بوكتەردەگى ساياباق تامىزدىڭ كۇيىن شىم-شىمداپ شەرتىپ, قۇستارى سايراپ, تيىندەرى سەكىرىپ ويناپ, كوز بەن كوڭىلدى بىردەي قىزىقتىرادى. وڭتۇستىك كورەيادان كەلگەن ءبىر توپ تۋريست جاسىل شىرشالار مەن گۇلزار باقتاردىڭ جانىندا سۋرەتكە ءتۇسىپ, ءوز تىلدەرىندە ءبىر-بىرىنە ءازىل ايتىپ ك ۇلىسىپ, ءماز-مەيرام بولىپ بارادى.
كوكتەرەكتىڭ كولەڭكەسىندەگى ساكىدە جاپادان جالعىز كىتاپ وقىپ وتىرعان مەنىڭ جانىما كەنەت, قايدان شىعا كەلگەنى بەلگىسىز, ەكى يىعى قۋشيعان, شۇڭىرەك كوز قارت كىسى تىزە بۇگىپ, وتىرا كەتتى. ءسويتتى دە قولىمداعى ۇيالى تەلەفونىما قاراپ:
– نە بوپ بارادى ءوزى؟ – دەدى يەك قاعىپ. – كورشى ەلدە جۇرت كوشەگە شىعىپ جاتىر دەي مە؟..
تاۋ بوكتەرىندەگى تابيعات كورىنىستەرىنە تاڭعالا قاراپ, ماۋجىراپ وتىرعان مەنىڭ كوڭىلىم كۇتپەگەن جەردەن مىلتىق داۋسىن ەستىگەن بالاپانداي ءبۇرىسىپ, جيىرىلا قالدى.
ايتكەنمەن ول مەنەن جاۋاپ كۇتكەن جوق. بۇگىنگى جاڭالىقتاردى ءوزى تاپتىشتەپ, تىزە جونەلدى. كوز ىلەسە المايتىن زىمىران جىلدامدىعىن ولشەۋگە مينۋتتىڭ ءوزى ميمىرت, شابان بولىپ كورىنەتىن اقپاراتتاردىڭ ءبىر قيامەتى, شەتىنەن جاعىمسىز, جاعا ۇستاتارداي ۇرەيلى...
وسى ساتتە ساياباقتاعى جاسىل جەلەككە سۋ سەۋىپ جۇرگەن قىزعىلت سارى كۇرتەلى قىزمەتشى ايەل ءبىز وتىرعان تۇسقا جاقىنداي بەردى. وتتاي ىستىق كۇننىڭ اپتابىنان قورعانعانى بولار, باسىنداعى قىزعىش كەپكاسىنىڭ استىنان جۇقا اق ورامال تارتىپ, كوزىنە ۇلكەن قارا كوزىلدىرىك تاعىپتى. سۋ شاشاتىن شلانگىنى ءبىر قولىمەن ۇستاپ, ەكىنشى قولىمەن ۇيالى تەلەفونىن قۇلاعىنا تاقاپ, الدەكىممەن سامبىرلاپ سويلەسىپ كەلەدى.
– ءاي, وعان ايت, قۇر بوسقا قاراپ جاتا بەرمەي, جۇمىسقا شىقسىن. وسى كۇندە «ەكى قولعا – ءبىر كۇرەك» قايدان دا بولسا تابىلادى. اناۋ بولمادى, مىناۋ بولمادى دەپ, ۋايىمداي بەرگەن ادام ءوزىن-ءوزى ىشتەي جەپ تاۋىسقاننان باسقا تۇك بىتىرمەيدى. ءبارىنىڭ داۋاسى – ەڭبەك, – دەيدى.
«ەستىگەن قۇلاقتا جازىق جوق» ەكەنى راس. كوڭىلىم ءبىرتۇرلى ەلەگىزىپ, قاسىمداعى كىسىنىڭ گوي-گويىن تىڭداۋعا زاۋقىم سوقپاي, ورنىمنان تۇردىم دا, اياڭداپ كەتە باردىم.
اۋدەم جەر ۇزاعان كەزدە ارتىما بۇرىلىپ قاراسام, كوكتەرەكتىڭ كولەڭكەسىندە قالعان سۇر كويلەكتى كىسى ءىزىم-عايىم جوق بولىپتى. شاماسى, ول تاعى دا ءبىر قۇلاقتىڭ مازاسىن الايىن دەپ, ساياباقتى شارلاپ جۇرسە كەرەك. ال قىزىل سارى ءتۇستى كۇرتەشە كوپكە دەيىن جارقىراپ كوز الدىمدا تۇردى.
