جامبىل اۋدانىنا قاراستى پرەسنورەدۋت ەلدى مەكەنى ماڭىندا 1896 جىلى سالىنعان عيباداتحانا ءالى تۇر. وسى اۋىلدىڭ تۋماسى ۆلاديمير ءحامازيننىڭ كۋالىك ەتۋىنە قاراعاندا, اۋماعى 100 شارشى مەتردى قۇرايتىن ەكىقاباتتى نىسان ەرەكشە ارحيتەكتۋرالىق ستيلدە تۇرعىزىلعان. بيىكتىگى ءتورت مەترگە جەتەعابىل. جەرتولەدە ايەلدەر تىگىنشىلىكپەن, باسقا دا تۇرمىستىق زاتتار جاساۋمەن اينالىسقان.
«وسى وڭىردە تۋدىم, سودان بەرى كىندىگىم ءبىر ەلى اجىراعان ەمەس. بۇل توڭىرەكتە عيباداتحانانىڭ تاريحىن مەنەن جاقسى بىلەتىن ادام جوق شىعار. ەگەر جاڭىلماسام, ميحايل كازين دەگەن كازاك وفيتسەرى ايەلى اننا ۆاسيلەۆنا ەكەۋى تۇرعىزعان دەسەدى. ولارعا ستانيتسا تۇرعىندارى جاردەمدەسىپتى. باستاپقىدا 13 ءدىندار ايەل تۇرسا, كەيىن قاتارلارى تولىعىپ وتىرعان. ءسويتىپ سانى جۇزگە دەيىن جۋىقتاعان», دەيدى كونە كوز قاريا وتكەندى ويشا ەلەستەتىپ.
قۇدايعا قۇلشىلىق ەتكەن جاندار ءۇي شارۋاسىمەن قاتار استىق, مال ءوسىرىپ, كۇندەلىكتى تاعاممەن وزدەرىن قامتاماسىز ەتكەن. ايدىندى كولگە اۋ قۇرىپ, بالىق اۋلاعان.
1921 جىلى عيباداتحانانىڭ قىج-قىج قايناپ جاتقان تىرشىلىگى ءبىرجولا توقتاعان. وعان كازاكتار مەن شارۋالاردىڭ كەڭەس وكىمەتىنە قارۋلى قارسىلىعى سەبەپ بولعان. كوتەرىلىس كۇشپەن باسىپ-جانشىلىپ, موناستىر قيراتىلعان. عيباداتحانانىڭ باسشىسى مەن تاقۋا ايەلەر ءولىم جازاسىنا كەسىلىپ, وسى ماڭايعا جەرلەنگەن. كەيىن بالالار ۇيىنە اينالدىرىلىپ, 1966 جىلدان بەرى قاراۋسىز قالعان.
جەرگىلىكتى ولكەتانۋشى الەكساندر ليستوپادنىي 2017 جىلعى ساناق مالىمەتتەرىنە سۇيەنە وتىرىپ, عيباداتحانانىڭ مەنشىگىندە 15700 گەكتار جەرى, 20-عا جۋىق تەحنيكاسى, وننان استام تۇرعىن ءۇي, ەكى جاتاقحانا, شىركەۋ, ەمدەۋ مەكەمەسى, قىزمەتكەرلەرگە ارنالعان جەكە ءۇي, ديىرمەن بولعانىن ايتادى. التى ءدىندار 119 قىز-كەلىنشەككە ءدارىس بەرگەن.
سولتۇستىك قازاقستان وبلىسى
