ۇكىمەت • 24 تامىز، 2019

اسقار مامين اقتوبە وبلىسىنا باردى

59 رەتكورسەتىلدى

پرەمەر-مينيستر اسقار مامين جۇمىس ساپارىمەن قازاقستاننىڭ جەتەكشى ونەركاسىپتىك وڭىرلەرىنىڭ ءبىرى اقتوبە وبلىسىندا بولىپ قايتتى دەپ حابارلايدى primeminister.kz.

جۇمىس ساپارى اياسىندا ۇكىمەت باسشىسى قر تۇڭعىش پرەزيدەنتى – ەلباسى ن.ءا.نازارباەۆ باستاماشى بولعان يندۋستريالىق-يننوۆاتسيالىق دامۋ مەملەكەتتىك باعدارلاماسىنىڭ ىسكە اسىرىلۋىن، مەملەكەت باسشىسى ق.ك.توقاەۆتىڭ ەل وڭىرلەرىنىڭ ەكونوميكاسىن دامىتۋ جونىندەگى تاپسىرمالارىنىڭ ورىندالۋ بارىسىن قارادى.  

وبلىس ورتالىعىندا پرەمەر-مينيستر اقتوبە فەرروقورىتپالار زاۋىتىنا، حروم كەندەرىنىڭ ساپاسى جونىنەن الەمدەگى ەڭ ءىرى جانە قورىتپالاردى ءوندىرۋ جانە جەتكىزۋ بويىنشا ەكىنشى ورىنداعى «قازحروم» تۇك» اق بولىمشەسىنە باردى. اقتوبە قالاسىنداعى زاۋىت جىل سايىن 440 مىڭعا جۋىق توننا ءونىم شىعارادى. اسقار مامين تسەحتىڭ مەتالداردى بايىتۋ جانە ءوندىرۋ جۇمىستارىمەن تانىستى. سونىمەن قاتار، حرومتاۋ قالاسىنداعى «ۆوسحود» كەن ورنىنداعى جىلىنا 1 ملن توننا كەن وندىرەتىن تاۋ-كەن بايىتۋ كەشەنىنە باردى.

قر پرەمەر-مينيسترىنە 2019 جىلدىڭ باسىنان بەرى اقتوبە وبلىسىنداعى ونەركاسىپ ءونىمى ءوندىرىسىنىڭ كولەمى 1 ترلن تەڭگەدەن اسىپ، 4،9%-عا ارتقانى تۋرالى باياندالدى، سونىڭ ىشىندە حروم كەنىن ءوندىرۋ 5،7%-عا ۇلعايدى.

ۇكىمەت باسشىسى بايعانين جانە مۇعالجار اۋداندارىندا گاز وڭدەۋ كاسىپورىندارىنىڭ جۇمىسىمەن تانىستى، اتاپ ايتقاندا، «گاز پروتسەسسينگ كومپاني» جشس، «سنپس-اقتوبەمۇنايگاز» اق جاڭاجول گاز وڭدەۋ زاۋىتىنا باردى. زاۋىتتاردى تەحنولوگيالىق جاڭعىرتۋ بارىسىنا جانە زاماناۋي تسيفرلىق جوبالاردى ەنگىزۋگە كوڭىل ءبولىندى.

جاڭاجول گوز اۋماعىندا اسقار مامين مەملەكەتتىك ورگانداردىڭ، مۇناي-گاز سەكتورىنداعى كاسىپورىنداردىڭ جانە كاسىپوداقتاردىڭ باسشىلارىنىڭ قاتىسۋىمەن مۇناي-گاز سالاسىن دامىتۋ ماسەلەلەرى جونىندە جۇمىستىق كەڭەس وتكىزدى. تالقىلاۋ بارىسىندا سالانى دامىتۋدىڭ وزەكتى ماسەلەلەرى، ەڭبەك قاتىناستارىن رەتتەۋ، تابىس دەڭگەيىن ارتتىرۋ بويىنشا باستامالاردى ىسكە اسىرۋ، مامانداردى دايارلاۋدا جاڭا تاسىلدەردى ەنگىزۋ ارقىلى كادرلاردا قازاقستاندىق قامتۋ ۇلەسىن ارتتىرۋ ماسەلەلەرى قارالدى. 

ۇكىمەت باسشىسى قازىرگى زامانعى جاعدايلاردى ەسكەرە وتىرىپ، ەڭبەك قاتىناستارىن رەتتەۋدىڭ قولدانىستاعى جۇيەسىن تۇزەتۋدى تاپسىردى. اسقار مامين زاڭنامالىق وزگەرىستەردى ازىرلەۋ جانە ەنگىزۋ قاجەتتىلىگىن ايتتى. اتاپ ايتقاندا، جۇمىسشىلاردىڭ جالاقى بويىنشا قۇقىقتارىنىڭ كەمسىتىلۋىنە جول بەرمەۋ، قاۋىپسىز ەڭبەك جاعدايلارىن قامتاماسىز ەتۋ قاجەت.

كەن ورىندارىنداعى ەكولوگيالىق قاۋىپسىزدىكتى قامتاماسىز ەتۋگە، تابيعي رەسۋرستاردى قورعاۋعا ەرەكشە كوڭىل ءبولۋ تاپسىرىلدى.

جۇمىس ساپارى اياسىندا اسقار مامين سونىمەن قاتار ۇزىندىعى 319 شاقىرىم بولاتىن «اقتوبە – اتىراۋ – رف شەكاراسى (استراحان)» رەسپۋبليكالىق اۆتوموبيل جولىنىڭ سالىنۋ بارىسىمەن، «اقتوبە ق. وڭتۇستىك اينالما جولى» جەرگىلىكتى ماڭىزى بار اۆتوجولىنىڭ رەكونسترۋكتسياسىمەن تانىستى، سونداي-اق «IBG Catering» جشس جول بويى سەرۆيسىنىڭ كوپفۋنكتسيونالدى كەشەنىن ارالادى.

قر ۇكىمەتىنىڭ باسشىسى وڭىردەگى تۇرعىن ءۇي ماسەلەلەرىنىڭ شەشىلۋىنە ايرىقشا نازار اۋداردى. اسقار مامين سالىنىپ جاتقان «نۇر اقتوبە» ىقشام اۋدانىن ارالاپ كوردى، وندا بيىل جىل سوڭىنا دەيىن 2 مىڭنان استام پاتەر پايدالانۋعا بەرىلەدى. سونىمەن قاتار، «كوكتاس-اقتوبە» قۇرىلىسى ماتەريالدارى زاۋىتىنا، سونداي-اق «قاراپايىم زاتتار ەكونوميكاسى» باعدارلاماسىنىڭ جوباسى – «گلوبال سپەتسودەجدا» تىگىن فابريكاسىنا باردى.

جۇمىس ساپارىنىڭ سوڭىندا قر پرەمەر-ءمينيسترى وڭىردە اۋىل شارۋاشىلىعى سالاسىنداعى ينۆەستيتسيالىق جوبالاردىڭ ىسكە اسىرىلۋى بويىنشا «اقتوبە ەت كلاستەرى» جشس ەت وڭدەۋ كومبيناتى مەن «ايس» جشس ءسۇت-تاۋارلىق فەرماسىنا باردى.

سوڭعى جاڭالىقتار

ۇقساس جاڭالىقتار