىنا پايداسىن تيگىزەرىنە سەنەمىن», - دەپ ءتۇيدى ءسوزىن د.اباەۆ.
مەكتەپتەگى سالتاناتتى جيىندا ءبىرىنشى سىنىپقا بارعان 37 بالا ورتاعا شىعىپ, تاقپاق وقىپ, كوپشىلىكتىڭ قۇرمەت-قوشەمەتىنە يە بولدى.
«مەكتەپ تولىعىمەن تەحنيكامەن, قاجەتتى جابدىقتارمەن جابدىقتالعان. بىزدە مۋلتيمەديالىق جانە اقپاراتتىق كابينەتتەر بار. بالالاردىڭ بارلىعى ءىت تەحنولوگيالارمەن وقىپ جاتىر. كابينەتتەردە مۋلتيمەديالىق تاقتالار بار. مۇعالىمدەر بالالاردى جاڭارتىلعان باعدارلامامەن وقىتۋدا», - دەدى ول.
ش. سۇيىندىكوۆا اتاپ وتكەندەي, مەكتەپ ۇجىمى قىزىلسۋات ورتا مەكتەبىنە اۆياتسيا گەنەرال-مايورى, كەڭەس وداعىنىڭ ەكى مارتە باتىرى, «بارىس» وردەنىنىڭ يەگەرى تالعات بيگەلدينوۆتىڭ ەسىمىن بەرۋ باستاماسىن كوتەرىپ جاتىر.
