رۋحاني شارا بارىسىندا «عاسىرلارمەن ۇندەسكەن اسىل قازىنا» تاقىرىبىندا ادەبي-مادەني ەكسپوزيتسيالىق كورمە اشىلدى. س.تورايعىروۆ اتىنداعى وبلىستىق كىتاپحانانىڭ كورمە جانە مادەني شارالار ءبولىمىنىڭ جەتەكشىسى مارال تاجەنوۆانىڭ ايتۋىنشا, ەكسپوزيتسياعا قويىلعان سيرەك قورداعى باسىلىمدار اباي اتامىزدىڭ ءومىرى مەن شىعارماشىلىعىنا ارنالعان.
سەمەيدەن كەلگەن كورمە ءۇش بولىمنەن تۇرادى. ءبىرىنشى بولىمدە اباي وقىعان كىتاپتار, ەكىنشى بولىمدە اباي تۋرالى دەرەكتەر ساقتالعان كىتاپتار, ال ءۇشىنشى بولىمدە ابايدىڭ شىعارمالارى قويىلعان.
اباي اتىنداعى وبلىستىق كىتاپحانانىڭ قىزمەتكەرى مايگۇل سەيىتقاجىقىزى كورمەگە اكەلىنگەن سيرەك قورداعى 54 كىتاپ جايلى ايتىپ بەردى.
– كىتاپحانامىزدىڭ 136 جىلدىق تاريحى بار. اباي اتامىز وقىرمانى بولعان. ءبىزدىڭ ماقسات – كورمەگە كەلۋشىلەردى اقىن پايدالانعان XVIII عاسىردىڭ سوڭى مەن XX عاسىردىڭ باسىندا جارىق كورگەن قۇندى ادەبيەتتەرمەن تانىستىرۋ, – دەيدى مايگۇل سەيىتقاجىقىزى. – كورمەدە اباي اتامىزعا قاتىستى دەرەكتەر ساقتالعان جازبالار دا بار. مىسالى, كورمەدەن ءاليحان بوكەيحاننىڭ ابايعا جازعان قازاناماسى, ابايدىڭ ساناق كوميتەتىنىڭ مۇشەسى, باستاۋىش ءبىلىم بەرۋ قوعامىنىڭ مۇشەسى بولعاندىعى, وسى قوعامعا وتباسىمەن سالعان جارناسى تۋرالى جانە ورىس گەوگرافيالىق قوعامى جازبالارىندا ابايدىڭ قانشا مالى, جەرى بولعانى, جالپى مۇلكى تۋرالى دا قىزىقتى ءارى قۇندى دەرەكتەرمەن تانىسا الاسىز.
كورمەدەن راقىمجان جامانقۇلوۆ پەن ىقىلاس ادامبەكوۆتىڭ رەداكتورلىعىمەن 1936, 1939 جىلدارى باسىلعان لاتىن قارپىندەگى «تاڭدامالى» ولەڭدەرى مەن «اباي الەمى» جوباسى بويىنشا جارىق كورگەن ابايدىڭ قازاق جانە ورىس تىلدەرىندەگى شىعارمالارى ورىن العان.
كىتاپحانا قىزمەتكەرلەرى مايگۇل مالعاجدار, ولگا مالتسەۆانىڭ ايتۋلارىنشا, كورمەدە وقىرماندارىن قىزىقتىرعان كىتاپحانانىڭ سيرەك قورىندا 4 مىڭنان استام كىتاپ بار ەكەن.
ەندى وسىنداي قۇندى جادىگەر-كىتاپتارى بار كورمە نۇر-سۇلتان قالاسىنا جول تارتادى.
پاۆلودار
