جاقىندا ءبىز كوكجوتا اۋىلىندا بولىپ, اۋىلدا تۇرسا دا اۋداننىڭ نامىسىن ابىرويمەن قورعاپ جۇرگەن اتان جىلىكتى, ءاپايتوس كوكپارشىلارمەن جولىققان ەدىك. كوكجوتالىق كوكپارشىلاردى ءوز ءىسىنىڭ مايتالمان شەبەرى, كوكپار دەسە ىشەر اسىن جەرگە قوياتىن دارحان راپەكوۆ جاستايىنان باپتاعان ەكەن. امال بار ما, اۋداننىڭ كوكپارىن ورگە سۇيرەگەن, ءوزىنىڭ مول تاجىريبەسىن جەرلەستەرىنە ۇيرەتىپ كەتكەن دارحان راپەكوۆ ابايسىزدا قايتىس بولدى. ونىڭ ۇلى, اۋىلدا مال دارىگەرى بولىپ قىزمەت ەتەتىن دارىن احماديەۆ اكە ۇلاعاتىن بويىنا سىڭىرە ءبىلدى. دارىننىڭ باۋىرى ەلامان دا – اۋدان قۇراما كومانداسىنىڭ بەلدى مۇشەسى. قازىر كوماندانى تاجىريبەلى قانات بيقاتوۆ باپتاپ ءجۇر.
كوكجوتا اۋىلىنداعى ەسكى مەكتەپ ات سپورتى مەكتەبىنىڭ يەلىگىندە ەكەن. وسى جەردە كوكپار اتتارى كۇتىمدە. قانات قاليبەك ۇلى اقجارقىن, اڭگىمەگە شەبەر ازامات ەكەن, كوكەيىمىزدەگى ساۋالدى ايتپاي-اق ءتۇسىنىپ, اتقارىپ جاتقان ىستەرىمەن تانىستىرا جونەلدى.
– العاشقىدا, ياعني 2007 جىلى كوكجوتادا ات سپورتى كلۋبى قۇرىلدى. ەكى جىلدان كەيىن مەنى كلۋب ديرەكتورى قىزمەتىنە تاعايىندادى. باستاپقىدا ءبارى جاقسى بولدى. ات سپورتى كلۋبىندا كوكپارشىلار دايىندادىق, قاجەتتى اتتاردى باپتادىق. كوكپارعا قازاقي اتتار جارامسىز. تازا قاندى اعىلشىن تۇلپارى بولماسا, كوكپارعا شابا المايسىز. قارجى تاپشىلىعى سالدارىنان وسىدان ءۇش جىل بۇرىن كلۋب جابىلىپ قالدى. وتكەن جىلى اۋدانعا جاڭا اكىم كەلدى. ۇلتتىق سپورت دەسە ىشەر اسىن جەرگە قوياتىن اسحات سمايلوۆ اۋدانداعى ات سپورتى كلۋبىنىڭ نەگە جابىلىپ قالعانىن زەرتتەپ, ات سپورتىن قايتا جانداندىردى. قاجەتتى قارجىنى تاۋىپ بەردى. ءسويتىپ ات سپورتى مەكتەبى جۇمىسىن قايتا باستادى, – دەيدى قانات بيقاتوۆ.
قاناتتىڭ ايتۋىنشا, كوكپارعا شاباتىن اتتار جىلدام, اتتىڭ تىزگىنىن تارتقان كەزدە يەسىنىڭ نە ويى بار ەكەنىن تۇسىنەتىن, اقىلدى, شەڭبەرگە جاقىنداعان كەزدە كىلت وڭعا, سولعا بۇرىلاتىن تازا قاندى اعىلشىن تۇقىمدى تۇلپار بولعانى ءجون. جەرگىلىكتى بيەمەن بۋدانداستىرىلعان اعىلشىن تۇقىمدى كوكپار اتتارىنىڭ باعاسى ارزان ەمەس. ەڭ ارزانى 800 مىڭ, ال قىمباتتارى ءبىر جارىم ميلليون تەڭگەگە جەتەدى. ماسەلەن, كاۆكازدان كەلگەن «شىراق» اتتى تۇلپار كەسەك بولسا دا شالت قيمىلدايتىن, ىمدى تۇسىنەتىن جانۋار. ۇلكەن نارىننان جەتكىزىلگەن «نارىن», رەسەيدەن كەلگەن «دومبىرا» اتتارى دا – كوكپارعا جارامدى سايگ ۇلىكتەر.
– تۇركىستان مەن جامبىل وبلىستارىنىڭ كوكپارشىلارى 8 اي بويى كوكپار تارتادى. ول جاقتا كۇن قاتتى ىستىق, دەمەك ولار قازىر دەمالىستا. ال ءبىز بولساق دايىندىقتى ءبىر ساتكە دە باسەڭدەتكەن جوقپىز. كوكپارعا شاباتىن اتتار بابىندا بولعانى دۇرىس. اپتاسىنا ءبىر رەت, كەيدە ەكى رەت مۋلياجبەن كوكپار تارتامىز. ونىڭ سالماعى 25 كيلو. وڭتۇستىكتە كوكپار سپورتىنا ەرەكشە كوڭىل بولىنەدى. قارجى دا مول. شىعىستا كوكپار سپورتىمەن تارباعاتاي, ۇلان, كوكپەكتى اۋداندارى مىقتاپ شۇعىلدانا باستادى. اۋدان اكىمى اسحات سمايلوۆتىڭ قولداۋىمەن بىرنەشە جىگىتىمىز جالاقى الا باستادى. قازىر بيۋدجەتىمىز ەكى ەسە ارتىپ, 10 ميلليون تەڭگەگە جەتتى. مۇنىڭ ىشىندە اتتى باپتاۋعا, جەم-شوپكە دەگەن قارجى بار, – دەيدى قانات.
شاعىن عانا كوكجوتا اۋىلىنىڭ اۋدان نامىسىن قورعاپ جۇرگەن كوكپار تارتقان ارمانشىل ازاماتتارىنىڭ ۇلتتىق سپورتقا قوسىپ جۇرگەن ۇلەستەرى وسىنداي قوماقتى...
وڭداسىن ەلۋباي,
جۋرناليست
شىعىس قازاقستان وبلىسى,
كوكپەكتى اۋدانى
