قانداسىمىز بۇل جەكپە-جەكتە وسى جىلدىڭ ءساۋىر ايىندا مەكسيكالىق بوكسشى كريستيان وليۆاستان (16-5, 13 كو) جەڭىپ العان WBO Global مەن WBC Continental Americas ايماقتىق بەلدىگىن العاش رەت قورعادى. بوكس ماماندارى مەن بوكسشىلاردىڭ وزدەرى بەلدىكتى جەڭىپ الۋعا قاراعاندا, ونى قورعاپ قالۋ قيىن ەكەنىن ءجيى ايتادى. ەندى شە, كىمنىڭ بيىككە شىعىپ, تومەن قۇلاعىسى كەلسىن؟! بەلدىك قورعاپ قالۋدىڭ ماشاقاتى اۋىر ەكەنىن سەزىنگەن جانىبەك بۇل جەكپە-جەككە دايىندىقتى ەرتە باستادى. كەزدەسۋ ۋاقىتى شىلدە ايىنىڭ ورتاسىندا بەلگىلى بولسا دا, وتانداسىمىز اقش-قا ماۋسىمنىڭ سوڭىندا اتتاندى. بارا سالىسىمەن دايىندىعىنا كىرىسىپ, جاۋاپتى كەزدەسۋگە مۇقيات ازىرلەنگەنىن الەۋمەتتىك جەلى ارقىلى كورىپ, ءار قيىمىلىن باقىلاپ وتىردىق.
جانىبەكتىڭ بۇل ايقاستا جەڭىلۋگە حاقىسى جوق ەدى. سەبەبى ءبىرىنشى كەزەكتە وتانداسىمىزعا جانكۇيەر بولىپ وتىرعان قالىڭ قازاق ەلىنىڭ ارتقان سەنىمىن اقتاۋ كەرەك بولاتىن. ەكىنشىدەن, قانداسىمىزعا قارسىلاس اتانعان كانادالىق بوكسشى كۇنى كەشەگە دەيىن ءالىمحان ۇلىن سايقىمازاق بوراتقا تەڭەپ, ابدەن شامىنا تيگەن-ءدى. قازاقتىڭ قايسار ۇلى كانادالىقتىڭ بۇل قىلىعىنا سابىرمەن قاراپ, قارىمتاسىن سوزبەن ەمەس ىسپەن قايتارۋعا بەكىندى ءارى سولاي بولدى دا. جانىبەك ءالىمحان ۇلى بەس راۋندتىڭ ىشىندە كانادالىق ستيۋارت ماكلەللاندى ءۇش رەت نوكداۋنعا جىبەردى. تورەشى اراعا تۇسپەگەندە كانادالىقتىڭ ءحالى نە بولارىن كىم ءبىلسىن؟
اۋەلدە ەكى بوكسشى اراسىنداعى جەكپە-جەك 10 راۋندقا جوسپارلانعان بولاتىن. الايدا جانىبەك كەزدەسۋدى كوپكە سوزباي, بەسىنشى راۋندتا-اق اياقتاۋدى ءجون كوردى. ءبىرىنشى راۋندتاعى العاشقى سوققىنى قازاقستاندىق بوكسشى جاساعانىمەن, ستيۋارت ماكلەللاننىڭ باستاپقى قارقىنى قاتتى بولىپ كورىندى. بىراق جانىبەك ەكىنشى راۋندتا جەكپە-جەك تىزگىنىن مىقتاپ قولعا الدى. جاقسى سوققىلار جۇمساپ, سەريامەن دە ءساتتى جۇمىس ىستەدى. قورعانىستا دا ساۋاتتى بولدى. كەزەكتى ءبىر ءساتتى سوققىدان كەيىن كانادالىق بوكسشى نوكداۋنعا ءتۇسىپ قالدى. باسىمدىقتى راۋند سايىن ۇدەتە تۇسكەن جانىبەك بەسىنشى راۋندتا ماكلەللاندى ەكى رەت نوكداۋنعا جىبەردى. العاشقىسىندا كانادالىق تەز ەس جيىپ, ايقاستى جالعاستىرۋعا تىرىسقانىمەن, وتانداسىمىزدىڭ سەريالىق سوققىلارىنان كەيىن تورەشى جەكپە-جەكتى توقتاتۋعا ءماجبۇر بولدى.
وسىلايشا, جانىبەك بەلدىكتەرىن ءساتتى قورعاپ, الەم چەمپيونى اتاعى ءۇشىن تاعى ءبىر قادام جاسادى. كەشەگى جارقىن جەڭىسىنەن كەيىن ءالىمحان ۇلى ورتا سالماقتاعى توپ-50 بوكسشىنىڭ قاتارىنا كىرۋى ءتيىس. ەگەر جىل سوڭىنا دەيىن وتانداسىمىز تاعى ءبىر-ەكى جەكپە-جەك وتكىزەتىن بولسا, كەلەسى جىلدان باستاپ ءتورت بەلدىكتىڭ ءبىر تۇجىرىمى بويىنشا چەمپيوندىق بەلدىككە تالاسۋعا تولىق مۇمكىندىك تۋادى.
وتانداسىمىزدىڭ جەكپە-جەگىن تاماشالاعان امەريكالىق Boxingnews24.com باسىلىمىنىڭ ءجۋرناليسى بارري حولبرۋك جانىبەكتىڭ جەڭىسىن جوعارى باعالادى. «ورتا سالماقتىڭ بولاشاق جۇلدىزى جانىبەك ءالىمحان ۇلى (7-0, 3 كو) كەشەگى بوكس كەشىندە كانادالىق ستيۋارت ماكلەللاندى (27-4-3, 11 كو) ءۇش رەت نوكداۋنعا جىبەرىپ, ءوزىنىڭ مىقتىلىعىن تاعى ءبىر دالەلدەدى. وسى قارقىنىنان تايماسا, تەز ارادا الەم چەمپيونى بولاتىنىنا كۇمانىم جوق» دەيدى ول. وتانداسىمىزدىڭ جەكپە-جەگىن ESPN + تەلەارناسى ءبىرىنشى رەت تىكەلەي ەفيردە كورسەتكەنىن ايتا كەتەيىك. بۇل شەتەلدىك جانكۇيەرلەر اراسىندا جانىبەكتىڭ تەز تانىلۋىنا تاعى ءبىر مۇمكىندىك ەكەنى بەلگىلى.
26 جاستاعى وتانداسىمىز ءبىر جىلدىڭ ىشىندە اقش-تا بەس جەكپە-جەك وتكىزىپ, بەسەۋىندە دە ايقىن باسىمدىقپەن جەڭىسكە جەتتى.
