مىنە, بىرنەشە كۇن بولدى, قىرعىز ەلىنىڭ ىستىقكول وبلىسىنداعى جەڭىس شىڭىنا شىعىپ, توسىننان بۇزىلعان تابيعات رايىنىڭ قۇرساۋىندا قالعان قازاقستاندىق الپينيستەر جان-جاقتى ىزدەستىرىلىپ جاتىر. ايىر قالپاقتى اعايىن جەنيش شوقىسى اتايتىن بۇل شىڭ – تيان-شان تاۋلارى جۇلگەسىندەگى ەڭ بيىك نۇكتە. ءتىپتى ەلىمىزدىڭ ەڭ جوعارى نۇكتەسى سانالاتىن حان تاڭىرىنەن دە جارتى شاقىرىمداي جوعارى ورنالاسقان. قۇدايدىڭ ۋىسىندا, ءتاڭىرتاۋدىڭ قۋىسىندا – قازاقستاندىق الپينيستەردىڭ قانداي قيىن جاعدايدا قالعانىن وسىدان-اق باعامداۋعا بولار. ولار, ناقتى ايتقاندا الماتىلىق مۇرات وتەپباەۆ پەن اندرەي كورنەەۆ سوڭعى رەت شىڭ باسىنان ءتۇسىپ كەلە جاتقاندا, 6600 مەتر بيىكتىكتەن راديوبايلانىس ارقىلى حابارلاسىپ, ارىپتەستەرى الەكساندر چەچۋليننىڭ وكپەسىنە تيگەن سۋىقتان قازا بولعانىن, وزدەرىنىڭ شاتىرلارىن تاۋدىڭ دولى جەلى ۇشىرىپ كەتكەندىكتەن, قاردى ارشىپ پانالاعاندارىن جەتكىزگەن. ولار وقىس جاعدايعا 15 تامىزدا تاپ بولعان ەدى. ودان بەرى ءبىر اپتا ءوتتى. قۇتقارۋشىلار تاۋداعى قاتاڭ كليماتتىڭ قايتا-قايتا بۇزىلۋىنان ىزدەستىرۋ-قۇتقارۋ جۇمىستارىن ءالسىن-ءالسىن توقتاتۋلارىنا تۋرا كەلدى, دەگەنمەن تىكۇشاقتار ارقىلى تاۋدىڭ ءتوسىن الدەنەشە مارتە اينالا ۇشىپ شىقتى. ال الماتى الپينيزم فەدەراتسياسى ارىپتەستەرىن ەندىگى قۇتقارۋ مۇمكىندىگى دە قالماعانىن مالىمدەدى. ولار ءتىپتى 21 تامىزدا تىكۇشاقپەن سوڭعى مۇمكىندىكتى پايدالانىپ كورگەننەن سوڭ ىزدەۋ-قۇتقارۋ جۇمىستارى توقتاتىلاتىنىن جەتكىزىپ, الپينيستەردىڭ ەت جاقىندارىنا كوڭىل دە ايتتى.
الماتىلىق الپينيستەر 18 تامىزدا بازالىق لاگەرگە ورالماعان سوڭ قازاقستاندىق اسكەري الپينيستەر ماقسۇت جۇماەۆ, امانجول راحمەتوۆ جانە ۆاسيلي پيۆتسوۆ 19 تامىزدا قىرعىزستانعا باعىت الىپ, 2,2 مىڭ مەترلىك بيىكتىكتەگى بازالىق لاگەرگە جەتكەن بولاتىن. كومەككە قىرعىزستاندىق جانە رەسەيلىك الپينيستەر دە قوسىلدى. 20 تامىزدا ەلىمىزدىڭ ءىىم توتەنشە جاعدايلار كوميتەتىنىڭ تىكۇشاعى قۇتقارۋشىلار توبىن 4,5 مىڭ مەتر بيىكتىكتەگى بازالىق لاگەرگە جەتكىزدى. ولار ءارى قاراي جاياۋ ورلەدى. الايدا, الپينيستەر توبى مەن جوعالعان سپورتشىلاردىڭ تۋىسقاندارى مىنگەن تىكۇشاقپەن تەپلوۆيزور قۇرالىن قولدانا وتىرىپ, 5200-6400 مەتر بيىكتىكتە جۇرگىزىلگەن ىزدەۋ جۇمىستارى ناتيجەسىز اياقتالدى. الپينيستەردى قۇتقارۋ وپەراتسياسى كەشە قايتا جالعاستى. توتەنشە جاعدايلار كوميتەتىنىڭ وكىلدەرى بىرنەشە كۇنگى تولاسسىز جاۋىن-شاشىننان سوڭ تاۋداعى تابيعات رايى دا سىڭعىرلاپ, ەرەكشە اشىق بولىپ تۇرعانىن حابارلادى. جوعالعان الپينيستەردىڭ تۋعان-تۋىستارى دا ءۇمىت ۇزبەي, ىزدەۋ جۇمىستارىن توقتاتپاۋدى جانۇشىرا سۇراپ وتىر.
شىركىن, ءۇمىت! ادامنىڭ ءۇمىتى سونبەسىن! ءۇمىت – ۇلكەن كۇش. ءۇمىت – داتكە قۋات. ءۇمىت العا جەتەلەيدى.
ادامزاتتىڭ اياعى تيمەگەن جەر بار ما؟ پلانەتانىڭ بيىك نۇكتەلەرىن وسى جەتىمىڭدىق, سەگىزمىڭدىق كوككە شانشىلعان شىڭىلتىر شىڭدار قۇراسا, سونىڭ تۇگەلىنە دەرلىك ادام بالاسىنىڭ تابانى تيگەن. ءتىپتى شەت-شەگى جوق عارىش ساپارلارىنان دا, مۇحيت تۇبىندەگى الدەنەشە ميللياردتاعان توننا سۋدىڭ قىسىمى بار تەرەڭ ويپاتتارعا دا بارىپ, ءدىن امان ورالىپ ءجۇر. بىراق ونىڭ بارىندە ادام اقىل-ويىنىڭ تاماشا جەتىستىكتەرىنەن تۋعان تەحنولوگيا پايدالانىلادى. ال جالاما جارتاستاردا جانىڭدى جالداپ, جانكەشتىلىكپەن قىران قانات قاعا الماس قياعا شىعۋ, اتموسفەرانى اتتاپ ءوتىپ, وتتەگىدەن ادا, تىنىس الۋ مۇمكىن ەمەس كەڭىستىككە كوتەرىلۋ, باس اينالار قۇلاما قۇزداردان قۇلاپ كەتپەي, شورلانعان كوك مۇزدى, قاسات قاردى قاق جارا تىكە ورلەۋ, اقىرعان ايازبەن ارپالىسا, دولدانعان داۋىلمەن دوداعا تۇسە اسپانتاۋلاردىڭ القىمىندا العا جىلجۋ ءۇشىن سارقىلعان كۇشكە دارمەن بەرەتىن, سانسىراعان ساناعا قۋات بەرەتىن نە قۇدىرەت؟ بۇل – رۋح! ادامعا عانا ءتان جاسامپاز رۋح! قانشا فيزيكالىق تۇرعىدان مۇمكىن بولماسا دا, عايىپتان تايىپ ءبىر بولاتىن عالامات ادام رۋحىنىڭ ومىرشەڭدىگىنەن ۇمىتتەنگىڭ كەلەدى... ءبىزدىڭ الپينيستەرىمىزدى دە ساقتاسا, وسى ءبىر ايالى ءۇمىت, توزباس رۋح ساقتايدى!
