بيىلعى جازدىڭ اپتاپ ىستىقتارىندا وڭىردە 21 سولتۇستىكقازاقستاندىقتىڭ اجالى سۋدان بولسا, قىزىل ءتىلى سۋماڭداعان الاپات ورتتەن كوز جۇمعانداردىڭ سانى – 24. وسىنداي قايعىلى وقيعالاردىڭ ءبىرى جۋىردا عانا وبلىس ورتالىعىندا ورىن الدى. اتاپ ايتقاندا, فەۆرال كوشەسىندە ءبىر باسپانانىڭ قىزىل جالىنعا ورانعانى تۋرالى توتەنشە جاعدايلار دەپارتامەنتىنىڭ كەزەكشى بولىمىنە ءبىر قىز جانۇشىرا حابارلاعان. وقيعا ورنىنا ءورت سوندىرۋشىلەردىڭ قۇتقارۋ توبى جەدەل جەتكەنىمەن, قورا-قوپسى مەن سارايدىڭ كۇل استىندا قالعانىن كورگەن. 62 جاستاعى ءۇي يەسى تۇتىنگە تۇنشىققان كۇيى جان تاپسىرعان.
جىل باسىنان بەرى ء«تىلسىز جاۋ» قۇشاعىنان 34 ادام قۇتقارىلدى. وكىنىشكە قاراي, 24 ادام كوز جۇمىپ, 14 ادام ءتۇرلى دەنە جاراقاتىن الدى. كوبى ىشىمدىككە اۋەس, تۇرمىسى ناشار جاندار. مۇنداي قايعىلى جاعدايلار ءورت قاۋىپسىزدىگى ەرەجەلەرىن قاتاڭ ساقتاماۋ سالدارىنان بولىپ جاتادى. كوبىنە ەرەسەكتەر كىنالى. تەمەكى تۇقىلىن وشىرمەۋ, ەلەكتر قۇرالدارىن توق كوزىنەن اجىراتپاۋ, پەشتى قاراۋسىز قالدىرۋ سەكىلدى ورەسكەل اعاتتىقتار ءجيى جىبەرىلەدى, دەدى وبلىستىق توتەنشە جاعدايلار دەپارتامەنتى ءباسپاسوز ورتالىعىنىڭ باس مامانى ەۆگەني جۋراۆلەۆ.
وبلىستىق توتەنشە جاعدايلار دەپارتامەنتى باستىعىنىڭ ورىنباسارى ەرىك سارىباەۆ بەرگەن مالىمەتتەر بويىنشا, جىل باسىنان بەرى 435 ءورت وقيعاسى تىركەلىپ, كەلتىرىلگەن شىعىننىڭ مولشەرى 46 ميلليون تەڭگەنى قۇراعان. بىلتىرعا قاراعاندا بۇل كورسەتكىشتىڭ 39 پايىزعا كوبەيگەنى بايقالادى. سونىمەن قاتار 52 اۆتوكولىك وتقا ورانعان. وڭىردە ورمان ءورتى دە ازايماي تۇر. جىل باسىنان بەرى 53 گەكتار اۋماقتىڭ اعاشى ورتەنگەن. ءسويتىپ وتكەن جىلمەن سالىستىرعاندا 45,5 پايىزعا ارتىپ, ورمان قورىنىڭ ەرەكشە ايماقتارىن دا شارپىعان.
25 موبيلدىك توپپەن بىرلەسىپ, 223 رەيدتىك شارا جۇرگىزىلىپ, 34 زاڭدى جانە جەكە تۇلعالاردىڭ اكىمشىلىك جاۋاپكەرشىلىككە تارتىلعانىنا قاراماستان ناقتى ناتيجەنىڭ ازدىعىنا قاراعاندا اكىمشىلىك كودەكس تالاپتارىن ءالى دە قاتاڭداتۋ قاجەت سەكىلدى.
سولتۇستىك قازاقستان وبلىسى
