بىشكەكتە وتكەن بريفينگ بارىسىندا كوميتەت توراعاسى و.وپۋمباەۆ بۇرىنعى پرەزيدەنت پەن ونىڭ جاقتاستارى ايەلدەر مەن قارت كىسىلەرگە اقشا تاراتىپ, ءۇيىنىڭ ماڭىندا ۇستادى دەپ مالىمدەدى. ولاردىڭ ارقايسىسىنا 3 مىڭ سومنان ۇستاتىپ, پوليتسيامەن ارادا قاقتىعىس جاساۋعا تىرىسقان.
– مەن ونىڭ مەملەكەتتىك توڭكەرىس جاساۋعا دايارلانعانىن اشىق ايتا الامىن. ول رەسمي شاقىرتۋعا كەلمەيتىنىن بىلدىرگەن سوڭ «الفا» ارناۋلى جاساعىنىڭ كۇشىن پايدالاندىق, – دەدى و.وپۋمباەۆ.
كوميتەت توراعاسىنىڭ ايتۋىنشا, ا.اتامبەۆتى ۇستاۋدىڭ بەس نۇسقاسى بىردەي قاراستىرىلىپ, ەڭ ۇتىمدىسى تاڭدالعان. و.وپۋمباەۆ بۇرىنعى پرەزيدەنتكە ارناۋلى قىزمەت جاساعىن قاساقانا ءولتىردى دەگەن كۇدىك تاعىلعانىن دا ءمالىم ەتتى.
– 8 تامىز كۇنى اتامباەۆ اسقان قىزۋقاندىلىقپەن مالىمدەمە جاسادى. ول ءسوز اراسىندا التى رەت وق اتقانىن ايتىپ قالدى. تەرگەۋ بارىسىندا وسى سوزدەر ەسەپكە الىنا وتىرىپ, شىنىمەن دە التى رەت وق اتقانى انىقتالدى, – دەپ مالىمدەدى ارناۋلى قىزمەت باستىعى.
وق قازا تاپقان جاساق ۇسەن نيازبەكوۆتىڭ قاق جۇرەگىنە تيگەن. جالپى ا.اتامباەۆتىڭ كەلەشەكتەگى جاعدايى بويىنشا قازىر بولجامدار از ەمەس. ماسەلەن, وسى ەلدىڭ بەلگىلى قۇقىق قورعاۋشىسى ريتا قاراسارتوۆانىڭ ايتۋىنا قاراعاندا, ەلدىڭ ەكس-پرەزيدەنتى قازىرگى تاعىلعان ايىپتار نەگىزىندە ءومىر بويىنا باس بوستاندىعىنان ايىرۋ جازاسىنا كەسىلۋى مۇمكىن.
ا.اتامباەۆ پوليتسياعا 8 تامىز كۇنى ءوز ەركىمەن بەرىلگەن بولاتىن. كەيىنىرەك پوليتسيا الاتوو الاڭىنا جينالعان ونىڭ بىرقاتار جاقتاسىن كۇشپەن تاراتتى. ەكس-پرەزيدەنتتى ۇستاۋعا ارنالعان ەكى كۇندىك وپەراتسيا بارىسىندا 136 ادام جارالانىپ, ءبىر سارباز قازا تاپتى.
