د.ءال-امااني قازاقستاندىق كومپانيالاردى 3-7 قازان ارالىعىندا جيددا قالاسىندا وتەتىن «HALAL EXPO» كورمەسىنە شاقىردى. سونداي-اق ول قازاقستاننان قىزىعۋشىلىق تانىتىپ قاتىسۋعا دايىندىقتارىن بىلدىرگەن كومپانيالارعا ۇيىمداستىرۋشىلىق شارالارى بويىنشا جان-جاقتى كومەك پەن جەڭىلدىكتەر جاساۋعا دايىندىقتارىن جەتكىزدى. كەزدەسۋ بارىسىندا تاراپتار ەكى ەل اراسىنداعى ساۋدا-ينۆەستيتسيالىق بايلانىستاردى كەڭەيتۋدىڭ جولدارى مەن قازاقستاندا حالال ازىق-ت ۇلىك ءوندىرىسىن دامىتۋ مۇمكىندىكتەرىن تالقىلادى.
كورمەنى وتكىزۋدىڭ ماقساتى – قاتىسۋشىلارعا يسلام الەمىندەگى حالال وندىرىسپەن اينالىساتىن جانە قىزمەت كورسەتەتىن كومپانيالار اراسىندا ىسكەرلىك بايلانىستار ورناتۋ, تاجىريبەلەرىمەن ءبولىسۋ, ونىمدەرى مەن قىزمەتتەرىن ۇسىنۋعا جاڭا نارىقتار تابۋ, قىزمەتتەرىن ودان ءارى دامىتۋ جولىندا تاپ بولىپ وتىرعان پروبلەمالاردى شەشۋ جولدارىن تالقىلاۋ, پەرسپەكتيۆالى ينۆەستيتسيالىق جوبالاردى ۇسىنۋ جانە بىرلەسكەن كومپانيالار قۇرۋعا مۇمكىندىكتەر جاساۋ بولىپ تابىلادى.
ءوز كەزەگىندە ب.ارىن د.ءال-ءاماانيدىڭ كورمەگە شاقىرۋىنا جانە ءوز تاراپتارىنان ۇيىمداستىرۋشىلىق شارالاردىڭ بارلىق ماسەلەلەرى بويىنشا كومەك بەرۋگە دايىندىقتارىنا ريزاشىلىعىن بىلدىرە وتىرىپ, الداعى وتەتىن كورمەگە قازاقستاندىق كومپانيالاردىڭ قاتىسۋلارى بويىنشا ەلىمىزدەگى قۇزىرەتتى ورگاندارمەن پىسىقتاۋ جۇمىستار اتقارىلاتىندىعىن حابارلادى.
HALAL EXPO حالىقارالىق كورمەسىنە قاتىسۋ اۋىل شارۋاشىلىق سالاسىندا قىزمەت ەتەتىن قازاقستاندىق كومپانيالار ءۇشىن پارسى شىعاناعىنداعى اراب ەلدەرىنىڭ زور الەۋەتى بار نارىعىنا ءوز ونىمدەرىن شىعارۋعا مۇمكىندىك بەرەتىنى ءسوزسىز.
