سايلاۋ ناۋقانى بارىسىمەن تانىستىردى
بەيسەنبى, 14 ناۋرىز 2013 2:37
كەشە ورتالىق سايلاۋ كوميسسياسىندا جۋرناليستەرمەن بريفينگ بولىپ ءوتتى. وندا وسك-ءنىڭ باس ساراپشىسى ۆەنەرا جەكسەمبەكوۆا سولتۇستىك قازاقستان وبلىسىنان شىعىپ قالعان پارلامەنت سەناتى دەپۋتاتىنىڭ ورنىنا جانە ءماسليحاتتاردىڭ شىعىپ قالعان دەپۋتاتتارىنىڭ ورنىنا سايلاۋ جونىندەگى سايلاۋ ناۋقاندارىنىڭ بارىسىنان حاباردار ەتتى.
بەيسەنبى, 14 ناۋرىز 2013 2:37
كەشە ورتالىق سايلاۋ كوميسسياسىندا جۋرناليستەرمەن بريفينگ بولىپ ءوتتى. وندا وسك-ءنىڭ باس ساراپشىسى ۆەنەرا جەكسەمبەكوۆا سولتۇستىك قازاقستان وبلىسىنان شىعىپ قالعان پارلامەنت سەناتى دەپۋتاتىنىڭ ورنىنا جانە ءماسليحاتتاردىڭ شىعىپ قالعان دەپۋتاتتارىنىڭ ورنىنا سايلاۋ جونىندەگى سايلاۋ ناۋقاندارىنىڭ بارىسىنان حاباردار ەتتى.
ۆەنەرا جەكسەمبەكوۆانىڭ ايتۋىنشا, وسى جىلدىڭ 15 ناۋرىزىندا سولتۇستىك قازاقستان وبلىسىنان شىعىپ قالعان پارلامەنت سەناتى دەپۋتاتىنىڭ ورنىنا سايلاۋ وتكىزىلەدى. سايلاۋ ناۋقانى بارىسىندا بارلىعى بەس ۇمىتكەر ۇسىنىلعان. ولاردىڭ ۇشەۋىن وبلىستىق سايلاۋ كوميسسياسى پارلامەنت سەناتىنىڭ دەپۋتاتتىعىنا كانديداتتار رەتىندە تىركەدى. ولار – ءوزىن ءوزى ۇسىنۋ تارتىبىمەن ءوز كانديداتۋرالارىن ۇسىنعان ەسەنگەلدى قارباەۆ پەن قابيدەن سادۋاقاسوۆ, سونداي-اق تايىنشا اۋدانى مەن م. جۇماباەۆ اۋدانىنىڭ ءماسليحاتتارى ۇسىنعان سەرىك ءبىلالوۆ. تىركەلگەن كانديداتتاردىڭ بارلىعى 23 اقپاننان باستاپ سايلاۋ الدىنداعى ۇگىت جۇمىستارىنا كىرىستى. ۇگىت كۇنتىزبەلىك جوسپارعا سايكەس 13 ناۋرىزدا ساعات 24.00-دە اياقتالدى.
قازىرگى ۋاقىتتا بارلىق بيۋللەتەندەر جەتكىزىلدى, ال تاڭداۋشىلاردىڭ بىرلەسكەن وتىرىسى وتكىزىلەتىن ءۇي-جايدا داۋىس بەرۋ پۋنكتى جابدىقتالۋ ۇستىندە. داۋىس بەرۋدى, داۋىستاردى ساناۋ مەن داۋىس بەرۋ ناتيجەلەرىن جاريا ەتۋدى سولتۇستىك قازاقستان وبلىستىق سايلاۋ كوميسسياسى ءبىر كۇننىڭ ىشىندە – 15 ناۋرىزدا جۇرگىزەتىن بولادى. سايلاۋ تۋرالى زاڭعا ساي تاڭداۋشىلاردىڭ بىرلەسكەن وتىرىسى, وعان وبلىستىڭ بارلىق ءماسليحاتتارىنان وكىل رەتىندە سايلانعان دەپۋتاتتار سانىنىڭ 50 پايىزدان استامى قاتىسسا, زاڭدى بولادى. ەگەر داۋىس بەرۋدىڭ ءبىرىنشى تۋرىندا سايلاۋ بيۋللەتەنىنە ەنگىزىلگەن كانديداتتاردىڭ بىردە-بىرەۋى سايلانباسا, وبلىستىق سايلاۋ كوميسسياسى ەڭ كوپ داۋىس العان ەكى كانديدات بويىنشا قايتا داۋىس بەرۋ وتكىزەدى. بۇل رەتتە قايتا داۋىس بەرۋ سايلاۋ تۋرالى زاڭنىڭ تالاپتارى ساقتالا وتىرىپ, باستاپقى داۋىس بەرۋ بولعان كۇنى وتكىزىلەدى.
بيىلعى جىلدىڭ 31 ناۋرىزىندا ەلىمىزدىڭ 13 وڭىرىندەگى 57 سايلاۋ وكرۋگىندە ءماسليحاتتاردىڭ شىعىپ قالعان دەپۋتاتتارىنىڭ ورنىنا سايلاۋ وتكىزىلەدى. ۆەنەرا جەكسەمبەكوۆانىڭ حاباردار ەتۋىنشە, وندا بارلىعى 6 وبلىستىق, 13 قالالىق جانە 38 اۋداندىق ءماسليحات دەپۋتاتتارى سايلاناتىن بولادى. سايلاۋ ناۋقانى قاجەتتى قارجىلىق جانە ماتەريالدىق-تەحنيكالىق رەسۋرستارمەن قامتاماسىز ەتىلگەن. سايلاۋ ناۋقانى بارىسىندا 167 كانديدات ۇسىنىلدى, ولاردىڭ 59-ىن ساياسي پارتيالار ۇسىنعان بولسا, 108-ءى ءوزىن ءوزى ۇسىنعاندار.
قازىرگى كەزدە كانديداتتاردى تىركەۋ اياقتالدى, 157 ادام كانديدات رەتىندە تىركەلدى. ولاردىڭ 60-ى ساياسي پارتيالاردىڭ مۇشەلەرى, 68-ءى پارتيادا جوق, تاعى 29-ى وزدەرىنىڭ پارتياعا تيەسىلىلىگىن كورسەتپەگەن. ۇگىت جۇمىستارى 29 ناۋرىزدا ساعات 24.00-دە اياقتالادى. سايلاۋ كۇنىنىڭ الدىنداعى كۇنى جانە داۋىس بەرەتىن كۇنى سايلاۋ الدىنداعى ۇگىتكە تىيىم سالىنعان. ورتالىق سايلاۋ كوميسسياسىنا شاعىمدار مەن وتىنىشتەر تۇسكەن جوق.
مەملەكەت باسشىسىنىڭ تاپسىرماسىنا سايكەس 2013 جىلعى قىركۇيەكتەن كەشىكتىرىلمەي, ەلىمىزدە اۋداندىق ماڭىزى بار قالالاردىڭ, اۋىلدىق وكرۋگتەردىڭ, اۋىلدىق وكرۋگتىڭ قۇرامىنا كىرمەيتىن كەنتتەر مەن اۋىلداردىڭ اكىمدەرىن ءتيىستى ءماسليحاتتار ارقىلى سايلاۋ ۇيىمداستىرىلىپ, وتكىزىلۋى ءتيىس. بريفينگتە بەلگىلى بولعانىنداي, كانديداتتاردى ۇسىنۋدى اۋدان اكىمى جەرگىلىكتى قوعامداستىقپەن كەڭەسۋ ارقىلى بالاما نەگىزدە جۇزەگە اسىرادى. ال وسى سايلاۋ ناۋقانىن باستاۋ مەرزىمدەرى ءالى تۇپكىلىكتى انىقتالماعان ەكەن. قازىرگى ۋاقىتتا ءتيىستى ازىرلىك جۇمىستارى جۇرگىزىلىپ جاتىر. شامامەن 2500 اكىم سايلانۋعا ءتيىس, بۇل بارلىق دەڭگەيدەگى اكىمدەردىڭ جالپى سانىنىڭ 90 پايىزىن قۇرايدى.
جاستار اراسىندا سايلاۋدى ناسيحاتتاۋ, سونداي-اق, ولاردىڭ ءبىلىم بەرۋ جانە اقپاراتتىق تەحنولوگيالار ارقىلى دەموكراتيالىق ۇدەرىستەرگە قاتىسۋ تاجىريبەسىن جيناقتاۋى ماقساتىندا ورتسايلاۋكوم ەل وڭىرلەرىندە جاستارعا قۇقىقتىق ءبىلىم بەرۋ جوباسىن ىسكە اسىرۋدى جالعاستىرۋدا. بۇگىندە وسى جوبا بويىنشا ءىس-شارالار پاۆلودار, ماڭعىستاۋ, باتىس قازاقستان, قىزىلوردا جانە قاراعاندى وبلىستارىندا ءوتتى. جاقىن ارادا مۇنداي شارالار جامبىل جانە وڭتۇستىك قازاقستان وبلىستارىندا باستالادى. سونىمەن قاتار, ورتسايلاۋكوم جوعارى وقۋ ورىندارى ستۋدەنتتەرىنىڭ اراسىندا جاستاردىڭ ەلەكتوراتتىق مادەنيەتىن قالىپتاستىرۋ پروبلەمالارى بويىنشا ەڭ ۇزدىك زەرتتەۋ جوباسىنا كونكۋرس جاريالاپ وتىر. ول 10 قاڭتاردان باستاپ 31 مامىر ارالىعىندا ەكى كەزەڭدە وتكىزىلەدى.
ءاليسۇلتان قۇلانباي,
«ەگەمەن قازاقستان».
