كەزدەسۋدە دەپۋتات ۆ.ۆولكوۆ قازاقستان رەسپۋبليكاسىنىڭ پرەزيدەنتى ق.توقاەۆ قويعان 10 باستى مىندەتتى ىسكە اسىرۋ بويىنشا قابىلدانىپ جاتقان شارالار تۋرالى ايتىپ, ازاماتتاردىڭ تابىسىن ارتتىرۋ, تۇرعىن ءۇي ساياساتى جانە ايماقتاردى كەشەندى دامىتۋعا قاتىستى ماسەلەلەرگە كەڭىنەن توقتالدى.
سەناتور ەلتاي اۋىلدىق وكرۋگىندەگى كوكوزەك اۋىلىندا 2006 جىلى اشىلعان بىلعارى شىعاراتىن «Almaty Tannery» جشس زاۋىتىندا بولدى. كاسىپورىن ءىرى قارا مالدان قۋاتتىلىعى جىلىنا 2500 توننا شيكىزات ءوندىرىپ وتىر. 2018 جىلى ونەركاسىپ ءونىمى 199,9 ملن تەڭگەنى قۇراپ, 75 جۇمىس ورنى اشىلدى. كەزدەسۋ بارىسىندا ساپالى شيكىزاتتىڭ جەتىسپەۋى مەن وتاندىق بىلعارى وندىرۋشىلەردىڭ جاعدايى ءسوز بولدى.
* * *
ال پارلامەنت ءماجىلىسىنىڭ دەپۋتاتى نۇرلان دۋلاتبەكوۆ ماڭعىستاۋ ولكەسىنە جۇمىس ساپارىمەن كەلدى. ءماجىلىس دەپۋتاتى بىرقاتار نىساندى ارالاۋدى باستاپ كەتتى. بۇگىن حالىق قالاۋلىسى «ماەك-قازاتومپروم» جشس-دا بولىپ, ۇجىممەن كەزدەستى. الدىمەن مەكەمەنىڭ مۇراجايىنا باس سۇعىپ, كاسىپورىننىڭ تاريحىمەن تانىستى. ودان ءارى جەو-1
جۇمىسىمەن تانىستى. كاسىپورىن اقتاۋ قالاسى مەن جاقىن ماڭداعى اۋىلداردىڭ تۇرعىندارىن, سونداي-اق ءوڭىردىڭ ونەركاسىپتىك كاسىپورىندارىن اۋىزسۋمەن جانە شارۋاشىلىق سۋمەن, جىلۋمەن جانە ەلەكتر ەنەرگياسىمەن قامتاماسىز ەتەدى. بۇگىندە مەكەمەدە ءتورت مىڭعا جۋىق مامان جۇمىس ىستەيدى. قازىرگى ۋاقىتتا كومبينات 600 مۆت-دان استام ەلەكتر قۋاتىمەن جۇمىس ىستەۋ جانە تاۋلىگىنە 60 مىڭ تەكشە مەتردەن استام ديستيلليات شىعارۋ مۇمكىندىگى بار. حالىق قالاۋلىسى الەۋمەتتىك قامسىزداندىرۋ سالاسىنا باسا نازار اۋدارىپ, ازاماتتاردىڭ ءال-اۋقاتىن جاقسارتۋعا ەرەكشە ءمان بەرىلىپ كەلە جاتقاندىعىن العا تارتتى. بىرقاتار وزەكتى الەۋمەتتىك ماسەلەلەر كوتەرىلىپ, ايتىلعان بارلىق ۇسىنىس-پىكىر ءماجىلىس دەپۋتاتى نازارىنا الىندى. ودان ءارى ءماجىلىس دەپۋتاتى ش. ەسەنوۆ اتىنداعى ۋنيۆەرسيتەتتىڭ ۇجىمىمەن كەزدەسەدى. ودان ءارى اۋداندارعا بارىپ, تۇرعىنداردى جەكە قابىلداۋ جوسپاردا بار.
* * *
سونداي-اق ءماجىلىس دەپۋتاتى Nur Otan پارتياسى جانىنداعى سىبايلاس جەمقورلىققا قارسى ءىس-قيمىل جونىندەگى قوعامدىق كەڭەس توراعاسى ومارحان وكسىكباەۆ الماتى وبلىسىنىڭ ەسكەلدى اۋىلىندا ازاماتتاردى قابىلدادى.
قابىلداۋعا كەلگەن ازاماتتار دەپۋتاتتان تۇرعىن ءۇي قۇجاتتارىن رەتتەۋ, تۇراقتى جۇمىسپەن قامتۋ جانە باسقا دا وزدەرىن تولعاندىرعان كوپتەگەن ماسەلەنى كوتەردى.
– پارتيالىقتار كەز كەلگەن ۋاقىتتا تۇرعىنداردىڭ تىلەگىنە ەرەكشە نازار اۋدارىپ, سۇراقتارىنا جىلدام جاۋاپ بەرۋگە ءازىر بولۋى ءتيىس. قازىر ءبىز تسيفرلى زاماندا ءومىر سۇرەمىز. وتىنىشتەر ونلاين تىركەلەدى. قوعامدىق قابىلداۋ بولمەلەرىنىڭ دە جۇمىسىن بارىنشا وڭتايلاندىرىپ, ازاماتتاردىڭ وتىنىشتەرىن شۇعىل شەشۋگە كۇش سالساق, جۇمىسىمىز جەمىستى بولادى. الدىما كەلگەن ازاماتتاردىڭ ءار سۇراعىنا دەن قويىپ, قولىمدا بار مۇمكىندىكتى ايانباستان ۇسىندىم, – دەدى ومارحان نۇرتاي ۇلى.
جالپى, ەسكەلدى اۋداندىق فيليالىنىڭ قابىلداۋ بولمەسىنە جىل باسىنان بەرى 177 ءوتىنىش كەلىپ تۇسسە, ولاردىڭ 60-ى وڭ شەشىمىن تاپقان. 4 مىڭنان استام پارتيا مۇشەسى, 13 باستاۋىش پارتيا ۇيىمى بار. پارتيالىق باقىلاۋ قىزمەتى مەن جەمقورلىققا قارسى ءىس-قيمىل جونىندەگى اۋداندىق كەڭەس جىل باسىنان وننان استام وتىرىس وتكىزىپ, مەملەكەتتىك مەكەمەلەرگە 17 ۇسىنىس بەرگەن.
