بىلتىردان بەرى قاراي قازاقستان جازۋشىلار وداعىنىڭ تىكەلەي باستامالارىمەن قازاق ادەبيەتىن حالىقارالىق كەڭىستىككە شىعارۋ بويىنشا جوسپارلى جۇمىستار جۇزەگە اسىپ كەلەدى.
بىلتىردىڭ وزىندە نۇر-سۇلتان قالاسىنىڭ جيىرما جىلدىعىنا ارنالعان حالىقارالىق پوەزيا فەستيۆالى, ەۋرازيا جازۋشىلارىنىڭ فورۋمى, سونداي-اق بيىل تاريحتان بەلگىلى ۇلى جىبەك جولى بويىنداعى استانالار قالامگەرلەرىنىڭ فورۋمى ءوتتى. وعان 25 ەلدەن اقىن-جازۋشى قاتىستى. مۇنىڭ ءبارىن ءبىز نەگە ايتىپ وتىرمىز, اتالعان اۋقىمدى شارالاردىڭ بارلىعى الدا كەلە جاتقان تۇڭعىش حالىقارالىق ازيا قالامگەرلەرىنىڭ ءى فورۋمىنا دايىندىق ەسەبىندە بولدى دەسەك قاتەلەسپەيمىز.
ەل تاريحىنا ۇڭىلسەك, وسىدان تۋرا 46 جىل بۇرىن سوناۋ كەڭەس وكىمەتى تۇسىندا ازيا-افريكا جازۋشىلارىنىڭ 5-ءشى كونفەرەنتسياسى الماتى قالاسىندا وتكەن بولاتىن. بۇل فورۋمنىڭ ول فورۋمنان باستى ەرەكشەلىگى دە سول, وتكەن كەزەڭدە ول كونفەرەنتسياعا تەك قانا سوتسياليستىك-دەموكراتيالىق رەسپۋبليكالاردىڭ قالامگەرلەرى شاقىرىلعان بولاتىن.
بۇل جولعى جيىندا ونداي ساياسي شەكتەۋلەر مۇلدەم بولمايدى. ءبىز ازيانىڭ 44 مەملەكەتىنىڭ بارلىعىنا شاقىرتۋ جىبەردىك. سولاردىڭ ىشىنەن 38 مەملەكەتتەن 80-گە جۋىق قالامگەر ەلىمىزگە كەلىپ, فورۋمعا قاتىسۋعا ىقىلاس تانىتتى. ارينە شاقىرتۋىمىزعا ءۇن قاتپاعان ەلدەر دە بار, ولاردى اتاپ ايتۋعا دا بولادى. ايتالىق شىعىس تيمور, باحرەين, بۋتان, كامبودجا, مالديۆ سياقتى ەلدەردىڭ قالامگەرلەرىمەن وكىنىشكە قاراي, بايلانىس ورناتا المادىق.
جالپى, كەلەتىن قوناقتاردىڭ تىزىمىنە نوبەل سىيلىعىنىڭ لاۋرەاتتارىن دا قوسقان بولاتىنبىز. ولاردىڭ كەيبىرەۋلەرى ءىرى كولەمدە قالاماقى سۇرادى. ونداي قاراجات تولەۋگە ءبىزدىڭ جاعداي كوتەرمەيتىنىن جاسىرماۋىمىز كەرەك. الايدا نوبەل سىيلىعىنا نومينانت بەلگىلى 3 اقىن-جازۋشى اتالعان فورۋمعا قاتىسادى. ولاردىڭ ىشىندە وڭتۇستىككورەيالىق جازۋشى كو ىندى ەرەكشە اتاپ كەتۋگە بولادى. سونىمەن قاتار نوبەل نومينانتى, قاتار جازۋشىسى موزا ءال-مالكي دە فورۋمعا قۇرمەتتى قوناق رەتىندە شاقىرىلدى.
جالپى, وسىناۋ يگى ءىستىڭ شىمىلدىعىن ءتۇرىپ, شارانى اشىپ بەرۋگە مەملەكەت باسشىسى قاسىم-جومارت كەمەل ۇلى توقاەۆ قاتىسادى دەپ كۇتىلۋدە. دايىندىق جۇمىسىنا مەملەكەتتىك حاتشى مارات ءتاجين باستاعان, پرەمەر-ءمينيستردىڭ ورىنباسارى بەردىبەك ساپارباەۆ, سونداي-اق مادەنيەت جانە سپورت مينيسترلىگى, اقپارات جانە قوعامدىق دامۋ مينيسترلىگى, سىرتقى ىستەر مينيسترلىگى, ىشكى ىستەر مينيسترلىگى, سونداي-اق نۇر-سۇلتان قالاسىنىڭ اكىمدىگى جۇدىرىقشا جۇمىلىپ, شاراعا ءمان بەرىپ, قولۇشتارىن سوزىپ وتىر. فورۋم بارىسىندا ەلباسى نۇرسۇلتان نازارباەۆ ءبىر توپ شەتەلدىك قالامگەردى قابىلداۋى جوسپارلانىپ وتىر.
جالپى, جيىندا قوزعالاتىن ماسەلەلەر نەگىزىنەن «قازىرگى ازيا وركەنيەتىندەگى ادەبي پانوراما» تاقىرىبى اينالاسىندا ءوربيدى. پىكىر الماسۋ ماجىلىسىندە ازيا ادەبيەتى جانە جاھاندىق ماسەلەلەر, ازيا جازۋشىسىنىڭ بۇگىنگى قوعامداعى ورنى, ازيا روماندارىنداعى قازىرگى زاماناۋي تاقىرىپتار, الەمدىك ادەبيەتتەگى ازيا ادامىنىڭ بەينەسى, ازيا اقىندارى پوەزياسىنداعى جاڭا اعىمدار جانە ادەمدىك ادەبيەتكە اسەرى سياقتى, ادەبيەتتەگى جالعىزدىق تاقىرىپتارى, جوعالىپ بارا جاتقان جانرلار مەن بايانداۋ تاسىلدەرى, قارۋ مەن قالام, دامۋ مەن سەنىم, جوعالعان تىلدەر مەن ۇلتتىق ادەبيەتتەر, تەروريزممەن كۇرەستەگى ادەبيەت ءرولى سياقتى كوپتەگەن تاقىرىپ قاۋزالادى.
بۇل تاقىرىپتاردىڭ ءبىرازىن ءبىز ۇسىنىپ, كەيبىرەۋىن شەتەلدىك بايانداماشىلاردىڭ وزدەرى ءوتىندى. ولاردىڭ ماتەريالدارىن فورۋم وتكەننەن كەيىن وقىرمان قاۋىم نازارىنا گازەت-جۋرنالدار ارقىلى ۇسىناتىنىمىزدى ايتا كەتكەن ءجون.
جالپى, فورۋم قارساڭىندا نۇر-سۇلتان قالاسىنىڭ ىرگەسىنەن اقىندار اللەياسى اشىلىپ, فورۋمعا قاتىساتىن قالامگەرلەردىڭ ەكى تومدىق انتولوگياسىن جارىققا شىعارۋ جوسپارلانۋدا.
ۇلىقبەك ەسداۋلەت,
اقىن, قازاقستان جازۋشىلار وداعى باسقارماسىنىڭ توراعاسى
