بيىلعى باسەكەدە بەس كوماندا باق سىنادى. قۇرلىقتىق حوككەي ليگاسىنا دايىندىق ىسپەتتى تۋرنيرگە «بارىس» (نۇر-سۇلتان), «اك بارس» (قازان), «نەفتەحيميك» (نيجنەكامسك), «اۆتوموبيليست» (ەكاتەرينبۋرگ) جانە «سالاۆات يۋلاەۆ» (ۋفا) كلۋبتارى قاتىسقان بولاتىن. تامىزدىڭ 7-11 تامىز ارالىعىندا وتكەن مۇز ۇستىندەگى باسەكەنىڭ اشىلۋ سالتاناتىنا قازاقستان پرەزيدەنتى قاسىم-جومارت توقاەۆ قاتىسىپ, «بارىس» جانە «اك بارس» كلۋبتارى اراسىنداعى ويىندى تاماشالادى. قۇرلىقتىق حوككەي ليگاسىنىڭ (قحل) ءۇش دۇركىن جەڭىمپازىنا قارسى وتكەن ويىندا جەرلەستەرىمىز 6:1 ەسەبىمەن باسىم ءتۇستى.
كەزدەسۋدەگى العاشقى شايبانى «بارىس» ساپىنان 7-مينۋتتا نيكيتا ميحايليس سوقتى. ال 11-مينۋتتا «بارىستىڭ» ەكس-ويىنشىسى مەتت فرەتتين تارازى باسىن تەڭەستىردى. بۇل قازان كلۋبىنىڭ ماتچتا سوعىلعان ەڭ ءبىرىنشى جانە ەڭ سوڭعى شايباسى بولدى. ويىننىڭ قالعان بولىگىندە «بارىس» حوككەيشىلەرى ۇستەمدىك قۇردى. ءبىرىنشى كەزەڭدە كيريلل پانيۋكوۆ پەن «بارىس» قاتارىنا بيىل قوسىلعان كانادالىق ادام حەلەۆكا شايبا سوقسا, ەكىنشى 20 مينۋتتا داستين بويد پەن داررەن ديتس جانە باتىرلان مۇراتوۆ مەرگەندىگىمەن كوزگە ءتۇستى. وسىلايشا «بارىس» العاشقى كەزدەسۋدە ءىرى ەسەپپەن جەڭىسكە جەتتى.
ەكىنشى ويىنىن «نەفتەحيميك» كلۋبىنا قارسى وتكىزىپ, كامبەك جاسادى. كەزدەسۋدىڭ ءبىرىنشى كەزەڭىندە 1:3 ەسەبىمەن جەڭىلىپ جاتقان ەلوردا كومانداسى 5:3 ەسەبىمەن جەڭىستى قارسىلاستان ج ۇلىپ الدى. باس باپكەر اندرەي سكابەلكا «اك بارستى» ءىرى ەسەپپەن جەڭگەن سوڭ, نەگىزگى قۇرامنىڭ ويىنشىلارىنا دەمالىس بەرگەن بولاتىن. سوندىقتان ويىننىڭ باسى قوناقتاردىڭ باسىمدىعىمەن ءوتتى. 23-سەكۋندتا زاك ميتچەلل ەسەپتى اشسا, ارتىنشا پاۆەل پوريادين ەسەپتى 0:2-گە جەتكىزدى. دەگەنمەن نيكيتا ميحايليس 14-مينۋتتا ەسەپتى ءبىر شايباعا قىسقارتتى. ەكىنشى كەزەڭنىڭ 25-مينۋتىندا الەكساندر اۆتسين «نەفتەحيميكتىڭ» ءۇشىنشى شايباسىن سوعىپ كەتتى. وسىدان كەيىن «بارىس» ويىندا وزگەرىس جاساپ, ويىن تىزگىنىن ءوز قولىنا الدى. ياروسلاۆ ەۆدوكيموۆ پەن داستين بويد ءبىر-بىردەن شايبا سوعىپ ەسەپتى تەڭەستىرسە, ءۇشىنشى كەزەڭدە بويد دۋبل اۆتورى اتاندى. كەزدەسۋدىڭ نۇكتەسىن نيكيتا كلەششەنكو قويدى.
ءۇشىنشى كەزدەسۋدە «اۆتوموبيليست» كومانداسىن قابىلداپ, اسا تارتىستى وتكەن ماتچتا «بارىس» 3:2 ەسەبىمەن باسىم ءتۇستى. باسەكە باستالعان بەتتە ويىن تىزگىنىن قولىنا العان الاڭ يەلەرى ءبىرىنشى كەزەڭدە قارسىلاس قاقپاسىن ەكى مارتە ءدال كوزدەدى. شايبا اۆتورلارى – دميتري شەۆچەنكو مەن يرو پاكارينەن. ەكىنشى كەزەڭدە نيكيتا ميحايليس «بارىستىڭ» ءۇشىنشى شايباسىن سوعىپ, كومانداسىنىڭ جەڭىسىن ناقتىلاي ءتۇستى. ءۇشىنشى كەزەڭدە قوناقتاردىڭ ەكى شايبا سالۋعا شاماسى جەتتى.
وسىلايشا «بارىس» سوڭعى ويىن-
نىڭ ناتيجەسىنە قاراماي-اق قازاقستان پرەزيدەنتىنىڭ كۋبوگىن كەزەكتى مارتە جەڭىپ الدى. ويتكەنى تۋرنير كەستەسىندە «بارىستان» كەيىنگى ورىندا تۇرعان ەكى كوماندا دا جەرلەستەرىمىزدەن جەڭىلگەن. «بارىس» ءتورتىنشى كەزدەسۋدە جەڭىلگەن كۇننىڭ وزىندە دە, جەكە كەزدەسۋ بويىنشا الدا تۇر. وسىلايشا «بارىس» الدىن الا جارىس جەڭىمپازى اتاندى.
ايتا كەتەيىك, 2010 جىلدان بەرى وتكىزىلىپ كەلە جاتقان پرەزيدەنت كۋبوگى باسەكەسىندە سانكت-پەتەربۋرگتىڭ سكا, ومبىنىڭ «اۆانگارد», نوۆوكۋزنەتسكىنىڭ «مەتاللۋرگ», نيجنەكامسكىنىڭ «نەفتەحيميك» جانە حاباروۆسكىنىڭ «امۋر» كلۋبتارى ءبىر رەتتەن جارىس جەڭىمپازى اتانعان.
