ابەكەڭ كولىك تىزگىنىندە ءجۇرىپ بۇكىل قازاق دالاسىن ارالاپ شىققان, رەسەيدىڭ يركۋتسك قالاسىنا دەيىن جۇك تاسىعان. وسىدان ءتورت جىل بۇرىن ويلاماعان جەردەن سۋرەت سالۋعا, قولونەر بۇيىمدارىن جاساۋعا دەگەن قۇلشىنىسى كۇشەيىپ, بويىنداعى كەرەمەت قاسيەت ويانا باستاپتى. بىردە ءبىزدىڭ كەيىپكەرىمىز تاراز قالاسىندا قازاق حاندىعىنىڭ 550 جىلدىعىنا ارنالعان ايتىسقا بارعانىندا «بالاساعۇن» ورتالىق كونتسەرت زالىنىڭ دالىزىندە اشىلعان كورمەدەن كونە اعاش ىدىستى كورەدى. قولونەرگە دەگەن قىزىعۋشىلىعى سول ساتتەن باستالىپتى. تارازدان كەلگەننەن كەيىن ءۇيىنىڭ اۋلاسىندا جەمىس بەرمەي تۇرعان ورىك اعاشىن كەسىپ, ونى كەپتىرىپ, قوشقارمۇيىز ءمۇسىن جاساۋدى قولعا الادى. بۇرىن مۇنداي بۇيىمداردى جاساپ كورمەگەن ول ءبىرىنشى رەت پىشاق, بالتا جانە ارا سياقتى ءۇي جاعدايىنداعى قۇرال-سايمانداردى قولدانادى. العاش رەت جاساعان قوشقارمۇيىزى ءساتتى شىعىپ, كەيىننەن پيالا, كەسە, ءتۇرلى كادەسىي اتاۋلىنى جاساي بەرەدى. باستاپقىدا جاساعان بۇيىمدارىن جاراتپاعان ول ءبارىن دە سۇراعاندارعا سىيلىق رەتىندە بەرىپ جىبەرەدى.
بۇگىندە ابىلحان وتەپبەرگەنوۆ بەلگىلى قولونەرشىگە اينالدى. ول ءوزى تۇراتىن ايشا ءبيبى اۋىلىندا جانە تاراز قالاسىنداعى ەجەلگى «تورتكۇل» كەرۋەن سارايىندا جۇمىس ىستەيدى. اعاش ۇستاسىنىڭ ايتۋىنشا, تۇقىمىندا اعاشتان ءتۇيىن تۇيگەن شەبەر, قولونەرمەن اينالىسقان ادام بولماعان ەكەن.
قازىر ابەكەڭنىڭ قولىنان شىققان بۇيىمدار وبلىس ورتالىعىنداعى «تورتكۇل» كەشەنىنە قىدىرىپ كەلگەندەر قاراپايىم حالىقتى دا, قولونەرشى مامانداردى دا ءتانتى ەتۋدە. ءتىپتى ارنايى تاپسىرىس بەرىپ, زاتتارىن قالاپ الىپ جاتقاندار دا بار ەكەن. ەندى تارازعا كەلەتىن تۋريستەر «تورتكۇل» كەرۋەن سارايىندا تەك ۇلتتىق تاعامداردى عانا ەمەس, ابىلحان وتەپبەرگەنوۆ سىندى جامبىلدىق شەبەرلەر جاساعان ءتۇرلى قولونەر بۇيىمدارىن دا تاماشالاي الادى.
جامبىل وبلىسى
