العاشقى كۇنى 40 000 وق-ءدارى ساقتالعان ەكى قويمانىڭ ورتەنگەنى بەلگىلى بولدى. جارىلعان سنارياد ۇشقىندارى 15 شاقىرىم ايماقتى شارپىپ وتكەن. وقيعا ورنىنا جاقىن ورنالاسقان كامەنكا, زاۆوركي, مالىي ۋلۋي, كليۋچي, سوسنوۆىي بور اۋىلدارى مەن بالالار دەمالىپ جاتقان «سوكول» لاگەرىنەن 2,7 مىڭ ادام كوشىرىلگەن. مىڭعا جۋىق ادام وقيعا ورنىنان ءوز بەتىمەن كوشكەن. توتەنشە جاعدايلار قىزمەتى ءورتتى تەك 6 تامىزدا سوندىرە الدى, 12 ادامنىڭ جاپا شەككەنىن مالىمدەدى. ءبىر ادام كوز جۇمعان, تاعى ءبىر ادام ءىز-ءتۇزسىز جوعالعان.
9 تامىز كۇنى قويمادا ەكىنشى جارىلىس بولدى. توتەنشە جاعدايلار كوميتەتىنىڭ اقپاراتىنا سۇيەنسەك, 18 ادام جاراقات العان, ولاردىڭ 4-ەۋى جاۋىنگەر. ەكىنشى دەتوناتسياعا قويماعا تۇسكەن نايزاعاي سەبەپ بولعان. ايماقتىڭ ءباسپاسوز قىزمەتى جارىلىستىڭ قويما ماڭىن مينادان تازالاۋ كەزىندە بولعانىن مالىمدەدى. سول كۇنى كامەنكا تۇرعىندارى مالينوۆكا اۋىلىنا كوشىرىلدى.
قازىرگى كەزدە وبلىس بويىنشا اچينسك تۇرعىندارىن قابىلدايتىن 30 ورتالىق جۇمىس ىستەيدى. 800-دەن استام ازاماتقا ماتەريالدىق كومەك كەرەك. اچينسك پەن نازاروۆ اۋداندارىندا توتەنشە جاعداي رەجىمى بەلگىلەنگەن. ايماقتاعى «رۋسالا» كومبيناتى جۇمىسىن توقتاتقان.
اۋىلدارداعى يەسىز قالعان ۇيلەردى 100-گە جۋىق پوليتسيا قىزمەتكەرى كۇزەتىپ جاتىر. ءتىلسىز جاۋدى سوندىرۋگە ءورت بروندى تەحنيكاسى مەن ەكى ارنايى ءورت پويىزى جىبەرىلگەن. توتەنشە جاعدايدى رەتتەۋگە جالپى ەسەپپەن 153 ادام مەن 51 تەحنيكا جۇمىلدىرىلعان.
اۋىل تۇرعىندارى حاباردى ەستىگەندە ابدىراپ قالعانىن جاسىرمادى. حالىق العاشقى دىبىستارىن ەستي سالا, رەسمي دەرەكتى كۇتپەستەن, جولعا شىعىپ, وقيعا ورنىنان ءوز ەركىمەن كەتە باستاعان. حالىقتىڭ كوپتىگىنەن 400-500 مەتردەگى اۋىلدارعا 2 ساعاتتا جەتكەن. جانارماي بەكەتتەرىندە جانارماي ءبىتىپ, كەيبىر بەكەتتەر اچينسك تۇرعىندارىنا بەنزين ساتپاي قويعان. دۇكەندەردە اۋىز سۋ ساناۋلى ساعاتتاردا ساتىلىپ كەتكەن. كەشكى سەگىزدەر شاماسىندا ەۆاكۋاتسيا تۋرالى حابار كەلىپ, اۋىلداعى دۇكەندەردىڭ قاسىنا جينالۋ تاپسىرىلعان. رەسەيلىك اقپارات قۇرالدارىنا سۇيەنسەك, ءبىرىنشى كۇنى اۋىل تۇرعىندارى وقيعا ورنىنان تولىقتاي كوشىرىلمەگەن.
