العاشقى كۇنى زارينا دياس پەن ەلەنا رىباكينانىڭ ءوز قارسىلاستارىنا ەسە جىبەرىپ, جارىس جولىنان شىعىپ قالعانى جايىندا ءبىز بۇعان دەيىن جازعانبىز. ودان كەيىن تاعى ءۇش وتانداسىمىز ونەر كورسەتىپ, ۇشەۋى دە كەلەسى كەزەڭگە ءوتتى. اتاپ ايتساق, ميحايل كۋكۋشكين الەمنىڭ 10 راكەتكاسى, يسپانيالىق روبەرتو باۋتيستا اگۋتپەن ايقاستى. بەس سەتتىك سايىس 3:6, 6:1, 6:4, 3:6, 6:3 ەسەبىمەن ءبىزدىڭ جىگىتتىڭ پايداسىنا شەشىلدى. ەندى كۋكۋشكين اۆستراليالىق الەكسەي پوپىرينمەن كەزدەسەدى.
الەكساندر بۋبليك كولۋمبيالىق سانتياگو حيرالدودان باسىم ءتۇستى – 2:6, 6:0, 7:5, 3:6, 6:4. ءبىر عاجابى, وسى باسەكەلەردىڭ ەكەۋى دە 3 ساعات 18 مينۋتقا سوزىلدى. ونىڭ ەندىگى قارسىلاسى – يتاليالىق توماس فاببيانو.
ايەلدەر اراسىنداعى قازاقستاننىڭ ءبىرىنشى راكەتكاسى يۋليا پۋتينتسەۆاعا امەريكالىق مەديسون برەنگلدى ۇتۋ ەش قيىندىق تۋعىزعان جوق. بۇل كەزدەسۋدە 6:3, 6:3 ەسەبى تىركەلدى. كەلەسى كەزەڭدە جەرلەسىمىز بەلارۋسسيالىق ارينا سوبولەنكومەن سايىسقا تۇسەدى.
