ءار جىل سايىن تابيعاتى تامىلجىعان بۋراباي اۋماعىندا ۆەلومارافون وتكىزۋ داستۇرگە اينالعان. قايىرىمدىلىق شاراسى بىرتە-بىرتە ءوز اياسىن كەڭەيتىپ كەلەدى. ۇستىمىزدەگى بۇل شارا جالعىز ادامعا ەمەس, تۇتاس وتباسىنا ارنالعان مۋزىكالىق-سپورتتىق فەستيۆالگە ۇلاستى.
ادامداردى ىزگىلىككە, قايىرىمدىلىققا باۋليتىن ىسكە ساياسات, بيزنەس جانە سپورت سالاسىنىڭ وكىلدەرى قاتىستى. بيىلعى جىلى اتالمىش شاراعا 3500 ادام جينالىپ, رەكوردتىق كورسەتكىشكە قول جەتكىزىلدى. جينالعاندار الدىندا وليمپيادا چەمپيونى الەكساندر ۆينوكۋروۆ, قازاقستان رەسپۋبليكاسىنىڭ مادەنيەت جانە سپورت ۆيتسە-ءمينيسترى ەلدوس رامازانوۆ, اقمولا وبلىسىنىڭ اكىمى ەرمەك مارجىقپاەۆ ءسوز سويلەپ, قايىرىمدىلىق جاساۋ ەڭ الدىمەن ادام بويىنداعى كىسىلىك قاسيەتتى كورسەتەتىندىگىنە توقتالدى. الەمگە جىلۋ شاشىپ تۇرعان دا وسىنداي ىزگىلىك تۇنعان كەڭپەيىل ەكەندىگىن ەكشەي ايتتى.
ء–ار جىل سايىن قايىرىمدىلىق شاراسىنىڭ اياسى كەڭەيىپ كەلە جاتقانى كوڭىلگە قۋانىش ۇيالاتادى,–دەدى وبلىس اكىمى,–بۇگىن ەلىمىزدىڭ ءار وڭىرىنەن, الىس جانە جاقىن شەت ەلدەردەن ادامدار جينالىپ وتىر. وسىعان قاراعاندا, قايىرىمدىلىق سياقتى اسىل قاسيەتتە شەكارا جوق.
ەكسكليۋزيۆتىك لوتتار بويىنشا قايىرىمدىلىق اۋكتسيونى وتكىزىلدى. جينالعانداردىڭ لەبىزىنە قاراعاندا باعاسى قولجەتىمدى. قاتىسۋشىلار قانات يسلام مەن گەننادي گولوۆكيننىڭ قولعابى, دميتري ءبالانديننىڭ ءجۇزۋ تەلپەگى, باتىرحان شۇكەنوۆتىڭ البومدار جيناعى, رافاەل نادالدىڭ تەننيس دوبى جانە وزگە دە كوپتەگەن لوتتار بويىنشا باسەكەگە ءتۇستى. بارلىق قارجى قايىرىمدىلىق شارالارىنا باعىتتالادى.
بالالارعا ارنالعان انيماتسيالىق-قايىرىمدىلىق باعدارلاما مەن جارمەڭكە, ارقيلى ۇلتتىق ويىندار كوپ كوڭىلىن باۋرادى. وسى ارادا ەكپىن ءتۇسىرىپ ايتاتىن جاي, بيىلعى قايىرىمدىلىق نازارى ەسىل قالاسىنا ءتۇسىپ وتىر. بۇل قالا وبلىستىڭ ەڭ شالعايىنداعى ەلدى مەكەندەردىڭ ءبىرى. اۋدان ورتالىعىنداعى كونەتوز اۋرۋحانا 25 مىڭ حالىققا قىزمەت ەتەدى.
–نەسىن جاسىرايىق, اۋداندىق اۋرۋحانا وسى زامانعى مەديتسينالىق قۇرال-جابدىققا ءزارۋ,–دەيدى باس دارىگەر داستان اسان ۇلى,–ماسەلەن, اۋىر ناۋقاستاردى 350 شاقىرىم جەردەگى كوكشەتاۋعا, ايتپەسە, نۇر-سۇلتان قالاسىنا جەتكىزۋگە ءماجبۇرمىز. اسىرەسە, جۇكتى ايەلدەر مەن جاس بالالارعا قيىن. ءبىر جىلدىڭ ىشىندە شامامەن 60-70 ادامدى تاسىمالداپ ءجۇرمىز. تاسىمالداۋ ءۇشىن ارنايى جابدىقتالعان كولىك كەرەك. ونىڭ ۇستىنە اۋرۋحانانىڭ حيرۋرگيا بولىمشەسى دە مەديتسينالىق قۇرال-جابدىقتارعا ءزارۋ. وسى جولعى قايىرىمدىلىق شاراسى بارىسىندا ءبىراز كەم-كەتىگىمىزدى بۇتىندەپ الاتىن بولدىق.
قور ديرەكتورى مارات ايتماعامبەتوۆتىڭ ايتۋىنا قاراعاندا, اتالمىش قور جىل سايىن مەديتسينا سالاسىنا كوپ كومەگىن تيگىزىپ كەلەدى. التى جىلدىڭ ىشىندە 700 ميلليون تەڭگە قارجى جيناعان. بيىلعى جىلى اقمولا وبلىستىق پەريناتالدىق ورتالىققا, وبلىستىق بالالار اۋرۋحاناسىنا, ششۋچينسكىدەگى بالالار ۇيىنە, باسقا دا مەكەمەلەرگە قايىرىمدىلىق كومەك كورسەتىلمەك. بەلگىلى قوعام قايراتكەرى ارۋجان ساين ەڭ باستىسى وسىنداي مەيىرىمدى شارالاردى تۇراقتى وتكىزۋ دەپ ەسەپتەيدى.
ۇستىمىزدەگى جىلى قاتىسۋشىلار كوپ بولعاندىقتان, فەستيۆال ەكى كۇن بويى وتكىزىلدى. كاسىبي سپورتشىلار اراسىندا ۆەلوجارىس 35 جانە 70 شاقىرىم, اۋەسقويلار اراسىندا 10 شاقىرىم قاشىقتىقتا ۇيىمداستىرىلدى.
اقمولا وبلىسى
