رۋحانيات • 24 تامىز، 2019

فەستيۆالدە كورەي تەاترىنىڭ باعى جاندى

169 رەتكورسەتىلدى

قوستانايدا بەكزات ونەردىڭ تاعى ءبىر فەستيۆالى وتەدى دەگەندە، قوستانايلىقتاردىڭ قوزعالاقتاپ قالعانى راس. كورەي، نەمىس، ۇيعىر، وزبەك تەاترلارى قازاقستاننان باسقا تاۋەلسىز دوستاستىق ەلدەرىنىڭ ەشقايسىسىندا جوق، بۇرىن دا بولعان ەمەس.

قازاقستان حالقى اسسامبلەياسىنىڭ باستاماسىمەن ەلىمىزدە بيىل بەسىنشى رەت ءوتىپ وتىرعان ۇلتتىق (ەتنيكالىق) تەاترلار فەستيۆالى قيىن جىلدارى قازاق جەرىنەن پانا تاپقان، ونى ءوزىنىڭ جەرۇيىعىنا اينالدىرعان ۇلىستار ونەرىن دامىتۋعا دا مول مۇمكىندىكتى سەزىنىپ وتىرعانىن كورسەتتى.

قوناقتارعا وبلىس اكىمى ارحيمەد مۇحامبەتوۆتىڭ جىلى لەبىزىن جەتكىزگەن وبلىستىق مادەنيەت باسقارماسىنىڭ باسشىسى ەرلان قالماقوۆ، كورەرمەندەر مەن تەاتر ارتىستەرىن قر مادەنيەت جانە سپورت ءمينيسترى اقتوتى رايىمقۇلوۆانىڭ اتىنان قۇتتىقتاعان مينيسترلىكتىڭ كينەماتوگرافيا جانە تەاتر باسقارماسىنىڭ باس ساراپشىسى گۇلنافيس مىرزاشەۆا شارانىڭ باستى ماقساتى ەلدەگى ەتنيكاارالىق كەلىسىمدى نىعايتۋ جانە قازاقستان حالقىنىڭ باي مادەنيەتىن ساقتاۋ ەكەنىن ايتتى.

بۇل جولى قوستانايعا مەملەكەتتىك اكادەميالىق كورەي مۋزىكالىق تەاترى، شىمكەنت قالالىق وزبەك تەاترى، ق.قوجامياروۆ اتىنداعى مەملەكەتتىك رەسپۋبليكالىق ۇيعىر مۋزىكالىق كومەديا تەاترى جانە فەستيۆال شارتى بويىنشا ءى.وماروۆ اتىنداعى قوستاناي وبلىستىق قازاق دراما تەاترى مەن وبلىستىق ورىس دراما تەاترى دا ونەر بايگەسىنەن سىرت قالعان جوق.

– ءبىزدىڭ ۇيعىر تەاترى تەاتر بولعالى قوستانايعا ءبىرىنشى رەت كەلۋىمىز ەكەن. فەستيۆالدىڭ ارقاسىندا توبىل-تورعاي ءوڭىرى جۇرتىنا ونەرىمىزدى ۇسىندىق. كورەرمەن مەن تەاتر كوزايىم بوپ كەزدەسپەي بۇل ونەردىڭ قاناتى قاتايعان، قادامى جۇرگەن ەمەس. تەاتر ونەرىنىڭ ەرەكشەلىگى دە سول عوي. سوندىقتان ءبىز فەستيۆالگە وتە ريزامىز، – دەدى ق.قوجامياروۆ اتىنداعى ۇيعىر تەاترىنىڭ كوركەمدىك جەتەكشىسى يالقىنجان شاميەۆ.

فەستيۆالدەن ونەر ءورىسىنىڭ كەڭدىگى مەن ەتنيكالىق تەاترلاردىڭ وسكەنى بايقالدى. مۇنى تەاترلاردىڭ ويعا جەتەلەگەن شىعارمالارىن كورىپ، تاماشالاعان قوستانايدىڭ تالعامپاز جۇرتى دا بىلمەي قالعان جوق.

– فەستيۆال شەڭبەرىندەگى سپەكتاكلدىڭ ءبىرىن دە قالدىرماي، تەگىس قاراپ شىقتىم. ونەردىڭ اتى – ونەر، تالانتتىڭ اتى – تالانت ەكەنىن بايقادىم. قازاق ادەبيەتىنىڭ مارجانى «قوزى كورپەش – بايان سۇلۋ» سپەكتاكلى كورەي تەاترىنىڭ ساحناسىندا اسىل تاستاي قىرلانا، قۇلپىرا تۇسكەن. جاڭا ءتاسىل، جاڭا لەپپەن قويىلعان. شىعارمانى قازاق تەاترى ساحناسىنان كورگەن باسقا دا، كورەي تەاترى ساحناسىنان كورگەندەگى الار ءلاززات بولەك ەكەن. كەرەمەت! – دەگەن ەدى قوستاناي قالاسىنىڭ تۇرعىنى مەڭزادا سامەمبەت.

فەستيۆال تەك ونەر بايگەسىنىڭ ءبىرى عانا ەمەس، بۇل تەاترلاردىڭ ءوز ارا تاجىريبە الماسۋى، ءبىر بىرىنەن ۇيرەنۋ، كەم-كەتىگىن تۇزەۋ مەن جەتپەي، ولقى ءتۇسىپ جاتقان جاعىن بىرلەسىپ ىزدەۋ مۇمكىندىگى-تۇعىن. قازاقستانداعى الپىس شاقتى تەاترلاردىڭ اراسىنداعى ەتنيكالىق تەاترلارعا دا درامالىق شىعارمالار مەن جاس كادرلار تاپشىعى، تەحنيكالىق جابدىقتاۋ ماسەلەلەرى ورتاق ەكەنىن ايتتى جۋرناليستەرمەن كەزدەسۋدە ع.مۇسىرەپوۆ اتىنداعى مەملەكەتتىك اكادەميالىق بالالار مەن جاسوسپىرىمدەر تەاترىنىڭ كوركەمدىك جەتەكشىسى، ونەرتانۋ عىلىمىنىڭ كانديداتى، فەستيۆال قازىلار القاسىنىڭ توراعاسى ەركىن جۋاسبەك.

قايتكەندە دە بايگەنىڭ اتى – بايگە. قازىلار القاسى ساراپتاي كەلگەندە، «ەكىنشى پلانداعى ۇزدىك ەر ادام بەينەسى» نوميناتسياسى بويىنشا ن.سادۋردىڭ «پاننوچكا» سپەكتاكلىندەگى ياۆتۋح ءرولىن سومداعان قوستاناي وبلىستىق ورىس دراما تەاترىنىڭ اكتەرى ولەگ سميرنوۆ، ن.گوگولدىڭ «ۇيلەنۋ» سپەكتاكلىندەگى پودكولەسين ءرولىن سومداعان ءى.وماروۆ اتىنداعى قوستاناي قازاق دراما تەاترىنىڭ اكتەرى، قر ەڭبەك سىڭىرگەن مادەنيەت قايراتكەرى  قونىسبەك بەگايداروۆ ماراپاتتالدى. «ەكىنشى پلانداعى ۇزدىك ايەل بەينەسى» نوميناتسياسىنا ن.گوگولدىڭ «ۇيلەنۋ» سپەكتاكلىندەگى دۋنياشا جانە اگافيا تيحونوۆنا رولدەرىن ويناعان قوستاناي وبلىستىق ءى.وماروۆ اتىنداعى قازاق دراما تەاترىنىڭ ارتىستەرى نازيرا يمان مەن ديانا تۇرسىنوۆا يە بولدى. شىمكەنت قالالىق وزبەك دراما تەاترى «قاسقىر ۇلىعان ءتۇن» سپەكتاكلى ءۇشىن «كورەرمەن كوزايىمى» نوميناتسياسىن ەنشىلەدى. «ۇزدىك ستسەنوگرافيالىق جۇمىسى» نوميناتسياسى بويىنشا ن.سادۋردىڭ «پاننوچكا» سپەكتاكلى ءۇشىن قوستاناي وبلىستىق ورىس دراما تەاترى ماراپاتتالدى. قازىلار «ۇزدىك رەجيسسەرلىك جۇمىس» نوميناتسياسى جۇلدەسى «اپات» سپەكتاكلى ءۇشىن يالكىنجان شاميەۆكە لايىق دەپ تاپتى. ال فەستيۆالدىڭ باس جۇلدەسى – «ۇزدىك سپەكتاكل نوميناتسياسى» «پوەما و ليۋبۆي» سپەكتاكلى ءۇشىن رەسپۋبليكالىق مەملەكەتتىك اكادەميالىق كورەي مۋزىكالىق كومەديا تەاترىنا بەرىلدى.

قوستاناي

سوڭعى جاڭالىقتار

تەاتردىڭ ونلاين تارتۋى

رۋحانيات • كەشە

ءۇي جانۋارىنان ۆيرۋس جۇعا ما؟

كوروناۆيرۋس • كەشە

ۇقساس جاڭالىقتار