جۋىردا تاراز قالاسىنداعى «جاستار» اللەياسىندا العاش رەت كونە اۆتوكولىكتەردىڭ كورمەسى ءوتىپ, حالىق نە ءتۇرلى كەرەمەتتەرگە كۋا بولدى. اتالعان شارانى جامبىل وبلىسىنىڭ اكىمدىگى مەن «دجيپ كلۋب تاراز» توبى بىرلەسە ۇيىمداستىرعان. مۇندا ەسكى تەمىر تۇلپارلاردان باستاپ, سوڭعى ۇلگىدەگى وتە قىمبات كولىكتەردىڭ جيىنتىعىنا دەيىن قويىلدى.
ۇيىمداستىرۋشىلاردىڭ ايتۋىنشا, اتالعان كورمەگە شاھارداعى ەڭ ادەمى دەگەن 50-گە جۋىق اۆتوكولىك جانە ونشاقتى موتوتسيكل ارنايى تاڭدالىپ الىنعان ەكەن. ءبىر عاجابى, ماركاسى جاعىنان بىرىنەن-ءبىرى وتكەن تەمىر تۇلپارلار كورمەگە كەلۋشىلەردى قىزىقتىرا ءتۇستى. ءتىپتى كورمەنى تاماشالاۋشىلار وزدەرىنە ۇناعان كولىكتىڭ جانىندا فوتوعا ءتۇسىپ, ولاردى قىزىقتاپ جاتتى. ايتا كەتۋ كەرەك, رەسەيلىك «بريگادا» سەريالىنداعى كولىكتەر دە اتالعان كورمەدەن تابىلىپ, كوپشىلىكتىڭ تاڭدانىسىن تۋدىردى. سونىمەن قاتار كورمە ۇيىمداستىرۋشىلارى سوناۋ سوعىس جىلدارىنان بەرى كونە جادىگەر رەتىندە ساقتالىپ كەلگەن اۆتوكولىكتەردى دە كوپتىڭ الدىنا شىعاردى.
«دجيپ كلۋب تاراز» توبىنىڭ مۇشەسى ەۆگەني دۋيۋنوۆ فەستيۆالعا 50-گە جۋىق تەمىر تۇلپار قاتىسقانىن, ولاردىڭ اراسىندا «بريگادا» سەريالىندا بوي كورسەتكەن «گاز-21» («ۆولگا»), سونىمەن قاتار Lincoln Town Car اۆتوكولىكتەرىنىڭ دە بار ەكەنىن ايتادى. «سونداي-اق قالىڭ جۇرتشىلىققا ەكىنشى دۇنيەجۇزىلىك سوعىس زامانىنا كۋا بولعان كولىكتەر دە تانىستىرىلدى. سونىڭ ءبىرى – Ford GPW اۆتوكولىگى. ونى كولىك يەسى كورمەگە ەۆاكۋاتورمەن اكەلدى. كۇن كوزىنە شاعىلىسقان «مەرسەدەس» پەن اۆتواۋەسقويلاردىڭ قىزىعۋشىلىعىن تۋدىرعان «BMW» اۆتوكولىگىن دە ءدال وسى جەردەن تاپتىق», دەيدى ءوز سوزىندە ەۆگەني دۋيۋنوۆ.
تاعى ءبىر ەرەكشەلىك, كورمەگە قويىلعان كولىكتەردىڭ ىشىندەگى ەڭ كونەسى «گاز – 67» اۆتوماشيناسى بولىپ شىقتى. بۇل تەمىر تۇلپاردىڭ يەسى ءابدۋجاليل قۇربانوۆ ەسىمدى ازامات ەكەن. وسى ۋاقىتقا دەيىن 20 اۆتوكولىك قۇراستىرعان ول مۇندا ونىڭ التاۋىن اكەلىپتى.
جامبىل وبلىسى
