ماڭعىستاۋ وبلىسىنىڭ كاسىپكەرلەر پالاتاسى جەكە كاسىپكەر ش.سمايلوۆا ماڭعىستاۋ وبلىسىنىڭ جەردى پايدالانىلۋى مەن قورعالۋىن باقىلاۋ باسقارماسىنىڭ جەر تەلىمىن مەملەكەت مەنشىگىنە كەرى قايتارۋ تۋرالى تالابىنا بايلانىستى كاسىپكەرلەر پالاتاسىنان كومەك سۇراعان بولاتىن.
ناقتى ايتقاندا, جەكە كاسىپكەر ش.سمايلوۆا مۇنايلى اۋدانى, ماڭعىستاۋ اۋىلىندا ورنالاسقان, كافە, شاشتاراز جانە دۇكەن قۇرىلىسىن سالۋ ءۇشىن, كولەمى 0,1250 گەكتار, جەكە مەنشىك قۇقىعىنداعى جەر ۋچاسكەسىن, سىيعا تارتۋ تۋرالى كەلىسىم-شارتى نەگىزىندە الىپ 2014 جىلى ادىلەت ورگانىندا تىركەگەن.
2015 جىلى اتالعان جەر ۋچاسكەسىن يگەرۋ ماقساتىندا, ءتيىستى مەكەمەلەردەن رۇقسات قاعازدارىن الىپ, جۇمىس جوبالارىن جاساقتاتىپ, ساراپتامالىق قورىتىندىعا يە بولادى. ودان ءارى تۇرمىستىق جاعدايىنا بايلانىستى جەر تەلىمىن يگەرۋگە مۇمكىندىگى بولماعان.
2018 جىلى ماڭعىستاۋ وبلىسىنىڭ جەردىڭ پايدالانۋى مەن قورعالۋىن باقىلاۋ باسقارماسىنىڭ وكىلدەرى كەلىپ, سمايلوۆانىڭ جەر تەلىمى نىسانالى ماقساتىنا ساي پايدالانىلماۋىنا جانە يگەرىلمەۋىنە بايلانىستى زاڭدىلىقتىڭ بۇزىلۋىن جويۋ تۋرالى نۇسقاما بەرىپ, جەردى يگەرۋ ءۇشىن ءبىر جىل مەرزىم ۋاقىت بەلگىلەيدى.
وسى ءبىر جىل ىشىندە كاسىپكەر جەر تەلىمىن تولىق تاستان قورشاپ, تەمىر ەسىكتەر ورناتىپ, نىساننىڭ قۇرىلىسىن باستاۋ ءۇشىن جوبالاۋعا ارنالعان ساۋلەت-جوسپارلاۋ تاپسىرماسىن قايتا الىپ, نوبايلىق جوباسىن قايتا جاساقتاتىپ, وبلىستىق ساۋلەت-قۇرىلىس باقىلاۋ باسقارماسىنا قۇرىلىسىن باستاۋ ءۇشىن بارلىق رۇقسات قاعازدارىن راسىمدەگەن.
- سوعان قاراماستان وبلىستىق جەردىڭ پايدالانۋى مەن قورعالۋىن باقىلاۋ باسقارماسى 2019 جىلى كاسىپكەردىڭ جەرىن تەكسەرىپ, ونى يگەرمەدى دەگەن ۋاجبەن, ماجبۇرلەپ مەملەكەت مەنشىگىنە قايتارىپ الۋ تۋرالى تالاپ ارىز بەرگەن. ءسويتىپ ماڭعىستاۋ وبلىسىنىڭ مامانداندىرىلعان اۋدانارالىق ەكونوميكالىق سوتىمەن ازاماتتىق ءىس قوزعالعان. كاسىپكەرلەر پالاتاسىنىڭ ساراپشىلارى بۇل ىسپەن تولىق تانىسىپ, قارسى پىكىر ءماتىنىن دايىنداپ, سوت وتىرىسىنا كاسىپكەردىڭ ۋاكىلى رەتىندە قاتىسىپ, دالەلدەمەلىك دەرەكتەردى ۇسىندى, دەيدى وكپ ديرەكتورىنىڭ ورىنباسارى امىرعالي جاناەۆ.
ماڭعىستاۋ وبلىسىنىڭ مامانداندىرىلعان اۋدانارالىق ەكونوميكالىق سوتى ءماجىلىس كەزىندە تاراپتاردىڭ پىكىرىن تىڭداپ, جيناقتالعان دالەلدەمەلىك دەرەكتەرگە باعا بەرە كەلە, سوت شەشىمىمەن تالاپ ارىزدى قاناعاتتاندىرۋسىز قالدىردى. وسىلايشا داۋلى جەر تەلىمى كاسىپكەر پايداسىنا شەشىلدى.
ماڭعىستاۋلىق كاسىپكەردىڭ 12 ملن تەڭگەگە جۋىق قاراجاتى وڭىرلىك كاسىپكەرلەر پالاتاسىنىڭ كومەگىمەن تولەندى. جەكە كاسىپكەر م. بوقاەۆ اقشۇقىر مەكتەپ-ليتسەيىنە وقۋشىلاردى تاسىمالداعان قىزمەتى ءۇشىن اۋىل اكىمىنىڭ قاراجات اۋدارماي وتىرعانىن مالىمدەپ, كاسىپكەرلەر پالاتاسىنان كومەك سۇراپ كەلگەن ەدى.
وقۋشى تاسىمالى بويىنشا اقشۇقىر اۋىلى اكىمى اپپاراتى مەن جەكە كاسىپكەر اراسىندا شارت جاساقتالىپ, ىسكەر ءوز مىندەتىن تولىق ورىنداعان. 14 ادامدى جۇمىسپەن قامتىپ, ءتيىستى سالىقتارىن دا ۋاقىتىلى تولەگەن.
الايدا, اعىمداعى جىلدىڭ ءساۋىر-مامىر ايلارى ءۇشىن ورىندالعان جۇمىستارعا اۋىل اكىمىنىڭ اپپاراتى 11 725 000 تەڭگە كولەمىندە قاراجاتتى اۋدارماي وتىرعانى انىقتالدى. سونىڭ سالدارىنان كاسىپكەر جۇمىسشىلاردىڭ جالاقىسىن بەرە الماي, ولار تاراپىنان دا نارازىلىق تۋىندادى.
بۇل داۋدى سوتقا جەتكىزبەي, جان-جاقتى قاراپ, وڭ شەشىمىن تابۋ ماقساتىندا, كاسىپكەرلەر پالاتاسىنىڭ ۇيىمداستىرۋىمەن دوڭگەلەك ۇستەل ءوتتى. جيىن بارىسىندا, اۋداندىق ەكونوميكا جانە قارجى ءبولىمىنىڭ باسشىسى مەن اقشۇقىر اۋىلى اكىمى اپپاراتىنىڭ وكىلى قارىزدى جاقىن ارادا اۋداراتىنىن مالىمدەپ, ۋادەلەرىن بەرگەن بولاتىن.
قازىر 12 ملن تگ جۋىق قاراجات تولىق كولەمدە اۋدارىلىپ, كاسىپكەر ارىزى تولىق قاناعاتتاندىرىلدى.
ماسەلەلەرى وڭ شەشىلگەن كاسىپكەرلەردىڭ قۋانىشىندا شەك جوق.
- بىرنەشە اي بويى جەرگىلىكتى اتقارۋشى ورگاننان ماڭداي تەر, ەڭبەك اقىمىزدى الا الماي قينالىپ ءجۇر ەدىك. قول استىمىزداعى جۇمىسشىلار دا جالاقىسىنا قول جەتكىزە الماي نارازى بولىپ كەلگەن. مو «اتامەكەن» كاسىپكەرلەر پالاتاسىنىڭ قىزمەتكەرلەرىنە العىسىمىز شەكسىز. سوتقا سابىلماي-اق, داۋلى ماسەلەنى وڭ شەشىپ بەرۋگە كوپ كۇش جۇمسادى. كاسىپكەرلەردىڭ قۇقىن قورعايتىن وسىنداي مەكەمەنىڭ بولعانى ۇلكەن قولداۋ, دەيدى كاسىپكەر م. بوقاەۆ.
ماڭعىستاۋ وبلىسى
