وتكەن عاسىردىڭ باسىنداعى ءتۇرلى ناۋبەت ادامباەۆتار اۋلەتىنە دە ءوزىنىڭ سالقىنىن تيگىزدى. بىراق اتا جولىنان اينىماعان ءابدىراحمان ادامباي ۇلىنىڭ بالتاباي, سپاتاي, جۇماتاي, قاراتاي سىندى ۇرپاقتارى بالا كۇنىنەن ۇلتتىڭ ۇلاعاتىن بويىنا ءسىڭىرىپ ءوستى. ال اياۋلى اناسى ءبيبىش جيەنبايقىزىنىڭ قايسارلىعى مەن قايراتكەرلىگى دە بۇگىنگى كۇنگە دەيىن ەل اۋزىندا اڭىز بولىپ ايتىلادى.
قاراتاي ادامباەۆتىڭ اتا قانىنان, انا سۇتىنەن كەلگەن قايسارلىعى ونىڭ تۇعىردان تۇسپەۋىنە, تەكتىلىگىن جوعالتپاۋىنا ءوز ۇلەسىن قوستى. ول ەڭبەك جولىن 1943 جىلى سارىسۋ اۋدانى, بايقادام اۋىلىنداعى ورتا مەكتەپتە ديرەكتوردىڭ حاتشىسى بولىپ باستايدى. ال 1944 جىلى سارىسۋ اۋداندىق كومسومول كوميتەتىنىڭ ءبولىم باسشىسى, حاتشىسى, 1945 جىلى جامبىل وبلىستىق كومسومول كوميتەتىندە نۇسقاۋشى بولادى. 1946 جىلى جامبىل قالاسىنداعى اباي اتىنداعى مۇعالىمدەر دايىندايتىن ۋچيليششەنى سىرتتاي وقىپ بىتىرەدى دە, وبلىستىق «ستاليندىك جول» (قازىرگى «اق جول») گازەتىندە كوررەكتور, مەنشىكتى ءتىلشى بولىپ ىستەيدى. اعاسى بالتابايدىڭ اقىلىمەن ول اۋىلشارۋاشىلىعى سالاسىنا كەلىپ, بۇل سالادا دا ەلەۋلى ەڭبەك ەتتى.
1952-1957 جىلدارى الماتى قالاسىنداعى مال دارىگەرلىك ينستيتۋتىن ويداعىداي ءبىتىرىپ, 1957-1959 جىلدارى تالاس اۋدانىنىڭ شارۋاشىلىقتارىندا باس زووتەحنيك, ديرەكتوردىڭ ورىنباسارى, 1959-1980 جىلدارى مويىنقۇم اۋدانىندا اۋىل شارۋاشىلىعىنىڭ ءار سالاسىندا باسشىلىق قىزمەتتەر اتقارادى. سول كەزدەگى اۋداندىق پارتيا كوميتەتىنىڭ ءبىرىنشى حاتشىسى ايتباي نازاربەكوۆپەن بىرگە اۋداندى دامىتۋعا كۇش سالدى. بىرلىك – مويىنقۇم – ۇلانبەل اسفالت جولىن, ءار اۋىلعا اپاراتىن تاس جولدار تارتۋعا ۇلەس قوستى. سونىمەن قاتار مادەنيەت ۇيلەرىن, مەكتەپ, بالاباقشا, اۋىلشارۋاشىلىق كەشەندەرىن سالۋ, ەلەكتر جارىعىن تارتۋ جولىندا دا ايانباي ەڭبەك ەتتى. سول كەزدەرى شىققان ەڭبەك ەرلەرى جازىلبەك قۋانىشباەۆ, ءدىلداش يتباسوۆ, قۇدايبەرگەن بىرتاەۆ, شومان شارىپباەۆ سىندى مايتالمان شوپانداردىڭ رەسپۋبليكا, وداق دەڭگەيىندە تانىلۋىنا جول اشتى. «مال سانىن كوبەيتۋ ءۇشىن قاراتاي ادامباەۆ سول كەزدەگى وبلىس باسشىسى اسانباي اسقاروۆپەن كەڭەسە وتىرىپ, دىنمۇحامەد قوناەۆتىڭ قابىلداۋىندا دا بولعانى بار. سونىڭ ارقاسىندا «زاگوتسكوتتان» «مويىنقۇم» سوۆحوزىنا 16000 قوي بەرىلىپ, گەولوگيالىق بارلاۋ پارتياسى 150 مەتر تەرەڭدىكتەن اۋىز سۋ تارتىپ, شۋ ارقىلى كوپىر دە سالىندى» دەپ ەسكە الادى مويىنقۇم اۋدانىنىڭ قۇرمەتتى ازاماتتارى ن.ەسىلباەۆ, ج.قاجامۇراتوۆ, ءا.توقسانباەۆتار.
ال 1980 جىلى جامبىل وبلىستىق اۋىلشارۋاشىلىق تاجىريبە ستانتسياسىنىڭ ديرەكتورى بولىپ تاعايىندالىپ, 1984 جىلدان باستاپ مەركى اۋداندىق اتقارۋ كوميتەتى توراعاسىنىڭ ءبىرىنشى ورىنباسارى, اۋداندىق اۋىل شارۋاشىلىق – وندىرىستىك بىرلەستىگى باسشىسى قىزمەتىندە بولادى. قاراتاي ادامباەۆ ءار جىلدارى «ەڭبەك قىزىل تۋ», «قۇرمەت بەلگىسى» وردەندەرى مەن 12 مەدالدىڭ يەگەرى اتاندى. باسشىلىق قىزمەتتەر اتقارىپ جۇرگەنىمەن, ونىڭ باسىلىم بەتىندە جازعان ەستەلىكتەرى, كۇندەلىگىندەگى ايشىقتى جازبالارى قوعام ومىرىنە بەلسەنە ارالاسقان ازاماتتىڭ بولمىسىن كورسەتەدى. تالاي جىل بويى بۇيىعىپ جاتقان سارىارقا, بەتپاقدالانىڭ توسىندە ءتورت ت ۇلىكتى ورگىزگەن قاراتاي ادامباەۆتى حالىق بەلگىلى عالىم كارىم مىڭباەۆ, سوتسياليستىك ەڭبەك ەرى, اكادەميك ۋفا احمەدسافيننەن كەيىن وزىندىك جول سالعان عالىم رەتىندە مويىندادى. ول مەركىدە قىزمەت اتقارىپ جۇرگەندە دە اۋىلشارۋاشىلىق كەشەندەرىن سالۋعا, مالشىلار مەن ديقانداردىڭ الەۋمەتتىك-تۇرمىستىق جاعدايلارىنىڭ جاقسارا تۇسۋىنە ىقپال ەتتى. ءتىپتى شالعاي اۋىلدارعا مونشا, مەدپۋنكت, قوناقۇي, بالالار وقيتىن ينتەرنات, پوشتا سالدى. سورعوبىعا, تاۋدا ويراندى ارقىلى ساندىققا دەيىن, ودان ءارى قاراقىستاققا جولدار سالدىرىپ, قۇدىقتار قازدىردى. ءالى كۇنگە دەيىن مەركىلىك شارۋالاردىڭ اراسىندا «ادامباەۆ كەلىپ ادام بولدىق» دەگەن ءسوز بار. الايدا 1986 جىلعى جەلتوقسان وقيعاسى قاراتاي ادامباەۆتىڭ تاعدىرىن شارپىپ ءوتتى. ول وبلىستىق پارتيا كوميتەتىنىڭ ءبىرىنشى حاتشىسى اسانباي اسقاروۆ پەن مەركى اۋداندىق پارتيا كوميتەتىنىڭ ءبىرىنشى حاتشىسى ەرمەك ساۋرانباەۆتىڭ جاقتاسى دەگەن جەلەۋمەن ءبىراز ۋاقىت جازىقسىز جاپا شەكتى. بىراق ول تۋعان حالقىنىڭ ادال پەرزەنتى ەكەنىن تانىتا ءبىلدى. اقيقاتتىڭ اق تاڭىنىڭ اتاتىنىنا سەندى. جارى اپۋزا مۇتايقىزى وتكەن عاسىردىڭ ەلۋىنشى جىلدارىنىڭ ورتاسىندا جوعارى ءبىلىمى بار ساناۋلى قازاق قىزدارىنىڭ ءبىرى رەتىندە ۇرپاق تاربيەسىنە ەلەۋلى ەڭبەك ءسىڭىردى. بيىل قاراتاي ادامباەۆ 90 جاسقا تولىپ وتىر. ەل ءۇشىن, جەر ءۇشىن ەڭبەك ەتكەن ەرەن تۇلعالاردىڭ تۇعىرى قاشاندا بيىك, مارتەبەسى اسقاق بولا بەرمەك.
جامبىل وبلىسى
