وسى كۇنگە دەيىن اۋداندا ارقاننىڭ كومەگىمەن ءۇش جۇزدەن استام بالا دۇنيەگە كەلگەن. انالاردىڭ تاڭداۋىمەن قولدانىلاتىن بۇل ءتاسىلدىڭ پايدالى تۇستارى كوپ ەكەنىن دالەلدەپ جۇرگەن اۋرۋحانا دارىگەرلەرى ەندى سۋدا بوسانۋ ءادىسىن دە ەنگىزۋدى جوسپارلاپ وتىر. اۋرۋحانانى زاماناۋي مەديتسينالىق قۇرىلعىلارمەن جابدىقتاۋ جاعى دا ۇمىت قالعان ەمەس. بيىلدىڭ وزىندە جاتىر موينى پاتولوگيالارىن انىقتايتىن «ATMOS iView» كولپوسكوپى, ۋدز, ەكگ, تراۆماتولوگيالىق وتالارعا ەلەكتروندى-وپتيكالىق رەنتگەن, سۇيەكتەردىڭ سىرتقى فيكساتسياسىنا ارنالعان «Hoffmann» اپپاراتتارى, نارەستەلەردى جاساندى تىنىس الدىرۋ قۇرىلعىلارى, لابوراتوريالىق اناليزاتورلار ورناتىلعان. جانساقتاۋ ءبولىمى مەديتسينالىق كوپفۋنكتسيونالدى كەرەۋەتتەرمەن تولىقتىرىلىپ, ستوماتولوگيالىق ورىندىقتار جاڭارتىلىپتى. سونىمەن قاتار وبلىستىق قوعامدىق دەنساۋلىق باسقارماسىنىڭ باسشىسى م.ەگىزباەۆتىڭ قولداۋىمەن كومپيۋتەرلىك توموگراف اپپاراتى ساتىپ الىنىپ, ورناتىلۋدا. تاياۋدا ينسۋلت ورتالىعى اشىلماق. دەگەنمەن زاماناۋي مەديتسينالىق قۇرىلعىلار ورناتىلعان ەمدەۋ مەكەمەسىندە ساپالى دارىگەرلىك قىزمەت كورسەتەتىن ماماننىڭ الار ورنى ەرەكشە ەكەنى انىق. بۇل ورايدا, اۋداندىق ورتالىق اۋرۋحانانىڭ باس دارىگەرى نۇرعالي مولداحانوۆتىڭ ايتۋىنشا, دارىگەرلەردىڭ ەلىمىزدەگى وزگە دە ارىپتەستەرىمەن, شەتەلدىك ماماندارمەن ءجيى تاجىريبە الماسۋىنا مۇمكىندىك جاسايتىن ءىس-شارالار ءجيى وتكىزىلىپ تۇرادى. ءبىر عانا مىسال, انا مەن بالا ءولىمىن تومەندەتۋ ماقساتىندا, ء«تيىمدى پەريناتالدىق تەحنولوگيالار» تاقىرىبىندا رەسپۋبليكالىق عىلىمي-تاجىريبەلىك كونفەرەنتسيا ۇيىمداستىرىلعان. «بيىل تۇركىستان وبلىسىنىڭ ۇزدىك اۋرۋحاناسى اتانعان مەديتسينالىق ۇيىمدا جۇمىس ىستەيتىن 838 قىزمەتكەردىڭ جالاقىسى 1 ماۋسىمنان باستاپ كوبەيىپ, وتكەن جىلمەن سالىستىرعاندا 30 پايىزعا ارتتى. ەلباسى نۇرسۇلتان نازارباەۆتىڭ جانە ونىڭ مەملەكەت ىسىندەگى سارابدال ساياساتىن جالعاستىرۋشى پرەزيدەنت قاسىم-جومارت توقاەۆتىڭ بۇل يگى باستامالارى ءبىز ءۇشىن ۇلكەن دەمەۋ. وتاندىق مەديتسيناعا جاسالعان قامقورلىق. سونداي-اق جالاقىنىڭ ءوسۋى ءبىزدىڭ جاۋاپكەرشىلىگىمىزدى ارتتىرادى. ياعني, مەملەكەت تاراپىنان جاسالىپ جاتقان قولداۋلارعا جاۋابىمىز حالىققا ساپالى دارىگەرلىك قىزمەت كورسەتۋ ارقىلى كورىنۋى ءتيىس», دەيدى باس دارىگەر نۇرعالي مولداحانوۆ.
دارىگەرلەرگە بۇدان باسقا دا قولداۋلار كورسەتىلىپ كەلەدى. باس دارىگەردىڭ ايتۋىنشا, بىلتىر شالعايداعى شاردارا اۋدانىندا جۇمىسقا قابىلدانعان 4 جاس مامانعا ماتەريالدىق كومەك بەرىلسە, 7 قىزمەتكەرگە جاڭا سالىنعان ەكى قاباتتى ۇيدەن پاتەرلەردىڭ كىلتى تابىس ەتىلگەن. سونىمەن قاتار دارىگەرلىك قىزمەت اتقارۋعا اۋىلعا كەلگەن مامانداردىڭ اربىرىنە وبلىستىق ءماسليحاتتىڭ شەشىمىمەن 1 ملن تەڭگەدەن قايتارىمسىز كومەك كورسەتىلىپ كەلسە, بيىل مۇنداي قولداۋدىڭ كولەمى 1,5 ملن تەڭگە بولىپ وتىر.
تۇركىستان وبلىسى
