«استانا» ەۋروپا ليگاسىنىڭ سوڭعى ءتورت ويىنىنان بەرى ءار ماتچتا ءىرى ەسەپپەن جەڭىسكە جەتىپ كەلەدى. بۇل جولى دا باتە قاقپاسىنا جاۋاپسىز ءۇش گول سوقتى. رومان گريگورچۋك پەن ونىڭ كومانداسى اقىرىنداپ ءوز ويىنىن تاۋىپ, تۇراقتىلىققا ۇيرەنىپ كەلە جاتقان سياقتى. نەگە دەسەڭىز, باس باپكەر اتالعان ءتورت ويىندا دا ءبىر قۇرامدى ويناتىپ ءجۇر جانە 4-5 فۋتبولشى ءار ويىندا تۇراقتى گول سوعۋدا.
ماتچقا دەيىن بىرقاتار فۋتبول مامانى بولجاعانداي كەزدەسۋ تەڭ دارەجەدە باستالدى. دەگەنمەن العاشقى قاۋىپتى شابۋىلدى باتە فۋتبولشىلارى جاساعانىن ايتا كەتەيىك. كەزدەسۋدىڭ 20-مينۋتىنا دەيىن كوماندالار الما-كەزەك شابۋىلداپ, قاقپا الدىندا بىرنەشە قاربالاس ءسات ۇيىمداستىرعانىمەن, گول سوعا المادى. 23-مينۋتتا وڭ قاپتالدان رۋنار سيگۋرونسسوننان پاس العان توماسوۆ قارسىلاستىڭ ءۇش بىردەي قورعاۋشىسىن الداپ ءوتىپ, ايىپ الاڭىنا كىرمەي شىرەنە تەپكەن دوبى قاقپانىڭ «توعىزدىعىنا» توپ ەتە ءتۇستى. مۇنداي سوققىنى تەك باتە-ءنىڭ عانا ەمەس, الەمنىڭ ەڭ ۇزدىك دەگەن قاقپاشىلارى دا قايتارا الماس ەدى. حورۆاتيالىق فۋتبولشىنىڭ بۇل گولىنا فۋتبول ماماندارى تاڭدانىسىن ءبىلدىرىپ, شەتەلدىك باسىلىمدار جارىسا جازىپ جاتىر.
«استانا» ەسەپتە العا شىققان سوڭ باسىمدىقتى ۇدەتە ءتۇسىپ, ەكىنشى گولدىڭ اراسىن سۋىتپايتىن شىعار دەگەن ويدا بولعانبىز. الايدا باتە ويىنشىلارى قارىمتا شابۋىلعا يەك ارتىپ, ءسات سايىن ەريچتى مازالاۋمەن بولدى. دەي تۇرعانىمەن قورعاۋشىلارىمىز دا دەر كەزىندە ورىندارىنان تابىلىپ, قاۋىپتىڭ بەتىن قايتارىپ وتىردى. كەزدەسۋدىڭ ءبىرىنشى تايمى اياقتالار تۇستا يۋري لوگۆينەنكو ادەتتەگىدەي باسپەن كەرەمەت ويناپ, كومانداسىنىڭ ەكىنشى گولىن سوقتى. ناتيجەلى پاستىڭ اۆتورى – مارين توماسوۆ ەكەنىن ايتا كەتكەن ءجون. وسىلايشا, ويىننىڭ العاشقى تايمى «استانانىڭ» باسىمدىعىمەن اياقتالدى.
ماتچىڭ ەكىنشى تايمىندا رومان گريگورچۋك شابۋىلشى فيرمين مۋبەلەنىڭ ورىنىنا رومان مۇرتازاەۆتى الاڭعا شىعارىپ, تاكتيكاعا ازداعان وزگەرىس ەنگىزدى. كەزەكتى ءبىر شابۋىل ساتىندە قارسىلاس كوماندانىڭ قورعاۋشىسى ءوز ايىپ الاڭىندا سيگۋرونسسوندى شالىپ قۇلاتىپ, تورەشى 11 مەترلىك ايىپ دوبىن بەلگىلەدى. يسلانديادان كەلگەن فۋتبولشى پەنالتيدەن ءمۇلت كەتپەي, تابلوداعى كورسەتكىشتى ەسەلەي ءتۇستى. ەسەپتە ءۇش گولمەن العا شىققان «استانا» ويىنشىلارى اقىرىنداپ قورعانىسقا كوڭىل ءبولىپ, ءوز قاقپاسىنا گول وتكىزىپ الماۋدىڭ قامىن ويلادى. باتە ويىنشىلارى ەسەپتى قىسقارتۋعا بار كۇشىن سالعانىمەن, وسى ويىندا «استانا» قاقپاسىنا گول سوعۋ ولاردىڭ ماڭدايىنا جازىلماعان ەكەن. وسىلايشا ەكى كوماندانىڭ پلەي-وفف كەزەڭىندەگى العاشقى ويىنى جەرلەستەرىمىزدىڭ ءىرى جەڭىسىمەن اياقتالدى.
«استانانىڭ» بۇل جەڭىسى تۋرالى بىرنەشە شەتەلدىك باسىلىم دا جازۋدا. مىسالى بوسنيانىڭ Klix.ba سايتىنىڭ ءتىلشىسى ومار تيپۋرا «استانانى» چەمپيوندار ليگاسىنىڭ دەڭگەيىندەگى كوماندا دەپ اتادى. «بۇل كەرەمەت ناتيجە. شىنى كەرەك, مەن «استانانىڭ» قارسىلاستان باسىم بولاتىنىن ءبىلدىم, بىراق مۇنداي دەڭگەيدە دەپ ويلاعان جوقپىن. بەلارۋس كومانداسى قارىمتا ويىندا كامبەك تۋرالى ويلاماي-اق قويسا دا بولادى. مەنىڭشە «استانا» توپتىق كەزەڭگە شىعىپ تۇر. جالپى قازىر قازاقستاندىق كوماندا باتە, «لۋدوگورەتس», «ساراەۆو» جانە تاعى باسقا كلۋبتارىنان ءبىر باس جوعارى. بۇل كوماندانى چەمپيوندار ليگاسىنىڭ دەڭگەيىندە دەپ ەسەپتەيمىن. «استانا» ەۋروپا ليگاسىنىڭ توپتىق كەزەڭىنەن ءساتتى ءوتىپ, 1/16 فينالعا شىعاتىنىنا سەنىم بىلدىرەمىن», دەيدى بوسنيالىق جۋرناليست.
سونداي-اق بەلارۋستىڭ by.tribuna.com باسىلىمى «باتە بىرنەشە جىلدان بەرى ەۋروكۋبوكتا سونشالىقتى ءۇمىتسىز كورىنبەگەن ەدى. ەندى ءبىر عاجايىپ ورىن الماسا, «استانادان» باسىم ءتۇسۋ وتە قيىن» دەگەن تاقىرىپتا كولەمدى ماتەريال جاريالاعان. ماقالانىڭ سوڭى بىلاي اياقتالادى: ء«ۇش جىل بۇرىن باتە قازاقستاندا «استانادان» 0:2 ەسەبىمەن جەڭىلگەن ەدى. ال قارىمتا ويىننىڭ العاشقى تايمىندا ەرماكوۆيچتىڭ (سول كەزدەگى باتە-ءنىڭ باس باپكەرى – رەد) شاكىرتتەرى قالاي ويناعانى ەستەرىڭىزدە مە؟ گوردەيچۋكتىڭ گولى بارشاعا ءۇمىت سىيلاعانىمەن, عاجايىپ وقيعا بولماعان ەدى. ءبىر اپتادان كەيىن سول عاجايىپتىڭ بيىل قايتالاناتىنىنا سەنەسىز بە؟ مۇمكىن الەكسەي باگانىڭ باپكەرلەر قۇرامى جاڭا تاكتيكالىق جۇيە ويلاپ تابار نەمەسە باتە-ءنىڭ بەينەوپەراتورى كيىنەتىن بولمەدە موتيۆاتسيالىق بەينە كورسەتەر؟ سوندا عانا... سونىمەن ءبىر عاجايىپتىڭ بولارىنا سەنەمىز بە؟».
راسىمەن, فۋتبول بولجاپ بولمايتىن ويىن. قارىمتا ماتچتا باتە ويىنشىلارى توپتىق كەزەڭگە ءوتۋ ءۇشىن بارىن سالارى انىق. «استانا» ويىنشىلارى جەڭىستىڭ اسەرىنەن تەز شىعىپ, قارىمتا ماتچتا بارىنشا ساۋاتتى ويناۋ كەرەك. ايتپەسە, by.tribuna.com باسىلىمى جازعانداي بەلارۋس كومانداسى ءبىر عاجايىپتىڭ ارقاسىندا «استانانى» قاپى قالدىرۋى ابدەن مۇمكىن.
قوس كوماندا اراسىنداعى جاۋاپ كەزدەسۋى 29 تامىز كۇنى بەلارۋستىڭ بوريسوۆ قالاسىنداعى «بوريسوۆ-ارەنادا» وتەدى. سونداي-اق وسى جولداردىڭ اۆتورى دا اتالعان ستاديوننان اقپارات تاراتىپ, «استانانىڭ» توپتىق كەزەڭگە وتكەنى تۋرالى ءسۇيىنشى سۇراماق نيەتتە.
