رۋحانيات • 23 تامىز، 2019

ازاماتتىق ۇستانىم

186 رەتكورسەتىلدى

«ەلۋ جىلدا – ەل جاڭا، ءجۇز جىلدا – قازان»، دەيدى دانا حالقىمىز.

ءومىر، زامان، ۋاقىت حاقىندا ءدال، تاۋىپ ايتىلعان شىن ءسوز، اقيقات پايىم!..

ءيا...

ءبىز – جاھاندانۋ دەيتىن الاساپىرانى مول وزگەرىستەردى ەسەپسىز تولدەتكەن داۋىردە وزگەرمەي، ءوز قالىبىڭدى بۇزباي قالۋدىڭ، ۇلت بولىپ ساقتالۋدىڭ قانشاما قيىن، كۇردەلى مىندەت ەكەنىن ءار ساعات، ءار كۇن سايىن باسىنان وتكەرىپ كەلە جاتقان بۋىننىڭ وكىلىمىز.

تاۋەلسىزدىكتى جاريالاۋ مەن ورناتۋدىڭ تاعدىرلى، تاريحي مىندەتىن جۇزەگە اسىرعان، كوشىن نۇرسۇلتان نازارباەۆ ەسىمدى قايسار مىنەزدى، ۇلى قازاق باستاعان ءداۋىردىڭ جۇگىن كوتەرۋ، كوتەرىسۋ باقىتى دا ءبىزدىڭ بۋىننىڭ پەشەنەسىنە بۇيىرعانى تاريحي اقيقات.

اقان قۇسايىن ۇلى بيجانوۆ – وسى كەزەڭدە حالىققا ەسىمى كەڭ تانىلعان سونداي مەملەكەت جانە قوعام قايراتكەرلەرىنىڭ ءبىرى. نە ىستەسە دە اسىقپاي، «سەگىز ولشەپ، ءبىر پىشۋگە» ەرتە كەزدەن بويى مەن ويى ابدەن داعدىلانعان، ۇستانىمى بەرىك جاننىڭ ومىرلىك جولىنا ۇڭىلگەن، ونىمەن كۇندەلىكتى تىرشىلىك اعىسىندا ارالاسقان، قىزمەتتەس بولعان كەز كەلگەن اداممەن تىلدەسە قالساڭىز، ءبىرىنشى ايتاتىن ءسوزى: «سابىرلى، سىرباز مىنەزدى كىسى». ءوز باسىم وسى سوزدەرگە: «ىسىنە تياناقتى، بىرەۋدىڭ الا ءجىبىن اتتامايتىن، وبال-ساۋاپ دەگەن ۇعىمداردى جادىنان شىعارمايتىن، جاۋاپكەرشىلىكتى ءومىرىنىڭ كرەدوسىنا اينالدىرعان قوعامشىل، مەملەكەتشىل، بيىككە كوتەرىلگەن بىلىكتى باسشى، بەدەلدى تۇلعا» دەگەن انىقتامالاردى قوسار ەدىم.

ولاي دەيتىنىم، مەن اقان بيجانوۆتى اتى جۇرت اۋزىنا ىلىگە قويماعان انا عاسىردىڭ جەتپىسىنشى جىلدارىندا ەڭبەك جولىن الماتى قالاسىنىڭ تەمىر-بەتون بۇيىمدارىن شىعاراتىن زاۋىتىندا ينجەنەر-ەلەكترمەحانيك بولىپ باستاعان جىگىت كەزىنەن بىلەمىن.

العاش كورگەنىمدە ادەمىشە كەلگەن اققۇبا ءوڭدى جىگىتتىڭ ءوزىن-ءوزى ۇستاۋىنان جۇمىسشى ورتاسىندا جۇرەتىن قاراپايىم ەڭبەك ادامىنان گورى جۇزىنەن بەكزاتتىق ءبىتىم مەنمۇندالاپ تۇراتىن ينتەلليگەنتتىك تاربيەنىڭ نىشانى كوبىرەك اڭعارىلاتىنداي ەدى. ءجۇرىسى سىپايى، ءسوزى وتكىر جاس جىگىتتى زاۋىتتاعى ارىپتەستەرى كومسومول كوميتەتىنىڭ جەتەكشىلىگىنە ۇسىنعان ەكەن. ودان سوڭ... اۋداندىق كوميتەت قۇرامىنا سايلانادى. بىلىكتى، ءبىلىمدى جاس جىگىت 1976 جىلى پارتيالىق قىزمەتكە جىبەرىلەدى. كيروۆ اتىنداعى اسا ءىرى ماشينا جاساۋ زاۋىتىندا اۋداندىق پارتيا كوميتەتىمەن تەرەزەسى تەڭ پارتكوم حاتشىسىنىڭ ورىنباسارى، سونان سوڭ الاتاۋ اۋداندىق اتقارۋ كوميتەتىنىڭ ورىنباسارى، الاتاۋ اۋداندىق اتقارۋ كوميتەتىنىڭ توراعاسى، وسى اۋداندىق پارتيا كوميتەتىنىڭ ءبىرىنشى حاتشىسى قىزمەتتەرىن اتقارادى.

اقان قۇسايىن ۇلى كوپ تە ەمەس، از دا ەمەس، وسىنداي ماڭدايىنا بۇيىرعان كەزەڭ ىشىندە ءوزى ءوسىپ-ءونىپ، كوگەرىپ-كوكتەگەن ۇلى شاھاردا قۇداي قوسقان قوساعى عاليامەن قول ۇستاسا ءجۇرىپ، تىرشىلىك دەيتىن كوك تەڭىزدە بىرگە جۇزەدى. وتباسى باقىتىنا كەنەلەدى. ۇرپاق سۇيەدى. قوعامدىق ورتاعا ەركىن ەنىپ، ەل تىزگىنىن ۇستار قىزمەتتەردى ابىرويمەن اتقارادى. قابىلەتتى باسشى بيىگىنە كوتەرىلەدى. وسى جىلداردا ول بىرنەشە مارتە اۋداندىق، قالالىق حالىق كەڭەستەرىنىڭ دەپۋتاتى بولىپ سايلانىپ، استانالىق شاھاردىڭ الەۋمەتتىك-ەكونوميكالىق دامۋىنا قاتىستى الۋان-الۋان ماسەلەلەردى شەشۋگە قىزۋ اتسالىسادى، ءوزىنىڭ ۇلەسىن قوسادى.

ءبىر سوزبەن ايتقاندا، ابايدان قالعان «اقىرىن ءجۇرىپ، انىق باسۋ» مەكتەبىنەن وتكەن، پاراسات-پايى­مى تەرەڭ، جاراتىلىسىنان حالىقشىل، قايراتكەر ازامات «ەل باسىنا كۇن تۋىپ، ەتىگىمەن سۋ كەشكەن» جەلتوقساننىڭ جۇرەك قارىپ، جاندى مۇزعا بولەگەن قيىن-قىستاۋلى كەزەڭىندە دە، قازاق ەلى بۋىنىپ-ءتۇيىنىپ، كۇرەس جولىن تاڭداعان تاۋەلسىزدىكتىڭ الماعايىپ مىنەزدى العاشقى جىلدارىندا دا ۇلتتىق قالىبىمىزدى تانىتار ەلدىك پەن ەڭبەكتىڭ ورىنەن كورىنە بىلەدى.

ول 1992 جىلى الماتى قالالىق كەڭەستەگى دەپۋتاتتاردىڭ توراعاسى بولىپ سايلانادى. وتپەلى كەزەڭنىڭ ءورتى مەن سۋىن قاتار كەشەدى. الماتى قالالىق اكىمشىلىگىندە اكىمنىڭ ءبىرىنشى ورىنباسارى قىزمەتىن اتقارادى. 1994 جىلى قازاقستان رەسپۋبليكاسى جوعارعى كەڭەسىنىڭ دەپۋتاتى بولا ءجۇرىپ، پارلامەنت جانىنان قۇرىلعان «حالىق بىرلىگى» وداعىنىڭ دەپۋتاتتىق فراكتسياسىنا جەتەكشىلىك جاسايدى. كەلەسى جىلى حالىق بىرلىگى پارتياسى ورتالىق كوميتەتىنىڭ توراعاسى قىزمەتىنە سايلانىپ، رەسپۋبليكانىڭ ساياسي ومىرىنە بەلسەنە ارالاسادى. وتپەلى دەيتىن ءورتى قالىڭ كەزەڭدە تاۋەلسىزدىگىن جاڭا جاريالاعان جاس مەملەكەتتىڭ اياعىنان تۇرىپ كەتۋى قيىنعا سوققانى بەلگىلى. تۇڭعىش قازاق پرەزيدەنتىنىڭ يىعىنا تۇسكەن اۋىر جۇكتى بولىسۋگە مۇددەلى تۇلعالار قاتارىنان تابىلعان جاڭا پارتيانىڭ باسشىسى ساياسي كەڭىستىكتە ءوزىنىڭ سابىرىن سەرىك ەتە بىلەر ۇستامدىلىعىمەن، مول بىلىمىمەن، تەرەڭ پاراساتىمەن كوزگە تۇسەدى.

1999 جىلى ساياسي كۇشتەردى شوعىرلاندىرۋ ماقساتىندا رەسپۋبليكالىق «وتان» ساياسي پارتياسىنىڭ قۇرىلعانى بەلگىلى. اقان بيجانوۆ باسقارعان «حالىق بىرلىگى» پارتياسى «وتاننىڭ» قۇرامىنا ەنەدى. بۇل پارتيانىڭ بىرتە-بىرتە بۇگىنگى ەلباسى باسقاراتىن ەلىمىزدەگى تەگەۋرىندى ساياسي ۇيىمعا اينالعانى، «نۇر وتان» حالىقتىق-دەموكراتيالىق پارتياسى بولىپ قۇرىلعانى ءمالىم. تاۋەلسىز قازاق ەلىنىڭ تاعدىرشەشتى كەزەڭىندە ەرەكشە ءرول ويناعان ساياسي ۇيىمداردىڭ قۇرىلۋىندا، ولاردىڭ بىرتە-بىرتە سۇرىپتالىپ، ىرىكتەلىپ، «نۇر وتان» ەسىمدى قۋاتتى ساياسي كۇشكە اينالۋىندا بىردە باسشى، بىردە قوسشى بولا ءجۇرىپ، ءوزىنىڭ قايراتكەرلىك قارىمى مەن ازاماتتىق دارىنىن ورنىمەن جۇمساي بىلگەن ساياساتكەر-ۇيىمداستىرۋشى، تاباندى تۇلعا، تياناقتى باسشى بولىپ قالىپتاسادى، ىسكەرلىك قابىلەتى شىڭدالا تۇسەدى.

1995 جىلى بيجانوۆتى مەملەكەت باسشىسى قازاقستان رەسپۋبليكاسى پرەزيدەنتىنىڭ كومەكشىسى قىزمەتىنە شاقىرادى. اقان قۇسايىن ۇلى ەلباسىنىڭ قاسىندا ءجۇرىپ، مەملەكەت باسشى­سى­نىڭ سەنىمدى سەرىكتەرىنىڭ بىرىنە اينالادى. پرەزيدەنت اكىمشىلىگىندە ىشكى ساياسات جانە قوعامدىق-ساياسي ءبولىمىنىڭ مەڭگەرۋشىسى قىزمەتىن اتقارادى. وسى ۋاقىت ارالىعىندا ا.بيجانوۆ ۇلتارالىق كەلىسىم مەن ءوزارا تۇسىنىستىك، حالىقتار اراسىنداعى تاتۋلىق، قازاقستان حالقىنىڭ بىرلىگى مەن دەموكراتيالىق ۇردىستەردىڭ دامۋى ماسەلەلەرىنە وزىندىك ۇلەسىن قوسا بىلەدى.

ەل تاۋەلسىزدىگىنىڭ باستاۋىندا تۇرعان تۇڭعىش قازاق پرەزيدەنتىنىڭ جانىندا جۇرگەن كومەكشىسى رەتىندە ول الەمنىڭ كوپتەگەن ەلىن ارالايدى. تالاي القالى جيىندار وتكىزۋگە ارالاسىپ، مەملەكەتتىك جانە رەسمي ساپارلاردىڭ قۇرامىنا كىرەدى. ول بەس جىلداي الماتى قالالىق اكىمىنىڭ ورىنباسارى قىزمەتىن اتقارادى. وڭتۇستىك استانانىڭ الەۋمەتتىك، مادەني دامۋىنا، ۇلت ادەبيەتى مەن ونەرىنىڭ، عىلىمى مەن ءبىلىمىنىڭ وشاعى سانالار، قارجى كوزدەرى ورنالاسقان، ءدۇمپۋى قاتتى ساياسي كۇشتەر شوعىرلانعان ءىرى مەگاپوليستەگى قوعامدىق-ساياسي ماسەلەلەردىڭ تۇراقتالۋىنا، جۇرتشىلىقتىڭ تۇرمىستىق جاعدايىنىڭ جاقسارۋىنا قاتىستى وزەكتى ماسەلەلەردىڭ وڭ شەشىلۋىنە قۇلشىنا ارالاسىپ، بارىنشا ىقپال ەتە بىلەدى.

ءيا...

ءومىر ءبىر ورنىندا تۇرمايدى.

ىلگەرىلەۋ، العا جىلجۋ – ءومىردىڭ، قوعامنىڭ مىنەزى. تابيعي زاڭدىلىق.

دۇنيەلىك قۇبىلىستاردىڭ بارلىعىنا فيلوسوفيالىق تۇرعىدان ۇستامدى قارايتىن ازاماتتىڭ دا باسىنان وسى جىلدار ىشىندە ون سان وزگەرىستەر ءوتتى. ول 2005 جىلى تامىزدا بالامالى نەگىزدە پارلامەنت سەناتىنا دەپۋتات بولىپ سايلانىپ، سول جىلى سەناتتىڭ حالىقارالىق ىستەر، قورعانىس جانە قاۋىپسىزدىك جونىندەگى تۇراقتى كوميتەتىنىڭ توراعاسى قىزمەتىن اتقارادى. بۇل ىسكەر ازاماتقا سول تۇستاعى پارلامەنت سەناتىنىڭ توراعاسى مەن ارىپتەستەرى تاراپىنان كورسەتىلگەن سەنىمنىڭ ايقىن نىشانى-تىن. وسى كوميتەت جۇمىسىنا جەتەكشىلىك جاساي ءجۇرىپ، بيجانوۆ ۇلت توپىراعىندا ەندى-ەندى قالىپتاسىپ كەلە جاتقان پارلامەنتاريزم ينستيتۋتىنىڭ سىرى مەن جۇمباق تۇستارىنا بويلايدى. ول ىشكى ساياسات پەن سىرتقى ساياساتتىڭ اجىراعىسىز بىرلىكتە ءوربيتىن ءبىرتۇتاس مەملەكەتتىڭ قوس قاناتى ەكەنىن سەزىنەدى. سەزىنىپ قانا قويماي، ەلدىڭ ىشكى، سىرتقى ساياسي تۇتاستىعىنىڭ قالىپتاسۋىنا سەبەپكەر بولعان ءابىش كەكىلباەۆ، ومىربەك بايگەلدي، ورالباي ابدىكارىموۆ، قۋانىش سۇلتانوۆ، نۇرتاي ابىقاەۆ، مۇحتار التىنباەۆ، قايرات ءمامي، ءادىل احمەتوۆ، ت.ب. سەكىلدى كورنەكتى مەملەكەت جانە قوعام قايراتكەرلەرىمەن تىزە قوسا وتىرىپ، كورنەكتى ديپلومات، ايتۋلى مەملەكەت قايراتكەرى، سەنات توراعاسى قاسىم-جومارت كەمەل ۇلى توقاەۆتىڭ باسشىلىعىمەن سەنات قابىرعاسىندا جەمىستى ەڭبەك ەتەدى. ءوز باسىم بيجانوۆ سەناتور، كوميتەت توراعاسى بولعان جىلداردا قاسىم-جومارت كەمەل ۇلىمەن تىعىز، ىنتىماقتا جۇمىس ىستەگەنىنىڭ سان كۋاسى بولعان اداممىن.

ء«جۇرىسى تازا، ەڭبەگى ادال، مىنەزىندە ءمىن جوق ءبىر ادام بولسا، وسى ازامات-اۋ» دەگەن ويعا ەرىكسىز جەتەلەر اقان قۇسايىن ۇلىنىڭ كوپ زامانداستارى قىزىعا قارايتىن، بىراق كوپ ايتىلا بەرمەيتىن ءبىر اقيقات بار. ول بالكىم زامانداس-ىنىمىزگە تاۋەلسىزدىك ءداۋىرىنىڭ بەرگەن تارتۋى بولار؟! قاراپ وتىرساق، اقان بيجانوۆتىڭ ماڭدايىنا سوناۋ ازاتتىقتىڭ ەلەڭ-الاڭ كەزىندە العاشقى قازاق پرەزيدەنتىنە العاشقى كومەكشىلەردىڭ ءبىرى بولۋ باقىتى جازىلسا، قازاق ەلىنىڭ ەكىنشى پرەزيدەنتىمەن سەنات قابىرعاسىندا ءجۇرىپ، بىرگە قىزمەت ەتۋ نەسىبەسى بۇيىرىپتى...

ا.بيجانوۆ وسى جىلدارى ەكىنشى ماماندىقتى مەڭگەرىپ، جوعارى پارتيا مەكتەبىن قىزىل ديپلوم­مەن بىتىرەدى، گۋمانيتارلىق ءبىلىم بويىنشا ساياسات­تانۋ سالاسىنىڭ مامانى بولادى. وسى سالادا دوكتورلىق قورعاپ، ۇلى دالا جۇرتىنىڭ ارعى-بەرگى تاريحىن تاۋەلسىزدىك ءداۋىرىنىڭ بۇگىنگى جاڭا تاريحىمەن ساباقتاستىرادى. وتكەننىڭ وزەك ورتەر وكىنىشتەرىن جاڭا جاھاندانۋ دەيتىن جاراتىلىسى كۇردەلى ءداۋىر بيىگىنەن سارالاي وتىرىپ، ساياسي، عىلىمي تۇجىرىمدار ايتۋعا ۇمتىلادى.

بالكىم... عىلىم مەن ءومىر اقيقاتىن، عىلىم مەن قوعام اعىسىن تاپ باسىپ ۇستاپ، جان-جاقتى تالداۋلارعا باتىل بارا بىلگەندىكتەن دە بولار، وسىدان ءبىر جىلدان استام ۋاقىت بۇرىن اقان قۇسايىن ۇلى بيجانوۆ تىزگىنىن ۇستاعان فيلوسوفيا، ساياساتتانۋ، ءدىنتانۋ ينستيتۋتى ءوزىنىڭ جاڭا كەزەڭىن باستاپ جاتقانداي اسەرگە بولەيدى.

ول اتالمىش ينستيتۋتقا قىزمەتكە كەلەر-كەلمەستەن ەلىمىزدە لاتىن الىپبيىنە كوشۋ تۋرالى ەلباسى شەشىمى شىقتى. بىلە بىلگەنگە قازاق ءتىلىن لاتىن الىپبيىنە كوشىرۋ اسا ماڭىزدى مەملەكەتتىك شارا ەدى. مەملەكەت باسشىسى قابىلداعان باتىل شەشىم ينستيتۋت تاراپىنان قىزۋ قولداۋ تاۋىپ، از ۋاقىت ىشىندە قىرۋار ءىس تىندىرىلدى. بۇل يگى شارانىڭ باسى-قاسىندا ينستيتۋت ديرەكتورى اقان بيجانوۆ بولدى. كوپ جۇمىس اتقارىلدى. از ۋاقىت ىشىندە بىرنەشە كىتاپ، عىلىمي ەڭبەكتەر، مونوگرافيالار جارىق كوردى. ينستيتۋت تۇركيا، ازەربايجان، وزبەكستان ەلدەرىنىڭ تاجىريبەسى نازارعا الىندى. ءتيستى جەرلەرگە ۇسىنىستار بەرىلدى.

ءيا...

فيلوسوفيا، ساياساتتانۋ جانە ءدىنتانۋ ينس­تي­تۋتى – ەلىمىزدەگى تانىمال جوعارى كاسىبي، عىلىمي-زەرتتەۋ ورتالىعى.

بيجانوۆ باسشىلىق ەتەتىن عىلىمي مەكەمەدە جۇرگىزىلەتىن كەشەندى عىلىمي زەرتتەۋلەر ادامنىڭ سانا-سەزىمىن، رۋحاني جەتىلۋى مەن شىعارماشالىق جاسامپازدىعىن، ءبىلىم مەن عىلىم ماسەلەلەرىن جان-جاقتى تالداۋعا نەگىزدەلگەن. سوڭعى ۋاقىت ارالىعىندا ادام كاپيتالىن الەۋمەتتىك-فيلوسوفيالىق تۇرعىدان زەرتتەۋگە ارنالعان الدەنەشە ۇجىمدىق مونوگرافيالار مەن عىلىمي ماقالالاردىڭ جارىق كورىپ، عىلىمي-كوپشىلىكتىڭ سۇرانىسىن تۋدىرۋى، اينالىمعا ەنۋى – سونىڭ ايعاعى. قالىپتاسقان ءداستۇرى مەن ۇلت عىلىمىندا ءوزىنىڭ وقشاۋ ورنى بار ينستيتۋت جاڭارۋ جولىندا كەلە جاتقانى انىق. ينستيتۋت قازىرگى تاڭدا كوپتەگەن ەلمەن عىلىمي قاتىناسىن ءوربىتىپ وتىر. رەسەي، بەلارۋس، ازەربايجان، قىرعىزستان، قىتاي، گەرمانيا، اقش، تۇركيا، يران، وزبەكستان، تاجىكستان جانە باسقا دا ەلدەردىڭ عىلىمي-زەرتتەۋ ورتالىقتارىمەن تىعىز عىلىمي ىنتىماقتاستىعىن ورنىقتىرىپ كەلەدى.

اقان بيجانوۆ – كەز كەلگەن ورتانى جاتسىنباي، جىلى مىنەزىمەن، مەيىرىمدى كۇلكىسىمەن، پاراساتتى قالىبىمەن بىردەن باۋراپ اكەتەتىن جاراتىلىسى تازا جان. ول وزىنەن ۇلكەن اعا بۋىنعا كول-كوسىر ءىلتيپاتىن ىرىكپەيتىن، سوڭىنان ەرگەن جاس بۋىنعا قاشان كورسەڭ «قاراعىم»، «شىراعىم» دەگەن شۋاعى مول سوزدەرىنەن جاڭىلمايتىن مادەنيەتتىڭ يەسى. ونىڭ بۇل قاسيەتتەرىنە سەناتتا بىرگە بولعان جىلداردا كوزىم جەتتى. باسشى بوپ قاراماعىنداعى قىزمەتكەرلەرگە ورىنسىز داۋىس كوتەرگەنىن كورمەپپىن. سويتە تۇرا كوميتەتتەگى ءار ادامنىڭ نە ءبىتىرىپ، نە بىتىرە الماي جۇرگەنىن قاداعالاي بىلەتىن، قاجەتتى جەرىندە «سۇيەكتەن وتكىزىپ»، ءسوزىن ءمىردىڭ وعىنداي ەتىپ جەتكىزە دە بىلەتىن... اسىرەسە جاستاردىڭ جۇمىس ىستەۋى مەن جاۋاپكەرشىلىگىن نازاردا كوبىرەك ۇستايتىنىنا ىشتەي ريزا بولاتىنمىن.

استانادا، سەناتتا ءجۇرىپ، كەيدە بيجانوۆ بويىنداعى وسى قاسيەتتەردى كورگەندە، جادىم جاڭعىرىپ، كوكىرەگىمنىڭ تورىندە تۇمارداي بولىپ ساقتالعان الماتى مەن اينالايىن الاتاۋ ەسكە تۇسەتىن ەدى. ماسەلە الاتاۋدا دا ەمەس، الماتىدا دا ەمەس. ماسەلە، سول الاشتىڭ ۇلى قالاسىنا دەگەن قۇرمەت پەن ىقىلاستىڭ كوزىندەي بولعان ءار ءۇي، ءار كوشەسىندە ءبىر ءداۋىردىڭ ىزىندەي بولىپ قالعان اعا بۋىننىڭ ءومىر ءسۇرۋ، ەلمەن ارالاسۋ، حالىق جۇرەگىنە جول تابۋ مەكتەبىنىڭ مىقتىلىعىندا...

اقان قۇسايىن ۇلى الماتىدا اكىمنىڭ ورىنباسارى قىزمەتىن اتقارعان كەزدە وڭتۇستىك استانانىڭ اقساقالدارىمەن، اعا بۋىن وكىلدەرىمەن قويىن-قولتىق ارالاسىپ، ىقىلاسپەن جۇمىس ىستەگەنى ەسىمدە. ول كەزدە ەكى ءداۋىر اقيقاتىن تەڭ كورىپ، تەڭ يگەرگەن اقساقالدار مەن اعالاردىڭ ەل ءتورىنىڭ كوركى بولىپ وتىرعان كەزى. قايران اعالار-اي! نارقاسقالار-اي! ارقايسىسى ءبىر-ءبىر اۋىل، ءبىر-ءبىر اۋدان ەمەس، ءبىر-ءبىر ايماقتى، قالا بەردى قازاقتى اۋزىنا قاراتارداي سويلەسە – سوزگە، ويلاسا – ويعا دەس بەرمەس جۇيرىك كىسىلەر ەدى. ناعىز ەل اعالارى ەدى! سول اقەدىل مىنەزدى اعالارىمنىڭ ورتاسىنان بۇگىن مەن ءۇشىن ورنى بولەك، بەكزات مىنەزدى، بايسال ءجۇرىستى قۇسايىن بيجانوۆ ەسىمدى اقساقال ءتۇسىپ وتىر. قازاق «سوزىنەن، مىنەزىنەن اڭعاراسىڭ. تەكتىدەن شىققان!» دەپ جاتادى. اقاننىڭ اكەسى قۇسايىن بيجانوۆ الماتى وبىلىسىنىڭ بىرقاتار اۋدانىندا باسشىلىق قىزمەت اتقارعان، حالىققا قادىرى اسقان، جەتىسۋ جۇرتىنا تانىمال، سوعىس ارداگەرى، قوعامعا كىرشىكسىز قىزمەت ەتكەن بەدەلدى كىسى ەدى. شاماسى، اقان بويىنداعى ىزگى قاسيەتتەر مەن مىنەزدەر سول اكە سۇيەگىمەن سىڭگەنى ءشۇباسىز. قالاي دەگەندە دە «اكە كورگەن وق جونار، شەشە كورگەن تون پىشەر» دەگەن ەسكىنىڭ ەستى سوزىنە وسىندايدا ەرىكسىز دەن قوياسىڭ، يلاناسىڭ...

ماقالا باسىندا ايتىلعان «ەلۋ جىلدا – ەل جاڭا، ءجۇز جىلدا – قازان» دەگەن اتالى سوزگە قايتا ورالىپ، ويىمدى تۇيىندەگىم كەلەدى.

ءيا...

ەلىنىڭ ورتاسىندا ۋاقىت وزگەرسە دە، ءوزىنىڭ ءتۋابىتتى مىنەزىنەن وزگەرمەي، سابىر مەن بەكزاتتىق بىتىمىنە كولەڭكە تۇسىرمەي تاۋەلسىز قازاقستانعا قىزمەت ەتىپ كەلە جاتقان زامانداس-ءىنىمىز، ەلگە بەلگىلى مەملەكەت جانە قوعام قايراتكەرى، عالىم، ساياسي عىلىمدار دوكتورى، اكادەميك، جاراتىلىستانۋ عىلىمدارى اكادەمياسىنىڭ پرەزيديۋم مۇشەسى، ەۋروپا كەڭەسى پارلامەنتتىك اسسامبلەياسىنىڭ وكىلى جانە ۇجىمدىق قاۋىپسىزدىك كەلىسىمشارت ۇيىمىنىڭ ساياسي ماسەلەلەر مەن حالىقارالىق ىستەر جونىندەگى قازاقستاندىق تۇراقتى كوميسسياسىنىڭ جەتەكشىسى قىزمەتىن اتقارعان، «پاراسات»، «قۇرمەت»، «سودرۋجەستۆو» وردەندەرى مەن بىرنەشە مەدالداردىڭ، قۇرمەت گراموتالارىنىڭ يەگەرى اقان بيجانوۆ بۇگىندە كەمەل جاستىڭ بيىگىنە كوتەرىلىپ وتىر.

ازاماتتىق ۇستانىمىنا كولەڭكە تۇسىرمەي كوتەرىلىپ وتىر.

 

نۇرلان ورازالين،

اقىن، قازاقستان رەسپۋبليكاسى مەملەكەتتىك سىيلىعىنىڭ لاۋرەاتى

 

سوڭعى جاڭالىقتار

اۋدان ءومىرىنىڭ ايناسى

ايماقتار • بۇگىن، 07:27

ارمان الاسارماسىن

رۋحانيات • بۇگىن، 07:22

ديقان ديزەلدى تومەن باعاعا الادى

ەكونوميكا • بۇگىن، 07:11

كوروناۆيرۋسسىز قوستاناي

ايماقتار • كەشە

ۇقساس جاڭالىقتار