زاڭ جوبالارىن قر پرەمەر-ءمينيسترىنىڭ ءبىرىنشى ورىنباسارى – قارجى ءمينيسترى ءا. سمايىلوۆ, قر ۇلتتىق ەكونوميكا ءمينيسترى ر. دالەنوۆ تانىستىردى. سونداي-اق كۇن تارتىبىندەگى ماسەلە بويىنشا قر ۇلتتىق بانكىنىڭ توراعاسى ە. دوساەۆ ءسوز سويلەدى.
2020–2024 جىلدارعا ارنالعان قازاقستاننىڭ الەۋمەتتىك-ەكونوميكالىق دامۋ بولجامىنا سايكەس قر ءجىو-ءنىڭ ناقتى ءوسىمى 2020 جىلى 4,1%, كەيىننەن 2024 جىلى 4,7%-عا دەيىن وسەدى دەپ بولجانعان. ءجىو-ءنىڭ ورتاشا جىلدىق ءوسۋ قارقىنى الداعى بولجاناتىن كەزەڭدە 4,4%-دى قۇرايدى.
رەسپۋبليكالىق بيۋدجەت جوباسىندا 2020 جىلعا ارنالعان تۇسىمدەر وسى جىلدىڭ جوسپارىنا 639 ملرد تەڭگە وسىممەن 11,2 ترلن تەڭگەنى قۇرايدى. 2020–2022 جىلدارعا ارنالعان رەسپۋبليكالىق بيۋدجەت شىعىستارىنىڭ باسىمدىقتارى مەملەكەت باسشىسىنىڭ قازاقستان حالقىنا جىل سايىنعى جولداۋلارى مەن قر تۇڭعىش پرەزيدەنتى – ەلباسىنىڭ جاريالانعان باستامالارىن ودان ءارى ىسكە اسىرۋعا باعىتتالاتىن بولادى.
تۇرعىنداردىڭ تۇرمىس ساپاسى مەن ءال-اۋقاتىن ودان ءارى ارتتىرۋ ءبىرىنشى كەزەكتەگى باعىتتارى بولىپ قالىپ وتىر. 2020 جىلعا ارنالعان الەۋمەتتىك سالا شىعىستارى بيىلعى شىعىس كولەمىنەن 303 ملرد تەڭگەگە وسىممەن 5,7 ترلن تەڭگە كولەمىندە جوسپارلانىپ وتىر.
پرەمەر-مينيستر اسقار مامين 2020–2022 جىلدارعا ارنالعان جالپى سيپاتتاعى ترانسفەرتتەردىڭ كولەمىن ايقىنداۋ كەزىندە ءاربىر ءوڭىردىڭ ەرەكشەلىكتەرى جانە ولاردىڭ ەكونوميكالىق دامۋ دەڭگەيلەرى ەسكەرىلگەنىن اتاپ ءوتتى.
«رەسپۋبليكالىق بيۋدجەتتە كوزدەلگەن قاراجات مەملەكەتتىڭ بارلىق الەۋمەتتىك مىندەتتەمەلەرىن تولىق كولەمدە ورىنداۋعا مۇمكىندىك بەرەدى», — دەدى اسقار مامين.
سونىمەن قاتار بيۋدجەت شىعىستارى ەكونوميكانىڭ ناقتى سەكتورىن قولداۋعا, ونىڭ ىشىندە يندۋستريالىق-يننوۆاتسيالىق دامۋعا, تۇرعىن ءۇي جانە كولىك ينفراقۇرىلىمىنا, اگروونەركاسىپتىك كەشەنگە, تسيفرلاندىرۋعا, ءونىمدى جۇمىسپەن قامتۋعا باعىتتالاتىن بولادى.
«وڭىرلەردىڭ اكىمدەرى بيۋدجەت قاراجاتتارىن جۇمساۋ كەزىندە بەلگىلەنگەن باعىتتاردى ۇستانۋى قاجەت», — دەپ اتاپ ايتتى ا. مامين.
اتالعان زاڭ جوبالارى مەملەكەت باسشىسىمەن كەلىسىلگەن جانە بەلگىلەنگەن تارتىپپەن رەسپۋبليكالىق بيۋدجەت كوميسسياسىمەن ماقۇلدانعان. مينيسترلەر كابينەتىنىڭ قاراۋىنىڭ قورىتىندىسى بويىنشا جوبالار قر پارلامەنتى ماجىلىسىنە جىبەرىلەتىن بولادى.
