قازاقستان • 25 تامىز، 2019

قازاقستان ەلشىسى فينليانديا پرەزيدەنتىنە سەنىم گراموتالارىن تاپسىردى

104 رەتكورسەتىلدى

قازاقستاننىڭ ەلشىسى جاننا سارتباەۆا فينليانديا رەسپۋبليكاسىنىڭ پرەزيدەنتى ساۋلي نينيستيوگە سەنىم گراموتالارىن تاپسىردى. پرەزيدەنت سارايىنداعى سالتاناتتى راسىمنەن كەيىن قازاقستاندىق ديپلوماتتى مەملەكەت باسشىسى قابىلدادى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى. 

سۇحبات بارىسىندا قازاقستان پرەزيدەنتى قاسىم-جومارت توقاەۆتىڭ فينليانديا پرەزيدەنتىنە جولداعان سالەمى مەن جىلى نيەت-لەبىزدەرى جەتكىزىلىپ، قازاقستانعا ساپارمەن كەلىپ-كەتۋ تۋرالى شاقىرۋى تابىس ەتىلدى.

فينليانديانىڭ مەملەكەت باسشىسىن قازاقستاننىڭ ساياسي دامۋى، ەكونوميكاسىن ءارتاراپتاندىرۋى جانە ترانزيتتىك-كولىكتىك الەۋەتىن دامىتۋ جولىنداعى قولعا الىنعان شارالار بويىنشا حاباردار ەتىلدى.    

قازاقستان-فينليانديا قاتىناسىنىڭ قازىرگى جاعدايى مەن كەلەشەگىن تالقىلاۋ بارىسىندا ەلشى ەكىجاقتى ىنتىماقتاستىقتىڭ بارلىق سپەكترى بويىنشا، اسىرەسە، تسيفرلىق تەحنولوگيالار سالاسىنداعى ءوزارا ارەكەتتەستىكتى تەرەڭدەتۋگە ەل باسشىلىعىنىڭ مۇددەلىلىگىن تانىتتى.

پرەزيدەنت ق.توقاەۆ ۇلىقتاۋ راسىمىندە سويلەگەن سوزىندە ايقىنداعان نەگىزگى باعىتتار تۋرالى ەگجەي-تەگجەيلى ايتىلدى. قازاقستاننىڭ تۇڭعىش پرەزيدەنتى - ەلباسى نۇرسۇلتان نازارباەۆ الەمدىك قاۋىمداستىققا ءۇش ديالوگ نەگىزىندە جاڭا گەوساياسي احۋال قالىپتاستىرۋ تۋرالى ۇسىنعان باستاماسى مالىمدەندى.

سونىمەن قاتار تۇڭعىش پرەزيدەنت - ەلباسى ن.نازارباەۆ پەن پرەزيدەنت ق.توقاەۆتىڭ پرەزيدەنت س.نينيستەنىڭ تۋعان كۇنىنە وراي قۇتتىقتاۋلارى تابىستالدى.

فينليانديا پرەزيدەنتى ەكى ەل اراسىنداعى قاتىناستاردىڭ دوستىق سيپاتىنا ەرەكشە كوڭىل اۋدارىپ، قازاقستاننىڭ حالىقارالىق ارەناداعى ماڭىزدىلىعىن اتاپ ءوتتى. ول ەكىجاقتى ساۋدانىڭ ءوسىپ كەلە جاتقان بەتالىسىنا قاناعاتتانۋشىلىق ءبىلدىردى.

س.نينيستيو تۇڭعىش پرەزيدەنت - ەلباسى ن.نازارباەۆتىڭ قازىرگى قازاق مەملەكەتتىلىگىنىڭ نەگىزىن قالاۋشى رەتىندەگى ءرولىن ايرىقشا ايتىپ، ونىڭ جاھاندىق ارحيتەكتۋرا مەن گەوساياسي ماسەلەلەردىڭ قالىپتاسۋ ۇدەرىستەرىن تەرەڭ تۇسىنەتىندىگىن اتاپ ءوتتى. فين مەملەكەتىنىڭ باسشىسى ەلىمىزدىڭ پرەزيدەنتى ق. توقاەۆقا جۇرەكجاردى لەبىزىن ءبىلدىردى.

فينليانديا پرەزيدەنتى قازاقستانعا جاساعان ساپارلارىن ەسكە الىپ، ەلدىڭ قازىرگى دامۋىن جوعارى باعالادى جانە ەلدەگى ساياسي، الەۋمەتتىك-ەكونوميكالىق رەفورمالاردى ودان ءارى جۇزەگە اسىرۋدا ساتتىلىك تىلەدى.

سوڭعى جاڭالىقتار

ۇقساس جاڭالىقتار