نۇر-سۇلتاننىڭ اكىمى التاي كولگىنوۆتىڭ ايتۋىنشا, قازىرگى تاڭدا ەلوردانىڭ شەت اۋداندارىندا 16 تۇرعىن ءۇي الابى بار. وندا قالا حالقىنىڭ تورتەن ءبىرى, ياعني, 280 مىڭنان استام ادام تۇرادى. بۇل جەردەگى تۇرمىس دەڭگەيى قالانىڭ ورتالىعىنان تومەن.
اكىمنىڭ بايانداماسىندا ايتىلعانداي, 700 كوشەنىڭ ۇشتەن ەكىسىنىڭ جاعدايى ناشار, اسفالت توسەلمەگەن, جوندەۋدى قاجەت ەتەدى, جارىق تارتىلماعان, ۇيلەرگە سۋ جەتكىزىلمەگەن. ۇيلەردىڭ 90 پايىزى پەش جاعادى, بۇل قالانىڭ ەكولوگياسىنا دا زيان, ءورت شىعۋ قاۋپىن دە كۇشەيتەدى.
– Nur Otan پارتياسىنىڭ XVIII سەزىندە ەلباسى ەلوردانىڭ شەت ايماقتارىن دامىتۋدى تاپسىردى. بيىل ينجەنەرلىك جەلىلەر, جولدار مەن اباتتاندىرۋعا 7,5 ملرد تەڭگە ءبولىندى. يلينكا اۋىلىن دامىتۋعا 2 ملرد 300 ملن تەڭگە ءبولىندى. ەلوردانىڭ تۇرعىن ءۇي الاپتارىن دامىتۋعا پرەزيدەنت قاسىم-جومارت توقاەۆ ەرەكشە كوڭىل ءبولىپ وتىر. مەملەكەت باسشىسى «اشىق مەملەكەت ساياساتى» قاعيداتىنا كوشۋدى تاپسىردى. ءبىز ارىپتەستەرىمىزبەن بارلىق 16 تۇرعىن ءۇي ماسسيۆىنە باردىق. تۇرعىندارمەن كەزدەسىپ, وزەكتى ماسەلەلەردى تىڭدادىق, - دەدى ا.كولگىنوۆ.
وسى وتىرىستا ايتىلعانداي, ەلوردانى دامىتۋدىڭ 5 جىلعا ارنالعان بەكىتىلگەن كەشەندى جوسپارى بار. جاسالاتىن جۇمىستار 3 نەگىزگى بلوكقا بولىنگەن, ول: جول جانە ينجەنەرلىك ينفراقۇرىلىم, الەۋمەتتىك نىسانداردىڭ تاپشىلىعى جانە اباتتاندىرۋ ماسەلەلەرى. قىسقا مەرزىمدى, ورتا مەرزىمدى جانە ۇزاق مەرزىمدى دەپ بولىنگەن جۇمىستار ساتىلاپ جۇزەگە اسىرىلادى.
