ولاردىڭ جەكپە-جەگى رەسەيدىڭ چەليابى قالاسىنداعى "تراكتور" ارەناسىندا بوكس كەشىنىڭ باستى كەزدەسۋىندە وتتى. كوۆالەۆ ءوزىنىڭ تۋعان قالاسىندا العاش رەت جەكپە-جەك ۇيىمداستىردى, جالپى ول رەسەيدە نەبارى ءۇش كەزدەسۋ وتكىزگەن. يارد بولسا سپورتتىق مانسابىندا العاش رەت ءوز ەلىنىڭ شەكاراسىنان شىقتى.
جەكپە-جەك 11-ءشى راۋندتا اياقتالدى. كوۆالەۆ كۇشى سارپىلعان قارسىلاسىن نوكاۋتقا ءتۇسىردى. سەگىزىنشى راۋندتا ۇلىبريتانيالىق بوكسشى ءسال بولماعاندا رەسەيلىكتى ەسىنەن تاندىرۋعا از قالعان ەدى. بىراق ول گونگقا دەيىن شىداپ باقتى, سوسىن باسىمدىقتى ءوز قولىنا الدى.
36 جاستاعى كوۆالەۆ ءۇشىن بۇل 34-ءشى (29 نوكاۋت) جەڭىس, ول ءۇش رەت جەڭىلگەن جانە ءبىر رەت تەڭ تۇسكەن. ال 27 جاستاعى يارد سپورتتىق مانسابىندا العاش رەت جەڭىلدى. وسىعان دەيىن ول 18 كەزدەسۋدە جەڭىمپاز بولىپ, ونىڭ 17-ءىن مەرزىمىنەن بۇرىن اياقتاعان. وسى كەزدەسۋ ءۇشىن كوۆالەۆ بەس ميلليون دوللار, ال ۇلىبريتانيالىق ءۇش ميلليون دوللار الادى. كوۆالەۆ WBO بەلبەۋىن 2 اقپاندا قايتارعان ەدى. ول كولۋمبيالىق ەلەيدەر الۆارەستى رەۆانش كەزىندە جەڭدى.
2013-2016 جانە 2017-2018 جىلدارى ارالىعىندا وسى بەلبەۋ رەسەيلىكتىڭ يەلىگىندە بولعان.
بۇدان دا بۇرىن حابارلاعانىمىزداي, وسى بوكس كەشىنىڭ اندەركارتىندا كاسىپقوي بوكستا ورتا سالماقتا ونەر كورسەتىپ جۇرگەن قازاقستاندىق بوكسشى مەيىرىم نۇرسۇلتانوۆ رەسەيلىك ارتۋر وسيپوۆتى جەڭدى. 26 جاستاعى نۇرسۇلتانوۆ سپورتتىق مانسابىندا 11 كەزدەسۋ وتكىزىپ, بارلىعىندا دا جەڭىسكە جەتتى. سەگىز كەزدەسۋدى مەرزىمىنەن بۇرىن اياقتادى.
ال 30 جاستاعى وسيپوۆ وسىمەن ەكىنشى رەت جەڭىلدى, ول 15 رەت (10 نوكاۋت) جەڭىسكە جەتكەن.
